ନୟାଗଡ଼ ଅଫିସ,୪ା୧୦: ନୟାଗଡ଼ ଜିଲା ଶରଣକୁଳ ଥାନା ଚଢ଼େୟାପଲ୍ଲୀ ଗ୍ରାମରେ ଜଣେ ନବବଧୂଙ୍କୁ ଯୌତୁକ ବାବଦରେ ବାକି ଥିବା ୧୦ ହଜାର ଟଙ୍କା ପାଇଁ ହତ୍ୟା କରାଯାଇଥିବା ଅଭିଯୋଗ ହୋଇଛି। ଏ ନେଇ ମୃତା ମହିଳାଙ୍କ ମାଆ ଥାନାରେ ଅଭିଯୋଗ କରିଛନ୍ତି। ପୋଲିସ ଅଭିଯୁକ୍ତ ସ୍ବାମୀ ଓ ଶାଶୁଙ୍କୁ ଥାନାରେ ଅଟକ ରଖିଛି। ଥାନାରୁ ମିଳିଥିବା ସୂଚନା ଅନୁସାରେ ୭ମାସ ତଳେ ରଣପୁର ଥାନା ଖତିଆ ଗ୍ରାମର ଝୁମା ସାହୁଙ୍କ ଦ୍ୱିତୀୟ ଝିଅ ପୁଷ୍ପାଞ୍ଜଳି ଚଢ଼େୟାପଲ୍ଲୀ ଗ୍ରାମର କରୁଣାକର ନାୟକଙ୍କୁ ବିବାହ କରିଥିଲେ। ବିବାହ ସମୟରେ ଯୌତୁକ ବାବଦରେ ନଗଦ ୨୦ ହଜାର ଟଙ୍କା ଦାବି କରାଯାଇଥିବା ବେଳେ ଝୁମା ୧୦ ହଜାର ଟଙ୍କା ଦେଇଥିଲେ। ସେହିଭଳି ବିଭିନ୍ନ ଆସବାବପତ୍ର ଓ ସୁନା ଜିନିଷ ଦେଇଥିଲେ। ବିବାହର ମାସ ପରେ ସ୍ବାମୀ କରୁଣାକର ଓ ଶାଶୁ ଅଇଁଠା ନାୟକ ବାକି ଥିବା ୧୦ ହଜାର ଟଙ୍କା, ସୁନା ଚେନ୍ ଓ ଗୋଟିଏ ଗାଡ଼ି ଆଣିବା ପାଇଁ ପୁଷ୍ପାଞ୍ଜଳିଙ୍କ ଉପରେ ଚାପ ପକାଇଥିଲେ। ପୁଷ୍ପାଞ୍ଜଳି ବାପଘରକୁ ଏହା ଜଣାଇବା ପରେ ସେମାନେ ପରେ ଦେବେ ବୋଲି କହିଥିଲେ। ପରେ ଶାଶୁ ଘର ଲୋକେ ପୁଷ୍ପାଞ୍ଜଳିଙ୍କୁ ଶାରୀରିକ ଓ ମାନସିକ ନିର୍ଯାତନା ଦେଇଥିଲେ। ଏପରି କି ଅନେକ ସମୟରେ ପୁଷ୍ପାଞ୍ଜଳିଙ୍କୁ ଖାଇବାକୁ ଦେଉ ନ ଥିବା ମଧ୍ୟ ଥାନାରେ ଅଭିଯୋଗ ହୋଇଛି। ଗୁରୁବାର ଅପରାହ୍ନରେ ଚଢ଼େୟାପଲ୍ଲୀ ଗ୍ରାମର କେତେକ ଲୋକ ପୁଷ୍ପାଞ୍ଜଳିଙ୍କ ଦେହ ଖରାପ ହେବାରୁ ଶାଶୁ ଘର ଲୋକ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ନେଇଥିବା ନେଇ ଝୁମାଙ୍କୁ ଖବର ଦେଇଥିଲେ। ଝୁମା ଓ ତାଙ୍କ ପରିବାର ଲୋକ ମୁଖ୍ୟ ଚିକିତ୍ସାଳୟରେ ପହଞ୍ଚତ୍ ପୁଷ୍ପାଞ୍ଜଳିଙ୍କ ମୃତ୍ୟୁ ହୋଇଥିବା ଜାଣିବାକୁ ପାଇଥିଲେ। ଯୌତୁକ ଟଙ୍କା ନ ଦେବାରୁ ଝିଅକୁ ଶାଶୁଘର ଲୋକ ମାରିଦେଇଥିବା ନେଇ ଝୁମା ଥାନାରେ ଅଭିଯୋଗ କରିଛନ୍ତି। କରୁଣାକରଙ୍କ କହିବା କଥା, ଖରାବେଳେ ସେ ତାଜାରୁ ଆଚାର କାଢ଼ୁଥିବା ବେଳେ ତଳେ ପଡ଼ିଯାଇଥିଲେ। ପରେ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ଅଣାଯାଇଥିଲା। ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ଜିଲା ମୁଖ୍ୟ ଚିକିତ୍ସାଳୟ ପରିସରରେ ଦୁଇ ପରିବାରଙ୍କ ମଧ୍ୟରେ ଘଟଣାକୁ ନେଇ ଯୁକ୍ତିତର୍କ ହୋଇଥିଲା। ଟାଉନ ପୋଲିସ ପହଞ୍ଚତ୍ ଏହାର ସମାଧାନ କରିବା ସହିତ ଶରଣକୁଳ ପୋଲିସକୁ ଖବର ଦେଇଥିଲା। ଶରଣକୁଳ ପୋଲିସ ଘଟଣାସ୍ଥଳରେ ପହଞ୍ଚତ୍ ଏହାର ତଦନ୍ତ କରିଥିଲା। ଏ ନେଇ ଥାନାରେ ଏକ ମାମଲା (୮୮/୧୯) ରୁଜୁ କରାଯାଇ ସ୍ବାମୀ ଓ ଶାଶୁଙ୍କୁ ଅଟକ ରଖାଯାଇଥିବା ଥାନା ଅଧିକାରୀ କିରଣ ହେମ୍ବ୍ରମ ପ୍ରକାଶ କରିଛନ୍ତି। ବ୍ୟବଚ୍ଛେଦ ରିପୋର୍ଟ ଆସିଲା ପରେ ମୃତ୍ୟୁର କାରଣ ଜଣାପଡ଼ିବ ବୋଲି ସେ କହିଛନ୍ତି।