ବାସୁଦେବପୁର, ୨୨ା୧୦(ଡି.ଏନ୍.ଏ.)- ଅଖିଳ ଭାରତ କୃଷକ ସଭା ବାସୁଦେବପୁର ଶାଖା ପକ୍ଷରୁ ମଙ୍ଗଳବାର ଚାଷୀଙ୍କ ୧୮ ଦଫା ଦାବି ପୂରଣ ଲାଗି ବିକ୍ଷୋଭ ଶୋଭାଯାତ୍ରା ଓ ପ୍ରତିବାଦ ସଭା କରାଯାଇଥିଲା। ଚାଷୀ, ମୂଲିଆ, ଗ୍ରାମ୍ୟ କାରିଗରଙ୍କୁ ୬୦ ବର୍ଷରେ ୩ ହଜାର ଟଙ୍କା ପେନ୍ସନ, କୃଷି ମନ୍ତ୍ରଣାଳୟର ନାମକୁ କୃଷି ଓ କୃଷକ କଲ୍ୟାଣ ମନ୍ତ୍ରଣାଳୟ ଭାବେ ନାମିତ କରିବା, ରାଜ୍ୟ ଓ କେନ୍ଦ୍ରରେ ସ୍ବତନ୍ତ୍ର କୃଷି ବଜେଟ ପ୍ରସ୍ତୁତି, ସାର୍ବଜନୀନ ଫସଲବୀମା ପ୍ରଚଳନ, ସ୍ବାମୀନାଥନ କମିଶନ ସୁପାରିସର କାର୍ଯ୍ୟକାରୀ କରିବାକୁ ଦାବି କରାଯାଇଛି। ଏଥିସହ ଜଳସେଚନ ପ୍ରକଳ୍ପକୁ କାର୍ଯ୍ୟକ୍ଷମ କରିବା, ଧାନ କୁଇଣ୍ଟାଲ ପିଛା ୩ ହଜାର ଟଙ୍କା ଧାର୍ଯ୍ୟ କରିବା, କାଳିଆ ଯୋଜନାରୁ ବାଦ୍ ପଡିଥିବା ଚାଷୀଙ୍କୁ ସହାୟତା ପ୍ରଦାନ, କୃଷି ଋଣଛାଡ କରିବା, ପ୍ରତି ପଞ୍ଚାୟତରେ ଧାନମଣ୍ଡି ଖୋଲିବା ଆଦି ୧୮ ଦଫା ଦାବି ପୂରଣ ଲାଗି ଅଖିଳ ଭାରତ କୃଷକ ସଭା ଦାବି କରିଛି। ଶତାଧିକ ଚାଷୀ ଶୋଭାଯାତ୍ରାରେ ସହର ପରିକ୍ରମା କରିବା ସହ ବିଭିନ୍ନ ସ୍ଲୋଗାନ ଦେଇ ବିକ୍ଷୋଭ ପ୍ରଦର୍ଶନ କରିଥିଲେ। ସରକାର ଏସବୁ ଦାବି ମାନିନେବାକୁ ସେମାନେ ଦାବି କରିଥିଲେ। ପରେ ବ୍ଲକ ପରିସରରେ କୃଷକ ସଭା ଆବାହକ ହରିହର ବେହେରାଙ୍କ ସଭାପତିତ୍ୱରେ ଏକ ପ୍ରତିବାଦ ସଭା ଅନୁଷ୍ଠିତ ହୋଇଥିଲା। ଏଥିରେ କୃଷକ ନେତା ବୈଲୋଚନ ଜେନା, କାହ୍ନୁଚରଣ ବେହେରା, ବଳରାମ ମହାନ୍ତି, ସୁବାସ ଚନ୍ଦ୍ର ଜେନା, ସୁରେନ୍ଦ୍ର ବେହେରା, ସୁଧାକର ଜେନା, ରାମକୃଷ୍ଣ କୁଅଁର ପ୍ରମୁଖ ସେମାନଙ୍କର ଦାବି ସମ୍ପର୍କରେ ମତ ରଖିଥିଲେ। କେନ୍ଦ୍ର ଓ ରାଜ୍ୟ ସରକାରଙ୍କ କୃଷକମାରଣ ନୀତିକୁ ଏହି ସଭାରେ ଦୃଢ଼ ବିରୋଧ କରାଯାଇଥିଲା। ପରେ ବିଡିଓ ପ୍ରଣବ କୁମାର ବେହେରାଙ୍କୁ ଏକ ଦାବିପତ୍ର ପ୍ରଦାନ କରାଯାଇଥିଲା।