ଥିମ୍ପୁ,୧୬।୧୦(ପି.ଟି.)- ଏଠାରେ ଖେଳଯାଇଥିବା ୧୫ ବର୍ଷରୁ କମ୍ ସାଉଥ୍ ଏସିଆନ ଫୁଟବଲ ଫେଡେରେଶନ (ସାଫ୍) ମହିଳା ଚାମ୍ପିୟନଶିପ୍ରେ ଭାରତ ଟାଇଟଲ ହାସଲ କରିଛି। ମଙ୍ଗଳବାର ଅନୁଷ୍ଠିତ ଫାଇନାଲ ମ୍ୟାଚ୍ରେ ଭାରତ ପେନାଲ୍ଟି ଶୁଟ୍ ଆଉଟ ଜରିଆରରେ ବାଂଲାଦେଶକୁ ୫-୩ରେ ପରାସ୍ତ କରି ଚାମ୍ପିୟନ ହୋଇଛି। କଡ଼ା ସଂଘର୍ଷପୂର୍ଣ୍ଣ ଏହି ନିର୍ଣ୍ଣାୟକ ମ୍ୟାଚ୍ ନିର୍ଦ୍ଧାରିତ ସମୟ ଶେଷ ସୁଦ୍ଧା ଗୋଲ୍ ଶୂନ୍ୟ ଭାବେ ଶେଷ ହୋଇଥିଲା। ଫଳରେ ପେନାଲ୍ଟି ଶୁଟ୍ ଆଉଟ୍ର ସହାୟତା ନିଆଯାଇଥିଲା।
ଭାରତ ଆରମ୍ଭରୁ ଦମ୍ଦାର ପ୍ରଦର୍ଶନ କରିଥିଲା। ପ୍ରିୟଙ୍କା ସୁଜିଶ୍ ଆକ୍ରମଣାତ୍ମକ ପ୍ରଦର୍ଶନ କରିଥିଲେ। ଅମୀଷା ବକ୍ସଲା ତାଙ୍କୁ ସହଯୋଗ କରିଥିଲେ। ଅପରପକ୍ଷରେ ବାଂଲାଦେଶ ମଧ୍ୟ ପଛରେ ପଡି ନ ଥିଲା। ବାଂଲଦେଶ ଏକ ନିଶ୍ଚିତ ସୁଯୋଗ ପାଇଥିଲେ ମଧ୍ୟ ଭାରତୀୟ ଡିଫେନ୍ସ ଓ ଗୋଲ କିପର ଅଦ୍ରିଜା ସାରଖେଲ ବାଂଲଦେଶକୁ ସୁଯୋଗ ଦେଇ ନ ଥିଲେ। ଭାରତର ଅମୀଷା ବକ୍ସଲା ଓ ଲିଣ୍ଡା କୋମ ସେର୍ଟୋ ଏକାଧିକ ସୁଯୋଗ ସୃଷ୍ଟି କରିଥିଲେ। ତେବେ ବାଂଲଦେଶ ଗୋଲକିପର ଏହାକୁ ପଣ୍ଡ କରିଥିଲେ। ପେନାଲ୍ଟି କର୍ନର ପାଇଁ ଭାରତ ଆବେଦନ କରିଥିଲେ ମଧ୍ୟ ରେଫରି ଏହାକୁ ନାକଚ କରିଥିଲେ। ଦ୍ୱିତୀୟାର୍ଦ୍ଧାର ବାଂଲାଦେଶ ନୂଆ ଉତ୍ସାହରେ ଆକ୍ରମଣ କରିଥିଲା। ତେବେ ଭାରତ ଖେଳଳିମାନେ କୌଣସି ସୁଯୋଗ ଦେଇ ନ ଥିଲେ। ଶେଷରେ ମ୍ୟାଚ ନିର୍ଦ୍ଧାରିତ ସମୟ ସୁଦ୍ଧା ଗୋଲ ଶୂନ୍ୟ ଭାବେ ଶେଷ ହୋଇଥିଲା ଓ ପେନାଲ୍ଟି ଶୁଟ୍ ଆଉଟ୍ରେ ଭାରତୀୟ ଶିଲ୍କି ଦେବୀଙ୍କ ପ୍ରୟାସରେ ଭାରତ ବିଜୟୀ ହୋଇ ଟାଇଟଲ ହାସଲ କରିଥିଲା।