କେନ୍ଦ୍ରାପଡ଼ା ଅଫିସ, ୬ା୫: ଗତ ୪ ତାରିଖରୁ ଅଦ୍ୟାବଧି ୧୧୫୭ ପ୍ରବାସୀ ଜିଲାକୁ ଫେରିଛନ୍ତି। ସେମାନଙ୍କଠାରୁ ସଂଗୃହୀତ ସ୍ବାବ୍ ଟେଷ୍ଟିଂ ପରେ ୫୮ ଜଣ କରୋନା ନେଗେଟିଭ୍ ବୋଲି ଜିଲା ପ୍ରଶାସନ ବୁଧବାର ଗଣମାଧ୍ୟମକୁ ସୂଚନା ଦେଇଛି। ଜିଲାର ୪ଟି ସ୍ଥାନରେ କରୋନା ଭୂତାଣୁ ନମୁନା ସଂଗ୍ରହ କେନ୍ଦ୍ର ଖୋଲାଯାଇ ସ୍ବାବ୍ ସଂଗ୍ରହ ଚାଲିଥିବା ଜିଲାପାଳ ସମର୍ଥ ବର୍ମା ପ୍ରକାଶ କରିଛନ୍ତି ା କେନ୍ଦ୍ରାପଡା ଜିଲାର ଲକ୍ଷାଧିକ ଲୋକ ଫେରିବା ପାଇଁ ନାମ ପଞ୍ଜୀକରଣ କରିଛନ୍ତି। ଏଥିମଧ୍ୟରୁ ୫ ତାରିଖ ସୁଦ୍ଧା ୫୭୧ ଜଣ ଆସିଥିବା ବେଳେ ୬ ତାରିଖ ମଧ୍ୟାହ୍ନ ସୁଦ୍ଧା ୬୨୬ ଜଣ ଆସିଛନ୍ତି। ପଟ୍ଟାମୁଣ୍ଡାଇ ବ୍ଲକକୁ ୨୦୨ଜଣ ଫେରିଥିବାବେଳେ ଗରଦପୁରକୁ ୩୧, ମହାକାଳପଡାକୁ ୨୯୮, ଡେରାବିଶକୁ ୬୯, କେନ୍ଦ୍ରାପଡାକୁ ୧୦୨, ମାର୍ଶାଘାଇକୁ ୧୩୦, ଆଳିକୁ ୩୮, ରାଜନଗରକୁ ୨୧୬ ଓ ରାଜକନିକାକୁ ୯୧ ଜଣ ଆସିଛନ୍ତି। ପଶ୍ଚିମବଙ୍ଗ, ଆନ୍ଧ୍ର, କେରଳ ଓ ସୁରଟରୁ ଆସିଥିବା ଏହି ବ୍ୟକ୍ତିଙ୍କୁ ବ୍ଲକ ଅଞ୍ଚଳର ବିଭିନ୍ନ ସଙ୍ଗରୋଧ ଗୃହରେ ରଖାଯାଇଛି ା ଜିଲାର ୨୪୯ ପଞ୍ଚାୟତରେ କରୋନା ଭୂତାଣୁ ସଂକ୍ରମଣ ରୋକିବା ପାଇଁ ୧୧୧୧ଟି ସଙ୍ଗରୋଧ କେନ୍ଦ୍ର ଖୋଲାଯାଇଥିବା ଏଡିଏମ୍ ବସନ୍ତ କୁମାର ରାଉତ ପ୍ରକାଶ କରିଛନ୍ତି। ସେ କହିଛନ୍ତି, ଜିଲାରେ ଥିବା ୧୧୧୧ ସଙ୍ଗରୋଧ ଗୃହରେ ୪୧୬୯୩ଟି ଶଯ୍ୟା ପ୍ରସ୍ତୁତ ହୋଇଛି। ପ୍ରତ୍ୟେକ ପ୍ରବାସୀଙ୍କଠାରୁ ସ୍ବାବ୍ ଟେଷ୍ଟିଂ ପାଇଁ ନମୁନା ସଂଗ୍ରହ ସହ ୧୪ ଦିନିଆ ସଙ୍ଗରୋଧ ନିୟମ ପାଳନକୁ ଗୁରୁତ୍ୱ ଦିଆଯାଇଛି। ସେହିପରି ଏଡିଏମ୍ଓ ଡା. ମିର୍ଜା ବାବର ବେଗ୍ କହିଛନ୍ତି, ଜିଲାରେ ୧୫୦୪ଟି କରୋନା ଭୂତାଣୁ ପରୀକ୍ଷା ପାଇଁ ନମୁନା ସଂଗ୍ରହ ହୋଇଛି। ଇତିମଧ୍ୟରେ ୧୪୪୭ଟି ନମୁନା ପରୀକ୍ଷା କରାଯାଇ ୨ଟି ପଜିଟିଭ ଥିବାବେଳେ ଅନ୍ୟସବୁ ନେଗେଟିଭ୍ ଥିବା ଗତ ଏପ୍ରିଲ ୭ ଓ ୧୨ ତାରିଖରେ ଜଣାପଡିଥିଲା।