୧୭ ବଛର ହେଲା ଅଜନା ରୋଗ୍ରେ ପୀଡ଼ିତ ଅଷ୍ଟମୀ: ଅଭାବ ଅନାଟନରେ ଚେରମୂଲି ସାହାଭରସା
21 କୋକସରା, ୧୫ା୭(ଡି.ଏନ୍.ଏ): କଳାହାଣ୍ଡି ଜିଲା କୋକସରା ବ୍ଲକ କାଉଡ଼ୋଲା ପଁଚେତ୍ କୁସୁମଖୁଣ୍ଟି ଗାଁର ଚନ୍ଦ୍ରଶେଖର ମାଝିକଁର ମାଏକିନା ଅଷ୍ଟମୀ ମାଝି(୪୫)। ସେ ଅନେକ ବଛର ହେଲା କେହେନ୍ସି ଗୁଟେ ଅଜାନା ରୋଗ୍ରେ ଯୁଝୁଛନ୍। ହେଲେ ପରିବାରଟା ଅଭାବ ଅନାଟନରେ ପେସି ହେଉଥିଲାବେଲେ ଅଷ୍ଟମୀକଁର ଚିକିତ୍ସା ଚିନ୍ତା ସପନରେ ବି ଭାବି ନାଇଁ ପାରବାର।
ସୂଚନା ଅନ୍ସାରେ କୁସୁମଖୁଣ୍ଟି ଗାଁର ଚନ୍ଦ୍ରଶେଖର ମାଝି। ପରିବାର କହେଲେ ମାଏକିନା ଅଷ୍ଟମୀ, ୪ ଝି ଆର ବୁଢ଼ି ମା’କେ ନେଇ ତାକର ସଁସାର। ପରିବାରଟା ନିହାତି ଗରିବ୍ ହେଇଥିଲାବେଲେ ଫିଦିନ ଦୁଇମୁଠା ଖାଏବାର ଯୁଗାଡ଼ରେ ଲାଗି ରହୁଛନ୍। ଏନ୍ତାଥି ଅଷ୍ଟମୀ ଗଲା ୧୭ ବଛର ହେଲା କେହେନ୍ସି ଗୁଟେ ଅଜନା ରୋଗ୍ରେ ଯୁଝୁଛନ୍। ଚନ୍ଦ୍ରଶେଖର ବହୁତ ବଛର ଆଗ୍ରୁ ତାହାକୁ ନବରଙ୍ଗପୁର ମିଶନ ଡାକ୍ତରଖାନାରେ ଦେଖେଇଥିଲେ। ହେଲେ ସେଠାନେ ଡାକ୍ତର ଅଷ୍ଟମୀକୁଁ କେହେନ୍ସି ବଡ଼ ଡାକ୍ତରଖାନାକେ ନେଇ ଚିକିସତ୍ା କରବାକେ ପରାମଶ ଦେଇଥିଲେ। ଏନ୍ତାଥି ଚନ୍ଦ୍ରଶେଖର ମୁହୁଁକାନ ଶୁଖେଇ ଅଷ୍ଟମୀକୁଁ ଧରି ଘରକେ ଫିରି ଆଏଲେ। ଇଆଡ଼େ ଅଭାବ ଅନାଟନ ଲାଗି ଚନ୍ଦ୍ରଶେଖର ଅଷ୍ଟମୀକୁଁ ଚିକିସତ୍ା ଲାଗି କେହେନ୍ସି ବଡ଼ ଡାକ୍ତରଖାନା ନାଇଁ ନେଇପାରଲେ। ଘରେ ରଖି ଚେରମୂଲି ଉଷୋକଷା କଲେ। ହେଲେ ଗଲା ୭ ମାସ ହେବା ଅଷ୍ଟମୀ ଅତି ଦୁରବଲ ହେଇଯିବାର ସଂଗେ ଦିହିଟା ତାକର ଶୁଖିଯାଇ ହାଡ଼କଁକାଲି ଲେଖେଁ ଦିଶୁଛେ। ଏନ୍ତାଥି ସେ ଠିକ୍ସେ ଚାଲବୁଲ କରି ନାଇଁପାରବାର। ତାକର ଦିହେ କାଣା ବେମାର ଅଛେ ବି ପରୀକ୍ଷା ନିରୀକ୍ଷା ଅଭାବୁ ଜନା ନାଇଁ ପଡ଼ବାର। ଇଆଡ଼େ ଚନ୍ଦ୍ରଶେଖର ଗଲା ବଛର ଖଁଜ୍ଖାପ୍ କରି ବଡ଼ ଝି’କେ ବିହା କରିଛନ୍। ହେଲେ ଏହେଦେ ବି ତାକର ଉପରେ ୩ ବଢ଼ଲା ଝି’ ଆର ବୁଢ଼ିମାର ବୋଝ୍ ରହିଛେ। ଏନ୍ତାଥି ସେ ଅଷ୍ଟମୀକଁର ଚିକିସତ୍ା କଥା ଚିନ୍ତା ବି କରି ନାଇଁପାରବାର। ଫିଦିନ ସଖାଲ ପାଏଲେ କୁଲି ମଜୁରି କରି ଆନ୍ଲେ ଯାଇ ଘରର ଚୁଲି ଜଲୁଛେ। ଘରର ଏନ୍ତା ପରିସ୍ଥିତିରେ ୩ ଝି’ ଭିତରୁ ତୁଳସୀ ଆର ଅନା ମାଟ୍ରିକ ପାସକରି ପାଠ୍ପଢ଼ାରେ ଗଏଁଠ୍ ପକେଇଛନ୍। ଇଆଡ଼େ ପରିବାରକେ ମିଲୁଥିବାର ସରକାରୀ ସାହାଯ୍ କହେଲେ ମାସିକ ୩୦ କେ.ଜି. ଚାଉଲ ଆର ବୁଢ଼ି ମା’ ପାଉଥିବାର ୩ଶହ ଭତା ଟଁକା ସାହାଭରସା। ଏନ୍ତା ପରିସ୍ଥିତିରେ ଚନ୍ଦ୍ରଶେଖର ଉପେ ଶୂଇନ୍ ହେଇ ଗଣମାଧ୍ୟମ ଜରିଆରେ ଅଷ୍ଟମୀକଁର ଚିକିସତ୍ା ସାହାଯ୍ ଲାଗି ଜିଲା ପରଶାସନକେ ଗୁହାରି କରିଛନ୍। ଇ ବାବ୍ଦେ କୋକସରା ବିଡିଓ ବସନ୍ତ କୁମାର ସେଠିକୁଁ ପଚରାଲାରୁ ଘଟନା ବାବ୍ଦେ ମୋର ପାସେ ଖବର ନାଇଁଥାଇ। ଅଷ୍ଟମୀକଁର ଚିକିସତ୍ା ଲାଗି କୋକସରା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ଚିକିସତ୍ା ଅଧ୍କାରୀକଁର ସଂଗେ ଆଲୋଚନା କରି ଯେନ୍ଟା ହେବା ପଦକ୍ଷେପ ନିଆଯିବା ବଲି ସେ କହିଥିଲେ।