ଭଟଲି,୯ା୫(ଡି.ଏନ୍.ଏ.): ଦେଶରେ ମହାମାରୀ କରୋନା ଭୂତାଣୁ ଦ୍ରୁତଗତିରେ ମାଡ଼ିଚାଲିଛି। ଏଥିଲାଗି ଚାରିଆଡ଼େ ଲକ୍ଡାଉନ୍ ଜାରି କରାଯାଇଛି। ଫଳରେ ବିଭିନ୍ନ ରାଜ୍ୟରେ ଫସି ରହିଥିବା ଓଡ଼ିଆ ଶ୍ରମିକଙ୍କୁ ରାଜ୍ୟ ସରକାର ଫେରାଇ ଆଣିବାର ବ୍ୟବସ୍ଥା କରିଥିବାବେଳେ ଓଡ଼ିଶାରେ ମଧ୍ୟ ଅନ୍ୟ ରାଜ୍ୟର ଶ୍ରମିକ ଫସି ରହିଛନ୍ତି। ସେମାନେ କାମ ଅଭାବରୁ ଖାଇବାକୁ ନ ପାଇ ନିଜ ରାଜ୍ୟକୁ ଫେରିବାର ଉଦ୍ୟମ କରୁଛନ୍ତି। ତେବେ ସେମାନଙ୍କ ଫେରିବାର କୌଣସି ବ୍ୟବସ୍ଥା ନ ଥିବାବେଳେ ସେମାନେ ବିଭିନ୍ନ ପ୍ରକାର ହଟହଟାର ସମ୍ମୁଖୀନ ହେବା ସହିତ ଚାଲିଚାଲି ନିଜ ରାଜ୍ୟକୁ ଫେରିବାର ଉଦ୍ୟମ କରୁଛନ୍ତି ା ଶନିବାର ସକାଳେ ୧୧ଜଣ ଶ୍ରମିକ ଓ ୨ଜଣ ଛୁଆ ଚାଲି ଚାଲି ଛତିଶଗଡ଼ ରାଜ୍ୟ ଚାମ୍ପା ଜିଲାକୁ ଯାଉଥିବା ଭଟଲିରେ ଦେଖିବାକୁ ମିଳିଥିଲା। ତେବେ ସେମାନେ ବିଗତ ୪ଦିନ ଧରି ଢେଙ୍କାନାଳ ଜିଲାରୁ ଚାଲି ଚାଲି ଆସି ଭଟଲିରେ ପହଞ୍ଚିଥିଲେ। ଏହା ଦେଖି ଭଟଲିର କେତେକ ଯୁବକ ସେମାନଙ୍କୁ ଅଟକାଇ ଜଳଖିଆ ଖାଇବା ବ୍ୟବସ୍ଥା କରିବା ସହିତ ସେମାନଙ୍କୁ ଛତିଶଗଡ଼ ସୀମା ପର୍ଯ୍ୟନ୍ତ ଯିବା ପାଇଁ ଦୁଇଟି ଗାଡ଼ିର ବ୍ୟବସ୍ଥା କରିଥିଲେ। ସାମାଜିକ ଦୂରତା ଅବଳମ୍ବନ କରିବା ପାଇଁ ୧୧ଜଣଙ୍କ ପାଇଁ ଦୁଇଟି ଗାଡ଼ି ବ୍ୟବସ୍ଥା କରାଯାଇଥିବା ସେହି ଯୁବକମାନେ ପ୍ରକାଶ କରିଥିଲେ। ଏହାସହିତ ସେମାନେ ଛତିଶଗଡ଼ ସୀମାରେ ପହଞ୍ଚିବା ପରେ ତାଙ୍କ ନିଜ ଗ୍ରାମରେ ଛାଡ଼ିବା ପାଇଁ ଛତିଶଗଡ଼ ରାଜ୍ୟ ସରିଆଠାରୁ ମଧ୍ୟ ଏକ ଗାଡ଼ିର ବ୍ୟବସ୍ଥା କରାଯାଇଥିଲା ା ପରେ ସେମାନେ ତରଜୁଙ୍ଗା ପହଞ୍ଚିବା ପରେ ସେମାନଙ୍କକୁ ଭାଜପା ଯୁବ ରାଜ୍ୟ ସମ୍ପାଦକ ଇରାସିସ୍ ଆଚାର୍ଯ୍ୟ ଭେଟି ସେମାନଙ୍କୁ ସମସ୍ତଙ୍କୁ ମାସ୍କ ପିନ୍ଧାଇବା ପାଇଁ ଶୁଖିଲା ଖାଦ୍ୟ ପରିବେଷଣ କରିଥିଲେ। ଏହି ଶ୍ରମିକମାନେ ଢେଙ୍କାନାଳ ଜିଲାର ଏକ ଇଟାଭାଟିରେ କାମ କରୁଥିବା ଜଣାପଡ଼ିଥିଲା। ତେବେ ସେହି ଶ୍ରମିକମାନଙ୍କ ମଧ୍ୟରୁ ଜଣେ ନିଜର ପାଠପଢ଼ା ଖର୍ଚ୍ଚ ପାଇଁ ଶ୍ରମିକ ଭାବେ କାମ କରିବାକୁ ଓଡ଼ିଶା ଆସିଥିବା କହି କାନ୍ଦୁଥିବାବେଳେ ଅନ୍ୟ ଶ୍ରମିକମାନେ ଆଉ କେବେ ମଧ୍ୟ ବାହାରକୁ କାମ କରି ଆସିବୁ ନାହିଁ ବୋଲି ପ୍ରକାଶ କରିଥିଲେ।