ଖୋର୍ଦ୍ଧା ଅଫିସ,୧୮ା୭: ଖୋର୍ଦ୍ଧା ଅବକାରୀ ସ୍କ୍ବାଡ୍ ପକ୍ଷରୁ ଖୋର୍ଦ୍ଧା ଆଦର୍ଶ ଥାନାର ଭାଲିଆବାଡିରେ ବୁଧବାର ପୂର୍ବାହ୍ନରେ ଅବକାରୀ ବିଭାଗ ଚଢ଼ାଉ କରି ୧୫ ଗ୍ରାମ ବ୍ରାଉନସୁଗାର ଜବତ କରିଛି। ଏହାର ମୂଲ୍ୟ ଦେଢ଼ ଲକ୍ଷ ଟଙ୍କା ହେବ ବୋଲି ଅବକାରୀ ବିଭାଗ ଇନ୍ସପେକ୍ଟର ରଞ୍ଜନ ନାୟକ କହିଛନ୍ତି। ଏହି ଘଟଣାରେ ନିରାକାରପୁର ଷ୍ଟେଶନ ବଜାରର ଅବିନାଶ ସାମନ୍ତରାୟ (୨୪)ଙ୍କୁ ଗିରଫ କରାଯାଇ ନଂ. ୩୦/୨୦୧୯-୨୦ରେ ମାମଲା ରୁଜୁ ପରେ କୋର୍ଟ ଚାଲାଣ କରାଯାଇଛି। ଜାମିନ ନାମଞ୍ଜୁର ପରେ ଅବିନାଶଙ୍କୁ ଖୋର୍ଦ୍ଧା ଜେଲକୁ ପଠାଇ ଦିଆଯାଇଛି। ଅବିନାଶ ଭାଲିଆବାଡି ଅଞ୍ଚଳରେ ବହୁଦିନ ଧରି ବ୍ରାଉନସୁଗାର କାରବାର କରି ଆସୁଥିଲେ। ତେବେ ବ୍ରାଉନସୁଗାର କେଉଁଠୁ ଆଣୁଥିଲେ ସେ ନେଇ ମୁହଁ ଖୋଲିନାହାନ୍ତି। ବେଆଇନ ନିଶା ଓ ଖଣି ବ୍ୟବସାୟକୁ ରୋକିବାକୁ କ୍ରାଇମବ୍ରାଞ୍ଚ ଏସ୍ଟିଏଫ୍ର ଚଢ଼ାଉ ଜାରି ରହିଥିବାବେଳେ ଚେଇଁ ଶୋଇଥିବା ଅବକାରୀ ବିଭାଗ ଲୋକ ଦେଖାଣିଆ ଚଢ଼ାଉ କରିଥିବା ସାଧାରଣରେ ଚର୍ଚ୍ଚା ହେଉଛି।