ବେଜିଂ,୬।୧: ଚାଇନାରେ ସୃଷ୍ଟି ହୋଇଥିବା ପ୍ରାଣଘାତୀ କରୋନା ଭାଇରସ ବିଶ୍ୱର ୩୦ରୁ ଅଧିକ ରାଷ୍ଟ୍ରକୁ ବ୍ୟାପିଗଲାଣି। ଏହି ଭାଇରସ ଯୋଗୁ ଚାଇନାରେ ମୃତ୍ୟୁସଂଖ୍ୟା ୫୫୦ ଟପି ଯାଇଛି। ଭାଇରସ ଜନିତ ମୃତ୍ୟୁସଂଖ୍ୟା କମିବା ପରିବର୍ତ୍ତେ ହୁ ହୁ ହୋଇ ବଢିବାରେ ଲାଗିଛି। କରୋନା ଭାଇରସ୍ ଆକ୍ରାନ୍ତଙ୍କ ଚିକିତ୍ସା ପାଇଁ ଚାଇନାରେ ଜଣେ ଡାକ୍ତରଙ୍କ ବିବାହ ମାତ୍ର ୧୦ ମିନିଟରେ ସମ୍ପନ୍ନ ହୋଇଛି। ଡାକ୍ତର ଲି. ଝିକଆଙ୍ଗ ଏବଂ ୟୁ.ହଙ୍ଗୟାନଙ୍କ ବିବାହ ଜାନୁୟାରୀ ୩୦ ତାରିଖରେ ହେବ ବୋଲି ପୂର୍ବରୁ ନିଷ୍ପତ୍ତି ହୋଇଥିଲା। ଏବେ କରୋନା ଯୋଗୁ ହସ୍ପିଟାଲରେ ଡାକ୍ତରଙ୍କ ଉପସ୍ଥିତି ନିହାତି ଜରୁରୀ ହୋଇପଡିଛି। କୌଣସି ପରିସ୍ଥିତି ମଧ୍ୟ ସେମାନଙ୍କୁ ଛୁଟି ଦିଆଯାଉନାହିଁ। ଫଳରେ ଝିକଆଙ୍ଗଙ୍କ ବିବାହ ପୂର୍ବରୁ ନିର୍ଘଣ୍ଟ ହୋଇଥିବାରୁ ସେ କମ୍ ସମୟ ମଧ୍ୟରେ ବିବାହ କରିବେ ବୋଲି ତାଙ୍କ ଭାବି ସ୍ତ୍ରୀଙ୍କୁ ଜଣାଇଥିଲେ। ଏଥିରେ ସେ ରାଜି ହେବାରୁ ଉଭୟଙ୍କ ବିବାହ ମାତ୍ର ୧୦ ମିନିଟ ମଧ୍ୟରେ ସମ୍ପନ୍ନ ହୋଇଥିଲା। ଏହି ବିବାହ କାର୍ଯ୍ୟକ୍ରମରେ ମାତ୍ର ୩ ଜଣ ଅତିଥି ସାମିଲ ହୋଇଥିଲେ। ବିବାହ ପରେ ଝିକଆଙ୍ଗ କରୋନା ରୋଗୀଙ୍କ ଚିକିତ୍ସା ପାଇଁ ହସ୍ପିଟାଲ ଯାଇଥିଲେ।
