ଭୁବନେଶ୍ୱର,୮।୭(ବ୍ୟୁରୋ): ପୁରୁଣା ଭୁବନେଶ୍ୱରରେ ଖ୍ରୀଷ୍ଟପୂର୍ବ ୧୦ମ ଶତାବ୍ଦୀରେ ନିର୍ମିତ ଶୈବାଳୟ ମୁକ୍ତେଶ୍ୱର ମନ୍ଦିରରୁ ୧୨୭ତମ ଏକାମ୍ର ଐତିହ୍ୟ ପଦଯାତ୍ରା ରବିବାର ଆରମ୍ଭ ହୋଇଥିଲା। ୨୭ଜଣ ପର୍ଯ୍ୟଟକଙ୍କୁ ନେଇ ବାହାରିଥିବା ପଦଯାତ୍ରାରେ ଅଷ୍ଟ୍ରେଲିଆର ଛାତ୍ରୀଛାତ୍ର ସାମିଲ ହୋଇଥିଲେ। ସେମାନଙ୍କୁ ମନ୍ଦିରର କଳାକୃତି ଓ ପୌରାଣିକ ଗାଥା ଶୁଣାଯିବା ସହ ତା’ର ଇତିହାସ ଓ ପୃଷ୍ଠଭୂମି ଉପରେ ଧାରଣା ଦିଆଯାଇଥିଲା। ମନ୍ଦିର ଓ ପୁରୁଣା ଭୁବନେଶ୍ୱରର ପରମ୍ପରା ସମ୍ପର୍କରେ ଜାଣି ଅଷ୍ଟ୍ରେଲିଆର ୧୦ଜଣ ଇଞ୍ଜିନିୟରିଂ ଛାତ୍ର ଅଭିଭୂତ ହୋଇଯାଇଥିଲେ। ସେମାନେ ପୁରୁଣା ଭୁବନେଶ୍ୱର ବିଷୟରେ ଅନେକ କଥା ଜାଣିବା ସହ ଓଡ଼ିଶାର ବହୁ ପୌରାଣିକ ଗାଥାଗୁଡ଼ିକ ବିଷୟରେ ଜାଣିବାକୁ ପାଇଥିଲେ।
ଜଣେ ଓଡ଼ିଶୀ ନୃତ୍ୟଶିଳ୍ପୀ ଦିବ୍ୟ ପଦଯାତ୍ରାରେ ସାମିଲ ହୋଇ କହିଥିଲେ, ମନ୍ଦିରରେ ଖୋଦେଇ ହୋଇଥିବା କେତେକ ପ୍ରତିମୂର୍ତ୍ତି ଓଡ଼ିଶୀ ଓ ଅନ୍ୟ ନୃତ୍ୟର ପ୍ରଦର୍ଶନ କରୁଛି। ସେଗୁଡ଼ିକର ଛିଡ଼ା ହେବାର ଭଙ୍ଗୀ ପାଶ୍ଚାତ୍ୟ ନୃତ୍ୟକୁ ବଞ୍ଚାଇ ରଖିଛି। ସେଗୁଡ଼ିକୁ ଦେଖିଲେ ଲାଗୁଛି ଯେ, ସତେ ସେମାନଙ୍କ ମଧ୍ୟରେ ଜୀବନ ଅଛି। ଅଷ୍ଟ୍ରେଲିଆର ପର୍ଯ୍ୟଟକ ହ୍ୟାରି କହିଥିଲେ, ଆମେ ଭାରତ ଆସିବା ପୂର୍ବରୁ ଅନେକଙ୍କୁ ପଚାରିଲୁ। ସେମାନେ ଗୋଆ, ରାଜସ୍ଥାନ, କେରଳକୁ ଭାରତର ମୁଖ୍ୟ ପର୍ଯ୍ୟଟନସ୍ଥଳ କହିଥିଲେ। କିନ୍ତୁ ଆମେ ଭୁବନେଶ୍ୱରକୁ ସେଗୁଡ଼ିକ ଅପେକ୍ଷା ଅଧିକ ସାଂସ୍କୃତିକ, ସ୍ବଚ୍ଛ ଓ ଶାନ୍ତ ବୋଲି ଜାଣିବାକୁ ପାଇଲୁ। ସେଥିପାଇଁ ଆମେ ଭୁବନେଶ୍ୱର ବୁଲିବାକୁ ସ୍ଥିର କଲୁ।
ଜିଓର୍ଜିଆ ଯିଏ କି ଜଣେ ଇଞ୍ଜିନିୟରିଂ ଛାତ୍ରୀ କହିଥିଲେ, ପଦଯାତ୍ରାରେ ବହୁତ୍ କିଛି ଶିଖିବାକୁ ମିଳିଲା। ସହରରେ ଥିବା ପୁରାତନ ମନ୍ଦିରଗୁଡ଼ିକୁ ବହୁତ ଯତ୍ନରେ ରଖାଯାଇଛି। ଫଳରେ ସେଥିରେ ଜୀବିତ ରହିଥିବା ପୌରାଣିକ ଗାଥା ଜାଣିବାକୁ ମିଳୁଛି।
ସେହିପରି ଶ୍ରୀମୟୀ, ଯିଏ କି ଜଣେ କଲିକତା ଏଚ୍ଏସ୍ବିସି ବ୍ୟାଙ୍କର କର୍ମଚାରୀ କହିଥିଲେ, ମୁଁ ଭୁବନେଶ୍ୱରରେ ଜନ୍ମ ନେଇଛି ଓ ବଢିଛି ମଧ୍ୟ। କିନ୍ତୁ ଏ ମନ୍ଦିରଗୁଡ଼ିକ ବିଷୟରେ ଏତେ କଥା ଜାଣି ନ ଥିଲି। କିଛିଦିନ ପୂର୍ବରୁ ଇକୋଫ୍ରେଣ୍ଡଲି ପଦଯାତ୍ରା ନେଇ ଏକ ପ୍ରବନ୍ଧ ପଢିଥିଲି। ତାହା ମୋତେ ପଦଯାତ୍ରାରେ ଯୋଗ ଦେବାକୁ ପ୍ରୋତ୍ସାହିତ କଲା। ଏହି ପଦଯାତ୍ରାରେ ବିଶ୍ୱର ଅନେକ ସ୍ଥାନରୁ ଲୋକ ଯୋଗ ଦେଉଥିବାରୁ ଜାଣି ଖୁସି ଲାଗୁଛି। ତେବେ ଏହି ଅବସରରେ ପର୍ଯ୍ୟଟକମାନେ ଅନନ୍ତ ବାସୁଦେବଙ୍କ ପ୍ରସାଦ ରନ୍ଧା ସମ୍ପର୍କରେ ପଚାରି ବୁଝିଥିଲେ।