ନୂଆଦିଲ୍ଲୀ, ୨୭ା୫(ପି.ଟି.)-ଭାରତର ଅପୂର୍ବୀ ଚାଣ୍ଡେଲା ତାଙ୍କ ଫର୍ମ ଜାରି ରଖିବା ସହ ଜର୍ମାନୀର ମ୍ୟୁନିକ୍ଠାରେ ଚାଲିଥିବା ଚଳିତବର୍ଷର ତୃତୀୟ ଇଣ୍ଟରନ୍ୟାଶନାଲ ଶୁଟିଂ ସ୍ପୋଟର୍ସ ଫେଡେରେଶନ (ଆଇଏସ୍ଏସ୍ଏଫ୍), ଓ୍ବାଲର୍ଡ କପ୍ ରାଇଫଲ/ପିସ୍ତଲ ଷ୍ଟେଜ୍ର ମହିଳା ୧୦ମିଟର ଏୟାର ରାଇଫଲରେ ସ୍ବର୍ଣ୍ଣ ପଦକ ଲାଭ କରିଛନ୍ତି। ଜୟପୁରର ଏହି ଶୁଟର ଫାଇନାଲରେ ୨୫୧ ସ୍କୋର ସହ ପ୍ରଥମ ସ୍ଥାନ ଅଧିକାର କରିଥିଲେ। ଚାଇନାର ଓ୍ବାଙ୍ଗ୍ ଲୁୟାଓ ୨୫୦.୮ ସ୍କୋର ସହ ରୌପ୍ୟ ଜିତିଥିବା ବେଳେ ଅନ୍ୟ ଜଣେ ଶୁଟର ଜୁ ହଙ୍ଗ୍ ୨୨୯.୪ ପଏଣ୍ଟ ସହ ତୃତୀୟ ସ୍ଥାନ ଅଧିକାର କରିଥିଲେ। ଅପୂର୍ବୀ ଓ ଓ୍ବାଙ୍ଗ୍ଙ୍କ ମଧ୍ୟରେ ତୀବ୍ର ପ୍ରତିଦ୍ୱନ୍ଦ୍ୱିିତା ହୋଇଥିଲା। ଫେବୃୟାରୀରେ ନୂଆଦିଲ୍ଲୀରେ ଏକ ବିଶ୍ୱ ରେକର୍ଡ ସ୍କୋର ପରେ ଏହାଥିଲା ଅପୂର୍ବୀଙ୍କ ଦ୍ୱିତୀୟ ଆଇଏସ୍ଏସ୍ଏଫ୍ ବିଶ୍ୱକପ୍ ସ୍ବର୍ଣ୍ଣ। ବେଜିଂରେ ଅନୁଷ୍ଠିତ ଦ୍ୱିତୀୟ ଷ୍ଟେଜ୍ରେ ଚତୁର୍ଥ ସ୍ଥାନ ସହ ସେ ଅଳ୍ପକେ ପଦକ ହାସଲରୁ ବଞ୍ଚତ୍ତ ରହିଥିଲେ। ଅନ୍ୟପକ୍ଷରେ ଅପୂର୍ବୀଙ୍କ କ୍ୟାରିୟରରେ ଏହା ହେଉଛି ଚତୁର୍ଥ ଆଇଏସ୍ଏସ୍ଏଫ୍ ପଦକ। ଏହି ବିଭାଗରେ ଭାଗ ନେଇଥିବା ଅନ୍ୟ ଜଣେ ଭାରତୀୟ ଇଲାଭେନିଲ ଭାଲାରିଭାନ ମଧ୍ୟ ଟିମ୍ମେଟ ଅପୂର୍ବୀଙ୍କ ସହ ଫାଇନାଲକୁ ଉନ୍ନୀତ ହୋଇଥିଲେ। କିନ୍ତୁ ସେ ଚତୁର୍ଥ ସ୍ଥାନରେ ରହିଥିଲେ। ଶନିବାର ୨୦୨୦ ଟୋକିଓ ଅଲିମ୍ପିକ ପାଇଁ ଦୁଇଟି କୋଟା ଉପଲବ୍ଧ ଥିଲା। ମହିଳା ୧୦ମିଟର ଏୟାର ରାଇଫଲରେ ଯଥାକ୍ରମେ ୫ମ ଓ ୬ଷ୍ଠ ସ୍ଥାନ ସହ ରୋମାନିଆର ଲାଉରା ଜର୍ଜେଟା କୋମାନ ଏବଂ ୧୬ ବର୍ଷୀୟ ହଙ୍ଗେରୀର ଏସ୍ଜର ମେସ୍ଜାରସ ଏହି କୋଟା ହାସଲ କରିଥିଲେ। ସୂଚନାଯୋଗ୍ୟ, ଅପୂର୍ବୀ, ଅଞ୍ଜୁମ ମୋଦଗିଲ, ସୌରଭ ଚୌଧାରୀ, ଅଭିଷେକ ବର୍ମା ଏବଂ ଦିବ୍ୟାଂଶ ସିଂ ପନଓ୍ବାର ଦେଶ ପାଇଁ ପୂର୍ବରୁ କୋଟା ହାସଲ କରିସାରିଛନ୍ତି। ଭାରତର ଅନ୍ୟ ଏକ କୋଟା ପୁରୁଷ ୧୦ମିଟର ଏୟାର ରାଇଫଲରେ ରହିଛି। ସୋମବାର ୩ଟି ଇଭେଣ୍ଟର ଫାଇନାଲ ହେବ। ଟୋକିଓ ଲାଗି ୬ଟି କୋଟା ଚୂଡ଼ାନ୍ତ ହେବ।