ବଲିଉଡ୍ରେ ଷ୍ଟାର କିଡ୍ଙ୍କୁ ଅତି ସହଜରେ ସୁଯୋଗ ମିଳିଥାଏ। ଏପରି ସମସ୍ତେ ଭାବିଥାନ୍ତି। ମାତ୍ର ସମସ୍ତଙ୍କ କ୍ଷେତ୍ରରେ ଏହା ସତ ହୋଇ ନ ଥାଏ। ଏହାର ଏକ ବଡ଼ ଉଦାହରଣ ଏବେ ଦେଖିବାକୁ ମିଳିଛି। ନିଜ ସମୟର ଲୋକପ୍ରିୟ ନିର୍ଦ୍ଦେଶକ ବିଜୟ ଆନନ୍ଦଙ୍କ ପୁଅ ତଥା ସ୍ବର୍ଗୀୟ ସୁପରଷ୍ଟାର ଦେବ୍ ଆନନ୍ଦଙ୍କ ଭଣଜା ବୈଭବ ଆନନ୍ଦଙ୍କୁ ୧୪ ବର୍ଷର ସଂଘର୍ଷ ପରେ ଅଭିନୟରେ ସୁଯୋଗ ମିଳିଛି। ଏକତା କପୁରଙ୍କ ଏକ ଓ୍ବେବ୍ ଶୋ ‘ଦ ଭରଡିକ୍ଟ: ନାନାବତି ଭର୍ସେସ୍ ଷ୍ଟେଟ’ରେ ତାଙ୍କୁ ଦେଖିବାକୁ ମିଳୁଛି। ସେପ୍ଟେମ୍ବର ୩୦ରୁ ଏହି ଶୋ’ ଆରମ୍ଭ ହୋଇସାରିଛି। ଏହି ଶୋ’ ପାଇଁ ବୈଭବ ଦିନକୁ ୧୮ ହଜାର ଟଙ୍କା ପାରିଶ୍ରମିକ ନେଉଛନ୍ତି।
ଏହି ୧୪ ବର୍ଷ ମଧ୍ୟରେ ବୈଭବ ୧୦୦ରୁ ଅଧିକ ସିନେମାରେ ଅଡିସନ ଦେଇସାରିଛନ୍ତି। ରବି ଚୋପ୍ରା ଏବଂ ସୁରଜ ବଡଜାତ୍ୟାଙ୍କ ପାଇଁ ସହଯୋଗୀ ନିର୍ଦ୍ଦେଶକଭାବେ ମଧ୍ୟ ସେ କାମ କରିସାରିଛନ୍ତି। କେତୋଟି ଥ୍ରୀଲର ସିନେମାର କାହାଣୀ ମଧ୍ୟ ଲେଖିସାରିଛନ୍ତି, ଯେଉଁଥିରେ ସେ ନିର୍ଦ୍ଦେଶନା ଦେବାକୁ ଚାହୁଁଛନ୍ତି। ମାତ୍ର କୌଣସି ଅର୍ଥଯୋଗାଣକାରୀ ସଂସ୍ଥା ତାଙ୍କ ଉପରେ ଭରଷା କରିପାରୁ ନାହିଁ। ତେବେ ଏହି ଶୋ’ର ଅଭିନୟ ତାଙ୍କ ପାଇଁ କେତେ ସଫଳତା ଆଣିଦେବ ତାହା ଆଗାମୀ ଦିନରେ ଜଣାପଡ଼ିବ।