ଓଡ଼ଗାଁ, ୨୫ା୫(ସ୍ବ.ପ୍ର.): ନୟାଗଡ ବନଖଣ୍ଡ ଏବଂ ଓଡ଼ଗାଁ ବନାଞ୍ଚଳ ଅନ୍ତର୍ଗତ ଗୋଚ୍ଛା ସଂରକ୍ଷିତ ଜଙ୍ଗଲ ସନ୍ନିକଟ ହଳନ୍ଦାପଲ୍ଲୀ ଗ୍ରାମ ନିକଟରୁ ଶନିବାର ସକାଳେ ବନ ବିଭାଗ ୧୫ କେଜି ବାର୍ହା ମାଂସ ଜବତ କରିଛି। ଏହି କାରବାରରେ ସମ୍ପୃକ୍ତ ଜଣଙ୍କୁ ପୋଲିସ ଗିରଫ କରିଥିବା ବେଳେ ଅନ୍ୟ ୩ ଫେରାର ହୋଇଛନ୍ତି।
ପ୍ରକାଶ ଯେ, କୌଣସି ସୂତ୍ରରୁ ଖବର ପାଇ ବନଖଣ୍ଡ ଅଧିକାରୀଙ୍କ ନିର୍ଦ୍ଦେଶକ୍ରମେ ବନାଞ୍ଚଳ ଅଧିକାରୀ ରବୀନ୍ଦ୍ରନାଥ ପଣ୍ଡା ଓ ବନପାଳ ଜ୍ୟୋତିରଞ୍ଜନ ମାନସିଂହ ବନ କର୍ମଚାରୀଙ୍କ ସହିତ ହଳନ୍ଦାପଲ୍ଲୀ ଗ୍ରାମ ନିକଟରେ ଚଢ଼ାଉ କରିଥିଲେ। ଏହି ସମୟରେ କେତେକ ବ୍ୟକ୍ତି ବାର୍ହା ମାଂସ ଭାଗବାଣ୍ଟିବାକୁ ଉଦ୍ୟମ କରୁଥିଲେ। ବନ ଅଧିକାରୀଙ୍କୁ ଦେଖି ଘଟଣାସ୍ଥଳରୁ ୩ ଜଣ ଦୌଡି ଫେରାର ହୋଇଯାଇଥିବା ବେଳେ ଜଣେ ଧରାପଡ଼ିଛନ୍ତି। ସେ ହେଲେ ହଳନ୍ଦାପଲ୍ଲୀ ଗ୍ରାମର ରାହୁଲ ନାୟକ(୨୮)। ଘଟଣାସ୍ଥଳରୁ ମାଂସ କାଟିବା ନିମନ୍ତେ ବ୍ୟବହୃତ କଟୁରି, କାତି ଏବଂ ଭାଗ ବାଣ୍ଟିବା ନିମନ୍ତେ ବ୍ୟବହର ହେଉଥିବା ନିକିତି, ବଟକରା ସହିତ ପଲିଥିନ ବ୍ୟାଗ ଜବତ କରାଯାଇଛି। ଫେରାର ଅଭିଯୁକ୍ତଙ୍କୁ ଗିରଫ ପାଇଁ ବନ ବିଭାଗ ଉଦ୍ୟମ ଚଳାଇଛି। ଏ ନେଇ ସେମାନଙ୍କ ବିରୋଧରେ ଏକ ମାମଲା ରୁଜୁ ହୋଇଥିବା ବେଳେ ଗିରଫ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବ ବୋଲି ବନାଞ୍ଚଳ ଅଧିକାରୀ ସୂଚନା ଦେଇଛନ୍ତି। ଜବତ ମାଂସ ପରୀକ୍ଷା କରାଯିବାପରେ କାର୍ଯ୍ୟାଳୟ ପରିସରରେ ପୋତି ଦିଆଯାଇଛିା