ପୁରୀ ଅଫିସ, ୧୨।୧୦: ଆସନ୍ତା ୧୩ ତାରିଖରେ ଆଶ୍ୱିନ ପୂର୍ଣ୍ଣିମା ବା କୁମାର ପୂର୍ଣ୍ଣିମା। ଏହା ପରଦିନ ଅର୍ଥାତ୍ ୧୪ ତାରିଖରୁ ଆରମ୍ଭ ହେବ ଧର୍ମ ମାସ କାର୍ତ୍ତିକ। ପୂଣ୍ୟ ଭୂମି ଶ୍ରୀକ୍ଷେତ୍ରରେ ରହି କାର୍ତ୍ତିକ ବ୍ରତ ପାଳନ କରିବେ ହଜାର ହଜାର ହବିଷିଆଳି। ଏଥିଲାଗି ଶୁକ୍ରବାରଠାରୁ ଶ୍ରୀକ୍ଷେତ୍ରକୁ ହବିଷିଆଳିଙ୍କ ଆସିବା ଆରମ୍ଭ ହୋଇଛି। ଟ୍ରେନ ଏବଂ ବସ୍ ଯୋଗେ କିଛି ହବିଷିଆଳି ଆସି ପୁରୀରେ ପହଞ୍ଚତ୍ଛନ୍ତି। ସେମାନେ ପୂର୍ବରୁ ସ୍ଥିର କରିଥିବା ଧର୍ମଶାଳା, ମଠକୁ ଟେମ୍ପୋ, ରିକ୍ସା ଓ ଟାଉନ ବସ୍ରେ ଯାଇଥିଲେ। ଫଳରେ ବିଭିନ୍ନ ମଠ ଓ ଧର୍ମଶାଳାରେ ଧୀରେ ଧୀରେ ଗହଳି ଆରମ୍ଭ ହେଲାଣି। ଆସନ୍ତା ୩ ଦିନ ମଧ୍ୟରେ ଅଧିକ ହବିଷିଆଳି ପହଞ୍ଚତ୍ବେ। ଅନ୍ୟପକ୍ଷରେ ସରକାରଙ୍କ ପକ୍ଷରୁ ହବିଷିଆଳି ଯୋଜନାରେ ଯେଉଁମାନେ ଆସିବେ ସେମାନଙ୍କୁ ୧୨ ତାରିଖରୁ ଆଶ୍ରୟସ୍ଥଳୀରେ ରଖାଯିବ। ତେଣୁ ଆଗକୁ ଶ୍ରୀକ୍ଷେତ୍ରରେ ହବିଷିଆଳିଙ୍କ ସଂଖ୍ୟା ଆହୁରି ବୃଦ୍ଧି ପାଇବ। ଆଶ୍ରୟସ୍ଥଳୀରେ ରହୁଥିବା ହବିଷିଆଳିଙ୍କ ଲାଗି ମାଗଣାରେ ରହିବା, ଖାଇବା ସହିତ ସମସ୍ତ ପ୍ରକାର ଆନୁଷଙ୍ଗିକ ବ୍ୟବସ୍ଥା କରାଯାଇଛି।
ଅପରାହ୍ନରେ ଟ୍ରେନରେ ଆସି ଷ୍ଟେଶନରେ ପହଞ୍ଚତ୍ଥିଲେ ବାଲେଶ୍ୱର ନୀଳଗିରି ଅଞ୍ଚଳର ୩ ଜଣ ମହିଳା। ସେମାନେ ପ୍ରଥମେ ରେଲୱେ ଟୁରିଷ୍ଟ କମ୍ପ୍ଲେକ୍ସକୁ ଯାଇ ବିଶ୍ରାମ ନେଇଥିଲେ। ଏହାପରେ ଜିଲା ପର୍ଯ୍ୟଟନ କାର୍ଯ୍ୟାଳୟକୁ ଯାଇ ସେମାନଙ୍କ ନାମ ପଞ୍ଜୀକରଣ କରିଥିଲେ। ରାତିଟା ସମ୍ପର୍କୀୟଙ୍କ ଘରେ ବିତାଇବା ପରେ ଶନିବାରଠାରୁ ହବିଷିଆଳି ଆଶ୍ରୟସ୍ଥଳରେ ରହିବେ ବୋଲି ସେମାନେ କହିଥିଲେ। ଗତ ବୁଧବାରଠାରୁ ଶ୍ରୀମନ୍ଦିରରେ ଆରମ୍ଭ ହୋଇଛି କାର୍ତ୍ତିକ ନୀତି। ରାଧାଦାମୋଦର ବେଶରେ ଦର୍ଶନ ଦେଉଛନ୍ତି ମହାପ୍ରଭୁ। କିନ୍ତୁ ପରମ୍ପରା ଅନୁଯାୟୀ, ହବିଷିଆଳିମାନେ କାର୍ତ୍ତିକ ମାସ ପ୍ରଥମ ଦିନରୁ କାର୍ତ୍ତିକ ବ୍ରତ ଆରମ୍ଭ କରଥାନ୍ତି। ପ୍ରାତଃରୁ ମାର୍କଣ୍ଡ, ଶ୍ୱେତଗଙ୍ଗା, ନରେନ୍ଦ୍ର ଏବଂ ଇନ୍ଦ୍ରଦ୍ୟୁମ୍ନ ଆଦି ବିଭିନ୍ନ ପୁଷ୍କରିଣୀରେ ସ୍ନାନ କରି ମହାପ୍ରଭୁଙ୍କ ମଙ୍ଗଳ ଆଳତି ଦର୍ଶନ କରନ୍ତି। ଦର୍ଶନ ପରେ ରହୁଥିବା ବିଭିନ୍ନ ମଠ, ଧର୍ମଶାଳା ଏବଂ ଆଶ୍ରୟସ୍ଥଳୀର ତୁଳସୀ ଚଉରା ମୂଳେ ପୂଜା କରିଥାନ୍ତି। ଦିନରେ ଗୋଟିଏ ଥର ମହାପ୍ରସାଦ ସେବନ ଅର୍ଥାତ୍ ହବିଷାନ୍ନ କରି କାର୍ତ୍ତିକ ବ୍ରତ ପାଳିଥାନ୍ତି।