ଭବାନୀପାଟଣା, ୩୦ା୬(ଡି.ଏନ୍.ଏ.) : ଭବାନୀପାଟଣାରେ ଦଶ ଟଙ୍କିଆ କଏନ୍ ଚଳୁ ନାହିଁ ବୋଲି ମିଥ୍ୟା ପ୍ରଚାର କରାଯାଉଛି। ଏପରି ଗୁଜବ ଯୋଗୁ କୌଣସି ଦୋକାନୀ ଆଉ କଏନ୍ ରଖୁନାହାନ୍ତି। ଫଳରେ ଗ୍ରାହକମାନେ ନାନା ଅସୁବିଧାର ସମ୍ମୁଖୀନ ହେଉଛନ୍ତି। କିଛି ଲୋକ ଅପପ୍ରଚାର କରୁଛନ୍ତି ଦଶ ଟଙ୍କିଆ ମୁଦ୍ରା ଦୁଇ ପ୍ରକାର। ଗୋଟିଏରେ ୧୫ଟି ଗାର ଦିଆଯାଇଥିବା ବେଳେ ଆଉ ଗୋଟିଏରେ ୧୦ଟି ଗାର। ସେହିପରି ଦୁଇ ପ୍ରକାରର ମୁଦ୍ରାରେ ଭିନ୍ନତା ରହିଛି। ଏହି ଭିନ୍ନତା ଯୋଗୁ ଅନେକ ଲୋକ ନକଲି କହୁଥିବା ବେଳେ ଆଉ ଚଳୁ ନାହିଁ ବୋଲି କିଛି କହୁଛନ୍ତି। ଫଳରେ ଦଶ ଟଙ୍କିଆ ମୁଦ୍ରାକୁ ନେଇ ଚିନ୍ତା ପ୍ରକଟ ହୋଇଛି। ଏଥିରେ କେତେ ସତ୍ୟତା ରହିଛି ଜାଣିବା ପାଇଁ ଭବାନୀପାଟଣା ଏସ୍ବିଆଇରେ ପଚରାଯିବାରୁ ଦଶ ଟଙ୍କିଆ ମୁଦ୍ରାକୁ ନେଇ ଲୋକେ ମନଗଢ଼ା କଥା କହୁଛନ୍ତି। ଦଶ ଟଙ୍କିଆ ମୁଦ୍ରା ଅଚଳ ନୁହେଁ କି ନକଲି ନୁହେଁ। ବ୍ୟାଙ୍କ ପକ୍ଷରୁ ତାହାକୁ ଗ୍ରହଣ କରାଯାଉଛି। କେହି ଏଥିପାଇଁ ଚିନ୍ତିତ ହେବାର ନାହିଁ। ଯେଉଁମାନେ ବିଭ୍ରାନ୍ତିକର ତଥ୍ୟ ଦେଉଛନ୍ତି ସେମାନଙ୍କ ସମ୍ପର୍କରେ ଜଣାଇବା ପାଇଁ ବ୍ୟାଙ୍କ ପକ୍ଷରୁ କୁହାଯାଇଛି।