ଭୁବନେଶ୍ୱର,୧୩।୫(କ୍ରୀଡ଼ା ପ୍ରତିନିଧି)-କରୋନାଭାଇରସ୍ ସଂକ୍ରମଣଜନିତ ସ୍ଥିତିର ପୁଙ୍ଖାନୁପୁଙ୍ଖ ବିଶ୍ଳେଷଣ ପରେ ବ୍ୟୁରୋ ଅଫ୍ ଫିଫା କାଉନ୍ସିଲ ପକ୍ଷରୁ ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପର ନୂଆ ତାରିଖ ଘୋଷଣା ହୋଇଛି। ଭାରତର ୫ଟି ସ୍ଥାନରେ ହେବାକୁଥିବା ଏହି ପ୍ରତିଯୋଗିତା ୨୦୨୧ ଫେବୃୟାରୀ ୧୭ରୁ ମାର୍ଚ୍ଚ ୭ ମଧ୍ୟରେ ଅନୁଷ୍ଠିତ ହେବ। ଫିଫା କନ୍ଫେଡେରେଶନର କୋଭିଡ-୧୯ ୱାର୍କିିଂ ଗ୍ରୁପ୍ ଏହାକୁ ଅନୁମୋଦନ କରିଛି। ତେବେ ସମୟକ୍ରମେ ସ୍ଥିତିର ସମୀକ୍ଷା କରାଯିବ ବୋଲି ପ୍ରକାଶ କରାଯାଇଛି। ୨୦୦୩ ଜାନୁୟାରୀ ୧ରୁ ୨୦୦୫ ଡିସେମ୍ବର ୩୧ ମଧ୍ୟରେ ଜନ୍ମଗ୍ରହଣ କରିଥିବା ପିଲାମାନେ ଏଥିରେ ଭାଗ ନେଇପାରିବେ।
ୟୁଫା, କନକାଫ୍, କାଫ୍, ଓଏଫସି ଓ କନ୍ମେବୋଲ କ୍ବାଲିଫିକେଶନ ଟୁର୍ନାମେଣ୍ଟର ଟାଇମିଂକୁ ଦୃଷ୍ଟିରେ ରଖି ଫିିଫା ପକ୍ଷରୁ ଏହି ତାରିଖ ଧାର୍ଯ୍ୟ କରାଯାଇଛି। ସେ ସମୟରେ ଭାରତୀୟ ପରିବେଶକୁ ମଧ୍ୟ ଦୃଷ୍ଟିରେ ରଖା ଯାଇଛି। ”ଆମେ ଭାରତରେ ଏକ ସ୍ମରଣୀୟ ମହିଳା ଫୁଟବଲ ଟୁର୍ନାମେଣ୍ଟ ଆୟୋଜନ ଆଶା ରଖିଛୁ। ଦେଶରେ ମହିଳା ଫୁଟବଲର ବିକାଶ ପାଇଁ ଏହା ଉପଯୁକ୍ତ ପ୍ଲାଟ୍ଫର୍ମ“ ବୋଲି ସ୍ଥାନୀୟ ଆୟୋଜକ କମିିଟି ପକ୍ଷରୁ ପ୍ରକାଶ କରାଯାଇଛି। ଆୟୋଜନ ଅଧିକାର ପାଇଥିବା ସହରଗୁଡ଼ିକ ଟୁର୍ନାମେଣ୍ଟକୁ ସଫଳ କରିବା ଲାଗି ପ୍ରତିଶ୍ରୁତିବଦ୍ଧ। ନୂଆ ତାରିଖକୁ ଦୃଷ୍ଟିରେ ରଖି ସମସ୍ତେ ଆଗକୁ ବଢ଼ିବା ଆଶା ରହିଛି। ପ୍ରତି ଦଳର ସଦସ୍ୟ, ସପୋର୍ଟ ଷ୍ଟାଫ୍ ଏବଂ ଦର୍ଶକଙ୍କ ସ୍ବାସ୍ଥ୍ୟ ଏବଂ ସୁରକ୍ଷାକୁ ଦୃଷ୍ଟିରେ ରଖା ଯାଇଛି। ସ୍ଥାନୀୟ ଆୟୋଜକ କମିଟି(ଏଲଓସି) ଫିଫା ସହିତ ମିଶି କାର୍ଯ୍ୟ ଆଗକୁ ବଢ଼ାଇବ ଏବଂ ଏକ ସ୍ମରଣୀୟ ଏବଂ ସଫଳ ଟୁର୍ନାମେଣ୍ଟ ଭେଟିଦେବା ପାଇଁ ଦୃଢ଼ ପରିକର ବୋଲି ପ୍ରକାଶ କରାଯାଇଛିି। ପ୍ରକାଶ ଯୋଗ୍ୟ ଯେ, ଏହି ସମ୍ମାନଜନକ ପ୍ରତିଯୋଗିତା ପ୍ରକୃତରେ ୨୦୨୦ ନଭେମ୍ବର ୨ରୁ ୨୧ ପର୍ଯ୍ୟନ୍ତ ହେବାର ଥିଲା। ମାତ୍ର କୋଭିଡ୍-୧୯ ଯୋଗୁ ଏହାକୁ ସ୍ଥଗିତ ରଖାଯାଇଥିଲା। ପ୍ରତିଯୋଗିତା ଭୁବନେଶ୍ୱର ସମେତ କୋଲକାତା, ଗୁଆହାଟୀ, ଅହମ୍ମଦାବାଦ ଓ ନଭିମୁମ୍ବାଇରେ ଆୟୋଜିତ ହେବ।