ନୂଆଦିଲ୍ଲୀ,୯-୭: କେନ୍ଦ୍ର ସରକାର ବିଗତ ୧୧ବର୍ଷରେ ରାଷ୍ଟ୍ରାୟତ୍ତ ବ୍ୟାଙ୍କଗୁଡ଼ିକୁ ୩.୧୫ ଲକ୍ଷ କୋଟି ଟଙ୍କା ପ୍ରଦାନ କରିଛନ୍ତି ବୋଲି ସୋମବାର ପାର୍ଲାମେଣ୍ଟରେ ପ୍ରକାଶ କରିଛନ୍ତି। ରାଷ୍ଟ୍ରାୟତ୍ତ ବ୍ୟାଙ୍କଗୁଡ଼ିକରେ ନଗଦର ଅଭାବ ଉପରେ ଆଗତ ପ୍ରଶ୍ନର ଉତ୍ତର ଦେଇ ଅର୍ଥ ରାଷ୍ଟ୍ରମନ୍ତ୍ରୀ ଅନୁରାଗ ସିଂ ଠାକୁର ଲୋକ ସଭାରେ କହିଛନ୍ତି ଯେ, ରାଷ୍ଟ୍ରାୟତ୍ତ ବ୍ୟାଙ୍କଗୁଡ଼ିକ ମିନିମମ୍ କ୍ୟାପିଟାଲ ଟୁ ରିସ୍କ-ଓ୍ବେଟେଡ ଆସେଟ ରେସିଓ(ସିଆର୍ଏଆର୍) ୯% ରଖିବାକୁ ବାଧ୍ୟ। ଚଳିତ ବର୍ଷ ୩୧ ମାର୍ଚ୍ଚ ସୁଦ୍ଧା ୧୮ ରାଷ୍ଟ୍ରାୟତ୍ତ ବ୍ୟାଙ୍କ ଏହି ସିଆର୍ଏଆର୍ ଆବଶ୍ୟକତା ପୂରଣ କରିଛନ୍ତି। ସେମାନେ ଆଭ୍ୟନ୍ତରୀଣ ଉପରେ ନଗଦ ହାସଲ କରିବା ସହିତ, ଷ୍ଟକ୍ ବଜାରରୁ ଟଙ୍କା ଉଠାଇଥାନ୍ତି ଅଥବା ସରକାର ସେମାନଙ୍କୁ ପୁଞ୍ଜି ପ୍ରଦାନ କରନ୍ତି। ଆର୍ଥିକ ବର୍ଷ ୨୦୦୯ରୁ ୨୦୧୯ ପର୍ଯ୍ୟନ୍ତ ରାଷ୍ଟ୍ରାୟତ୍ତ ବ୍ୟାଙ୍କଗୁଡ଼ିକ ୨,୮୧,୬୧୬ କୋଟି ଟଙ୍କାର ପୁଞ୍ଜି ଅନ୍ୟାନ୍ୟ ସୂତ୍ରରୁ ହାସଲ କରିବା ସହ ଏହି ସମୟ ମଧ୍ୟରେ ୯୮,୩୭୩ କୋଟି ଟଙ୍କାର ନେଟ୍ ଲାଭ କରିଛନ୍ତି ବୋଲି ଠାକୁର କହିଛନ୍ତି।