ବ୍ରହ୍ମପୁର ଅଫିସ,୧ା୨-ଦକ୍ଷିଣାଞ୍ଚଳ ବିଦ୍ୟୁତ ପରିବଣ୍ଟନ ସଂସ୍ଥା ସାଉଥକୋ ଅଧୀନ ୮ ଜିଲାର ୧୫ ଲକ୍ଷ ୭୩ ହଜାର ୮୧୫ ଉପଭୋକ୍ତାଙ୍କ ଉପରେ ୧୩୭୪.୨୬ କୋଟି ଟଙ୍କା ବକେୟା ପଡ଼ିଛି। ଆସନ୍ତା ୧୫ ତାରିଖ ସୁଦ୍ଧା ଉପଭୋକ୍ତା ବକେୟା ପୈଠ କରିବା ପାଇଁ ସମୟ ଧାର୍ଯ୍ୟ କରାଯାଇଛି। ନଚେତ୍ କେନ୍ଦ୍ରାଞ୍ଚଳ ବିଦ୍ୟୁତ୍ ସେବା ପ୍ରଦାନକାରୀ ସଂସ୍ଥା ସେସୁ ଭଳି ସାଉଥକୋ ବିଦ୍ୟୁତ୍ ସଂଯୋଗ ବିଚ୍ଛିନ୍ନ କରିବ ବୋଲି ଚେତାବନୀ ଦେଇଛି। ଗଞ୍ଜାମ, ଗଜପତି, ରାୟଗଡ଼ା, କୋରାପୁଟ, ମାଲକାନଗିରି, ନବରଙ୍ଗପୁର, କନ୍ଧମାଳ ଓ ବୌଦ୍ଧ ଜିଲାର ଉପଭୋକ୍ତାମାନଙ୍କୁ ଏ ନେଇ ସଚେତନ କରାଯାଇଛି। ବକେୟା ପୈଠ ନ କଲେ ଆସନ୍ତା ୧୬ରୁ ପର୍ଯ୍ୟୟକ୍ରମେ ବିଦ୍ୟୁତ ସଂଯୋଗ ବିଚ୍ଛିନ୍ନ ପ୍ରକ୍ରିୟା ଆରମ୍ଭ କରାଯିବ ବୋଲି ଶୁକ୍ରବାର ବ୍ରହ୍ମପୁରରେ ଅନୁଷ୍ଠିତ ଖବରଦାତା ସମ୍ମିଳନୀରେ ସାଉଥକୋର ନୂଆ ପ୍ରଶାସନିକ ଅଧିକାରୀ (ଏଓ) ପ୍ରଦୀପ କୁମାର ସାହୁ ସୂଚନା ଦେଇଛନ୍ତି।
ଉପଭୋକ୍ତା ୧୦ ହଜାରରୁ ଅଧିକ ଟଙ୍କା ବକେୟା ରଖି ପୈଠ କରି ନ ଥିଲେ ବିଦ୍ୟୁତ୍ ସଂଯୋଗ ବିଚ୍ଛିନ୍ନ କରାଯିବ। ପର୍ଯ୍ୟାୟକ୍ରମେ ପୈଠ କରିବାର ସୁଯୋଗ ଦିଆଯିବ। କଳ କାରଖାନା, ବ୍ୟବସାୟ ପ୍ରତିଷ୍ଠାନଗୁଡ଼ିକ ପ୍ରତି ଆଦାୟ ଆଭିମୁଖ୍ୟ କଠୋର କରାଯିବ ବୋଲି ଏଓ ସ୍ପଷ୍ଟ କରିଦେଇଛନ୍ତି ।
ଯେଉଁ ଉପଭୋକ୍ତାଙ୍କ ତ୍ରୁଟିପୂର୍ଣ୍ଣ ବିଲ ଥିବ ତାହା ଏସଡିଓ ଏବଂ ଜେଇଙ୍କ ପାଖରେ ଅଭିଯୋଗ କରାଗଲେ ସଂଶୋଧନ କରାଯିବ ବୋଲି ଏଓ ସାହୁ ସୂଚନା ଦେଇଥିଲେ। ଖବରଦାତା ସମ୍ମିଳନୀରେ ସାଉଥକୋ ବ୍ରହ୍ମପୁର ସିଟି ସର୍କଲ ଏସଇଙ୍କ ସମେତ ଅନ୍ୟ ଅଧିକାରୀ ଓ ଇଞ୍ଜିନିୟର ଉପସ୍ଥିତ ଥିଲେ।
