ଯଁ।ଳା/ଜଟଣୀ,୨୫।୭(ଡି.ଏନ.ଏ.): ୧୬ ନଂ. ଜାତୀୟ ରାଜପଥର ଯଁ।ଳା ଫାଣ୍ଡି ଅନ୍ତର୍ଗତ ମହୁରା ଛକ ନିକଟରେ ବୁଧବାର ଅପରାହ୍ନ ସାଢ଼େ ୨ଟାରେ ସ୍କୁଟି ପଛକୁ କାର ଧକ୍କା ଦେବାରୁ ୨ ଜଣଙ୍କ ମୃତ୍ୟୁ ଘଟିଛି। ମତକଙ୍କ ମଧ୍ୟରୁ ଜଣେ ଶିକ୍ଷୟିତ୍ରୀ ଓ ଅନ୍ୟ ଜଣେ ଅବସରପ୍ରାପ୍ତ ଶିକ୍ଷକ। ମୃତ ଶିକ୍ଷୟିତ୍ରୀଙ୍କ ନାମ ବିନୋଦିନୀ ନାୟକ। ଜଟଣୀ ବ୍ଲକ କନ୍ତିଆ ଗ୍ରାମସ୍ଥିତ ଭାଗବତ ବାସୁଦେବ ବିଦ୍ୟାପୀଠରେ ସେ ଶିକ୍ଷୟିତ୍ରୀ ଭାବେ କାର୍ଯ୍ୟରତ ଥିଲେ। ଅବସରପ୍ରାପ୍ତ ଶିକ୍ଷକଙ୍କ ନାମ ଗୋକୁଳାନନ୍ଦ ମହାନ୍ତି। ଜଟଣୀ ମଧୁସୂଦନନଗର ଅଞ୍ଚଳରେ ତାଙ୍କ ଘର।
ଜଟଣୀ ବ୍ଲକ ବ୍ରହ୍ମକୁଣ୍ଡଳ ଗ୍ରାମ ସ୍କୁଲରେ ଥିବା ଏକ ଅବସରକାଳୀନ ସମ୍ବର୍ଦ୍ଧନା ଉତ୍ସବରେ ଯୋଗ ଦେବାକୁ ଗୋକୁଳାନନ୍ଦଙ୍କ ସହ ବିନୋଦିନୀ ସ୍କୁଟିରେ ଯାଉଥିଲେ। ଦ୍ରୁତଗତିରେ ଆସୁଥିବା କାର (ନଂ. ଓଡି୦୩ଜି୬୬୩୯) ପଛ ପଟରୁ ଆସି ସ୍କୁଟିକୁ ଧକ୍କା ଦେଇଥିଲା। ଘଟଣାସ୍ଥଳରେ ବିନୋଦିନୀଙ୍କ ମୃତ୍ୟୁ ହୋଇଥିବା ବେଳେ ଏମ୍ସରେ ଗୁରୁତର ଅବସ୍ଥାରେ ଚିକିତ୍ସାଧୀନ ଥିବା ଗୋକୁଳାନନ୍ଦଙ୍କ ମୃତ୍ୟୁ ଘଟିଥିଲା। ଧକ୍କା ଦେଇଥିବା କାର୍ଟିକୁ ପୋଲିସ ଜବତ କରିଥିବା ବେଳେ ଚାଳକ ଫେରାର ହୋଇଯାଇଥିଲେ। ଉଭୟ ମୃତଦେହକୁ ବ୍ୟବଚ୍ଛେଦ ଲାଗି କ୍ୟାପିଟାଲ ହସ୍ପିଟାଲକୁ ପଠାଇ ଦିଆଯାଇଛି। ସନ୍ଧ୍ୟା ହୋଇ ଯାଇଥିବାରୁ ଗୁରୁବାର ବ୍ୟବଚ୍ଛେଦ କରାଯିବ ବୋଲି ହସ୍ପିଟାଲ ସୂତ୍ରରୁ ପ୍ରକାଶ। ହେଲେ ସେମାନଙ୍କ ମୃତ୍ୟୁ ଅବସରକାଳୀନ ସମ୍ବର୍ଦ୍ଧନା ଉତ୍ସବକୁ ଫିକା ପକାଇ ଦେଇଥିଲା। ଉଭୟଙ୍କ ମୃତ୍ୟୁରେ ଶିକ୍ଷକ ମହଲ ଓ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳି ଯାଇଛି। ବିନୋଦିନୀ ବିଭିନ୍ନ ଶିକ୍ଷକ ସଂଘ ସହିତ ଜଡ଼ିତ ରହିବା ସହ ଜଟଣୀ ପୁସ୍ତକ ମେଳା, ଜଟଣୀ ସାହିତ୍ୟ ସଂସଦ, ବିପିନ ବିହାରୀ ପାଠାଗାର, ରେଲୱେ ସ୍କୁଲ ପୁରାତନ ବିଦ୍ୟାର୍ଥୀ ସଙ୍ଗଠନର ସକ୍ରିୟ ସଦସ୍ୟା ଥିଲେ। ସେ ଜଣେ ଲେଖିକା ଓ ଆଦର୍ଶ ଶିକ୍ଷୟିତ୍ରୀ ଭାବେ ପରିଚିତ ଥିଲେ। ଏହାଛଡ଼ା ଡାକ୍ତରୀ ଛାତ୍ରୀଛାତ୍ରଙ୍କ ଶିକ୍ଷା ଲାଗି ଏମ୍ସକୁ ପୂର୍ବରୁ ବିନୋଦିନୀ ତାଙ୍କ ଶରୀର ଦାନ କରିଥିଲେ। ଏ ସମ୍ପର୍କରେ ଏମ୍ସର ଜଣେ ଅଧିକାରୀଙ୍କ ସହ ଯୋଗାଯୋଗ କରିବାରେ ସେ କହିଥିଲେ, ଶିକ୍ଷୟିତ୍ରୀ ବିନୋଦିନୀଙ୍କ ମୃତ୍ୟୁଖବର ଆମ ପାଖରେ ପହଞ୍ଚତ୍ଛି। ଗୁରୁବାର ମୃତଦେହ ବ୍ୟବଚ୍ଛେଦ ପରେ ପରିବାର ଲୋକ ଆମକୁ ମୃତଦେହ ଦାନ ସମ୍ପର୍କରେ ଜଣାଇଲେ ଏମ୍ସର ଆମ୍ବୁଲାନ୍ସ ଯାଇ ଶରୀରକୁ ଆଣିବ। ସେହିପରି ଗୋକୁଳାନନ୍ଦ ଶିକ୍ଷକ ନେତା ଓ ଛାତ୍ରବତ୍ସଳ ଭାବେ ଏଠାରେ ବେଶ୍ ପରିଚିତ ଥିଲେ। ସେ ଜଟଣୀ ବରିଷ୍ଠ ନାଗରିକ ମଞ୍ଚ ସମେତ ବିଭିନ୍ନ ସାମାଜିକ ଓ ସାଂସ୍କୃତିକ ଅନୁଷ୍ଠାନ ସହିତ ଜଡ଼ିତ ଥିଲେ। ଏମାନଙ୍କ ମୃତ୍ୟୁରେ ଏଲିମେଣ୍ଟାରୀ ଶିକ୍ଷକ ସଂଘ ଜଟଣୀ ବ୍ଲକ ସଭାପତି କୈଳାସ ରାଉତ, ରବୀନ୍ଦ୍ର ମହାନ୍ତି, ତ୍ରିନାଥ ସାମନ୍ତରାୟ, ଗଗନ ଚନ୍ଦ୍ର ମଙ୍ଗରାଜ, ଓଡ଼ିଶା ପ୍ରାଥମିକ ଶିକ୍ଷକ ବିଦ୍ୟାଳୟ ସଂଘର ରାଜ୍ୟ ମହାସଚିବ ଜିତ୍ରଞ୍ଜନ ମହାପାତ୍ର, ଜଟଣୀ ବରିଷ୍ଠ ନାଗରିକ ମଞ୍ଚର ସାଧାରଣ ସମ୍ପାଦକ ରବୀନ୍ଦ୍ର ପ୍ରସାଦ ମିଶ୍ର, ଜଟଣୀ ସାହିତ୍ୟ ସଂସଦର ସଭାପତି ଶ୍ୟାମସୁନ୍ଦର ତ୍ରିପାଠୀ, ବିପିନ ବିହାରୀ ପାଠାଗାରର ଅଧ୍ୟକ୍ଷ ବିପିନ ବିହାରୀ ମହାନ୍ତି, ଓଷ୍ଟାର ଜଟଣୀ ବ୍ଲକ ପକ୍ଷରୁ କିଶୋର ସୁବୁଦ୍ଧି ପ୍ରମୁଖ ଶୋକ ପ୍ରକାଶ କରିଛନ୍ତି।