କାଠମାଣ୍ଡୁ,୨୬।୯(ପି.ଟି)- ଏଠାରେ ଚାଲିଥିବା ୧୮ ବର୍ଷରୁ କମ୍ ସାଫ୍ ଚାମ୍ପିୟନଶିପ୍ରେ ଭାରତ ସେମିଫାଇନାଲରେ ପ୍ରବେଶ କରିଛି। ବୁଧବାର ଭାରତ ୩-୦ ଗୋଲରେ ଶ୍ରୀଲଙ୍କାକୁ ପରାସ୍ତ କରି ସେମିକୁ ଉଠିଛି। ଅନ୍ତିମ ଲିଗ୍ ମ୍ୟାଚ୍ରେ ଭାରତ ତରଫରୁ ଗୁର୍କୀରତ ସିଂ ଦୁଇଟି ଗୋଲ ସ୍କୋର କରି ବିଜୟରେ ମୁଖ୍ୟ ଭୂମିକା ଗ୍ରହଣ କରିଥିଲେ। ସେହିପରି ଅମନ ଛେତ୍ରୀ ଗୋଟିଏ ଗୋଲ ଦେଇଥିଲେ।
ମ୍ୟାଚ୍ ଆରମ୍ଭରୁ ଭାରତ ଆକ୍ରମଣାତ୍ମକ ଖେଳ ପ୍ରଦର୍ଶନ କରିଥିଲା। ତେବେ ପ୍ରଥମାର୍ଦ୍ଧରେ ଭାରତ ଗୋଲ ଦେଇପାରି ନ ଥିଲା। ପ୍ରଥମାର୍ଦ୍ଧ ଗୋଲଶୂନ୍ୟଭାବେ ଶେଷ ହୋଇଥିଲା। ଦ୍ୱିତୀୟାର୍ଦ୍ଧରେ ଭାରତ ଆହୁରି ପ୍ରଭାବ ବିସ୍ତାର କରି ଖେଳାବାକୁ ପ୍ରୟାସ କରିଥିଲା। ତେବେ ଭାରତ କୋତୋଟି ସୁଯୋଗ ହାତଛଡ଼ା କରିଥିଲା। ମ୍ୟାଚ୍ର ୬୫ତମ ମିନିଟ୍ରେ ଗୁରୁକିରାତ୍ ଏକ ସୁନ୍ଦର ଗୋଲ ଦେଇ ଭାରତ ପାଇଁ ଖାତା ଖୋଲିଥିଲେ। ଏହାପରେ ମ୍ୟାଚ୍ର ଅନ୍ତିମ ମୁହୂର୍ତ୍ତରେ ଗୁର୍କୀରତ ଓ ଅମନ ଗୋଲ ଦେଇ ଭାରତକୁ ବିଜୟୀ କରାଇଥିଲେ। ୩-୦ ବ୍ୟବଧାନରେ ବିଜୟୀ ହୋଇଥିବାରୁ ଭାରତ ସିଧାସଳଖ ସେମିଫାଇନାଲରେ ପ୍ରବେଶ କରିଥିଲା। ଉଲ୍ଲେଖଥାଉ କି, ପ୍ରଥମ ମ୍ୟାଚ୍ରେ ଭାରତ ବାଂଲାଦେଶକୁ ଭେଟିଥିଲା ଓ ଏହା ଗୋଲ୍ ଶୂନ୍ୟଭାବେ ଅମୀମାଂସିତ ରହିଥିଲା। ଏହି ମ୍ୟାଚ୍ରେ କଡ଼ା ସଂଘର୍ଷ ଦେଖିବାକୁ ମିଳିଥିଲା।
