ବାଲିଆ, ୧୭।୩: ୨୦୧୯ ମେ’ ରେ ହୋଇଥିବା ସାମୁଦ୍ରିକ ଝଡ଼ ଫନୀରେ ସ୍ବାମୀଙ୍କ ମୃତ୍ୟୁ ଘଟିବା ପରେ ତିନୋଟି ପିଲାଙ୍କ ଦିଓଳି ଖାଇବା ଓ ପାଠପଢ଼ା ଖର୍ଚ୍ଚ ତୁଲାଇବା ପାଇଁ ଘରୁ ଗୋଡ଼ କାଢ଼ିଥିଲେ ବିରିଡି ବ୍ଲକ ଅଧୀନ ବୁଢାପଢ଼ା ପଞ୍ଚାୟତ ବୁଢ଼ାପଡ଼ାର ଲକ୍ଷ୍ମୀ। ମୂଲ, ମଜୁରି ଲାଗି ଆଣୁଥିବା ଟଙ୍କାରେ ପରିବାର ଚଳାଇଲେ। ସ୍ବାମୀଙ୍କ ମୃତ୍ୟୁ ପରେ ପରିବାରଟି ସମ୍ପୂର୍ଣ୍ଣ ବେସାହାରା ହୋଇପଡ଼ିଥିବା ବେଳେ ଲକ୍ଷ୍ମୀଙ୍କ ରୋଜଗାର ଟଙ୍କାରେ ପିଲାଙ୍କ ପାଠପଢ଼ା ଖର୍ଚ୍ଚ ତୁଲାଇବା ତାଙ୍କ ପାଇଁ କାଠିକର ପାଠ ହୋଇପଡୁଛି। ହେଲେ ତାଙ୍କ ସମସ୍ୟା ପ୍ରତି କାହାରି ଦୃଷ୍ଟି ପଡୁ ନ ଥିବା ବେଳେ ସରକାରଙ୍କ ପୁଳାପୁଳା ଯୋଜନା ଲକ୍ଷ୍ମୀଙ୍କ ପରିବାର ପାଇଁ ସ୍ବପ୍ନ ପାଲଟିଛି। ବାତ୍ୟାରେ ସ୍ବାମୀଙ୍କ ମୃତ୍ୟୁ ଘଟିଥିଲେ ବି ଏଯାଏଁ ସରକାରୀ ସହାୟତା ମିଳିନି। ଏପରିକି ବାତ୍ୟାରେ ଘର ଭାଙ୍ଗିଥିଲେ ବି ଘରଭଙ୍ଗା ବାବଦ ସହାୟତା ସେ ପାଇନାହାନ୍ତି। ୩ ପିଲାଙ୍କ ସହ ଏକ ଭଙ୍ଗା ଆଜ୍ବେଷ୍ଟସ ଘରେ ତାଙ୍କ ଦିନ କଟୁଛି। ବାତ୍ୟା ପରେ କ୍ଷତିଗ୍ରସ୍ତଙ୍କୁ ସହାୟତା ଯୋଗାଇ ଦେବାକୁ ସରକାର ଘୋଷଣା କରିଥିଲେ ବି ସ୍ଥାନୀୟ ପ୍ରଶାସନିକ ଅଧିକାରୀଙ୍କ ଆନ୍ତରିକତା ଅଭାବ ଯୋଗୁ ଲକ୍ଷ୍ମୀଙ୍କ ପରିବାର ଏ ସବୁ ସୁବିଧା ପାଇପାରିନାହାନ୍ତି। ଏ ସମ୍ପର୍କରେ ଲକ୍ଷ୍ମୀ କୁହନ୍ତି, ସରକାରୀ ସହାୟତା ନେଇ ତହସିଲଠାରୁ ଆରମ୍ଭ କରି ଜିଲା ପ୍ରଶାସନିକ ଅଧିକାରୀଙ୍କ ନିକଟକୁ ବାରମ୍ବାର ଦୌଡ଼ିବା ପରେ ବି ୧୧ ମାସ ହେଲା ତାହା ମିଳିପାରିନାହିଁ। ପ୍ରଶାସନିକ ଅଧିକାରୀମାନେ ତାଙ୍କ ଗୁହାରି ଶୁଣୁ ନ ଥିବାରୁ ସେ ନିକଟରେ ରାଜ୍ୟ ମାନବାଧିକାର ଆୟୋଗଙ୍କ ଦ୍ୱାରସ୍ଥ ହୋଇ ସହାୟତା ଯୋଗାଇ ଦେବାକୁ ନିବେଦନ କରିଛନ୍ତି ବୋଲି କହିଛନ୍ତି।
