ଭୁବନେଶ୍ୱର,୧୬।୭(ବ୍ୟୁରୋ): ମଙ୍ଗଳବାର ପଡ଼ୁଥିବା ଚନ୍ଦ୍ରଗ୍ରହଣକୁ ନେଇ ସୋସିଆଲ ମିଡିଆ ଏବଂ କିଛି ଗଣମାଧ୍ୟମରେ ପ୍ରଚାର କରାଯାଉଥିବା ଖବର ବିଭ୍ରାନ୍ତିକର । ଜୁଲାଇ ୧୭ରେ ପଡ଼ୁଥିବା ଗ୍ରହଣ ୧୫୦ ବର୍ଷ ପରେ ପଡ଼ୁଛି। ଗୁରୁ ପୂର୍ଣ୍ଣିମାରେ ପଡ଼ୁଥିବା ହେତୁ ଏହା ଏକ ଅପୂର୍ବ ସଂଯୋଗ ଭଳି ଖବର ଭିତ୍ତିହୀନ ବୋଲି କହିଛନ୍ତି ଭୁବନେଶ୍ୱର ପଠାଣି ସାମନ୍ତ ପ୍ଲାନେଟାରିୟମ୍ର ଉପନିର୍ଦ୍ଦେଶକ ଡ. ଶୁଭେନ୍ଦୁ ପଟ୍ଟନାୟକ। ସେ କହିଛନ୍ତି, ଗତ ୧୫୦ ବର୍ଷ ମଧ୍ୟରେ ଅତି କମ୍ରେ ୧୨୦ଟି ପୂର୍ଣ୍ଣ ଓ ୯୦ଟି ଆଂଶିକ ଚନ୍ଦ୍ରଗ୍ରହଣ ସଂଘଠିତ ହୋଇଛି। ଏପରିକି ଅତିକମ୍ରେ ୭ଟି ପୂର୍ଣ୍ଣ ଏବଂ ୯ଟି ଆଂଶିକ ଚନ୍ଦ୍ରଗ୍ରହଣ ଗୁରୁ ପୂର୍ଣ୍ଣିମାରେ ହୋଇଛି। ତନ୍ମଧ୍ୟରୁ ୫ଟି ମଙ୍ଗଳବାର ଏବଂ ଗୁରୁ ପୂର୍ଣ୍ଣିମାରେ ପଡ଼ିଥିଲା। ଗତବର୍ଷ ଜୁଲାଇ ୨୭ରେ ଗୁରୁ ପୂର୍ଣ୍ଣିମାରେ ପୂର୍ଣ୍ଣ ଚନ୍ଦ୍ରଗ୍ରହଣ ହୋଇଥିଲା। ୧୮୬୯ ମସିହା ଜୁଲାଇ ୨୩ ରେ ପଡ଼ିଥିବା ଚନ୍ଦ୍ରଗ୍ରହଣଟି ଶୁକ୍ରବାର ସଂଘଠିତ ହୋଇଥିଲା। ଏଣୁ ଏହାକୁ ନେଇ ବିଭ୍ରାନ୍ତିକର ଖବର ପ୍ରଚାରିତ କରିବା ଆଦୌ ଉଚିତ ନୁହେଁ। ଗ୍ରହଣ ଓ ପରାଗ ଆଦି ଏକ ସାଧାରଣ ମହାଜାଗତିକ ଘଟଣା। ଏହାର କୌଣସି ପ୍ରଭାବ ପୃଥିବୀ ତଥା ଆମ ଉପରେ ପଡ଼େନାହିଁ। ଏହାକୁ ଉପଭୋଗ କରିବା ସହ ଏହା ପଛର କାରଣ ବିଷୟରେ ଜାଣିବା ଆବଶ୍ୟକ। ଏହାକୁ ନେଇ ସମାଜରେ ଥିବା ଭୁଲ ଧାରଣାଗୁଡ଼ିକୁ ଲୋକଙ୍କ ମନରୁ ଦୂର କରିବା ଦରକାର ବୋଲି ସେ କହିଛନ୍ତି।