ଜଗତ୍ସିଂହପୁର ଅଫିସ, ୧୭ା୨: ମାଟ୍ରିକ ପରୀକ୍ଷା ପୂର୍ବରୁ ଛାତ୍ରୀଛାତ୍ର ଚାପଗ୍ରସ୍ତ ହେଉଛନ୍ତି। ଏପରି କି କେତେଜଣ ମାନସିକ ଭାରସାମ୍ୟ ହରାଇ ଆତ୍ମହତ୍ୟା ଭଳି ପଦକ୍ଷେପ ନେବାକୁ ପଛାଉ ନାହାନ୍ତି। ଯାହାର ଜ୍ୱଳନ୍ତ ପ୍ରମାଣ ଦେଖିବାକୁ ମିଳିଛି ଜଗତ୍ସିଂହପୁର ଜିଲାରେ। ଜିଲାରେ ୧୫ ଦିନ ମଧ୍ୟରେ ୩ଜଣ ୧୦ମ ଶ୍ରେଣୀ ଛାତ୍ରୀ ଆତ୍ମହତ୍ୟା କରି ସାରିଲେଣି। ଏହା ପୂର୍ବରୁ ଅର୍ଥାତ୍ ଜାନୁୟାରୀ ମାସରେ ଜଣେ ଛାତ୍ରୀ ନିଖୋଜ ହୋଇ ଯାଇଥିଲେ। ସୌଭାଗ୍ୟ ପୋଲିସ ତାଙ୍କୁ ଉଦ୍ଧାର କରିଛି। ସମ୍ପୃକ୍ତ ନାବାଳିକା ତାଙ୍କ ପ୍ରେମିକଙ୍କ ସହ କୁଆଡେ ଚାଲି ଯାଇଥିବା ପୋଲିସ ଅନୁଧ୍ୟାନରୁ ଜଣାଯାଇଛି। କହିବାକୁ ଗଲେ ମାଟ୍ରିକ ପରୀକ୍ଷା ପୂର୍ବରୁ ଛାତ୍ରୀଛାତ୍ରଙ୍କ ମନରେ ବିଭିନ୍ନ ଆଡୁ ଭୟ ରହୁଛି। ଭଲ ମାର୍କ ରଖିବାକୁ କଠିନ ପରିଶ୍ରମ ପାଇଁ ଅଭିଭାବକଙ୍କ ତାଗିଦ୍, ଟ୍ୟୁଶନ୍ ବା କୋଚିଂ ସେଷ୍ଟରର ଚାପ, ପ୍ରେମ ଉପରେ ଭରସା ନ ରହିବା ଆଦି କାରଣରୁ ଜିଲାର ୩ ଛାତ୍ରୀଙ୍କ ମୃତ୍ୟୁ ହୋଇଥିବା ପୋଲିସର ପ୍ରାଥମିକ ତଦନ୍ତରୁ ଜଣାଯାଇଛି।
ଗତମାସ ୩୧ ତାରିଖରେ ସ୍ଥାନୀୟ ଚାଟରା ଗନ୍ତବସ୍ତିର ଜଣେ ୧୦ମ ଶ୍ରେଣୀ ଛାତ୍ରୀ ଆତ୍ମହତ୍ୟା କରିଥିଲେ। ସେ ସ୍ଥାନୀୟ ସରକାରୀ ବାଳିକା ଉଚ୍ଚ ବିଦ୍ୟାଳୟରେ ପଢୁଥିଲେ। ଛାତ୍ରୀଙ୍କ ମା’ଙ୍କ ୧୦ ବର୍ଷ ପୂର୍ବରୁ ଓ ବାପାଙ୍କ ୬ ମାସ ପୂର୍ବରୁ ମୃତ୍ୟୁ ହୋଇଛି। ଦାରିଦ୍ର୍ୟତାର କଷାକାଠିରେ ପ୍ରତି ମୁହୂର୍ତ୍ତ ଛଟଛଟ ହେଉଥିବା ନାବାଳିକାଙ୍କ ଉପରେ ଅନେକ ଚାପ ଥିଲା। ପ୍ରେମ ଯେଉଁଠି ଥିଲା ବିବାହ ଉପରେ ଭରସା ନ ଥିଲା। ସାନ ଭାଇର ଯନତ୍ଠାରୁ ଘରର ସମସ୍ତ ଦାହିତ୍ୱ ତାଙ୍କ ଉପରେ ନ୍ୟସ୍ତ ଥିଲା। ମାଟ୍ରିକ ପରୀକ୍ଷାର ଚାପ ମଧ୍ୟ ତାଙ୍କ ମାନସିକସ୍ଥିତିକୁ ଦୋହଲାଇ ଦେଇଥିଲା। ଯେଉଁ କାରଣରୁ ସେ ଆତ୍ମହତ୍ୟା କରିଥିବା ପୋଲିସ ତଦନ୍ତରୁ ଜଣାପଡିଛି। ସେହିପରି ଗତ ୧୧ ତାରିଖରେ ବାଲିକୁଦା ଥାନା ଚଷାପଡ଼ାର ଜଣେ ୧୪ ୧୦ମ ଶ୍ରେଣୀ ଛାତ୍ରୀ ଆତ୍ମହତ୍ୟା କରିଥିଲେ। ଏହି ମାମଲାରେ ଜଣାଯାଇଥିଲା ଯେ, ନାବାଳିକା ଜଣେ ଯୁବକଙ୍କୁ ଭଲ ପାଉଥିଲେ। ସମ୍ପୃକ୍ତ ଯୁବକଙ୍କ ସହ ତାଙ୍କର କିଛି ଦିନ ମୋବାଇଲ କଥାବାର୍ତ୍ତାରେ ବାଧା ସୃଷ୍ଟି ହୋଇଥିଲା। ଯୁବକଜଣକ ଶେଷକୁ ଆତ୍ମହତ୍ୟା କରି ଦେଇଥିଲେ। ଏହି ଖବର ପାଇ ନାବାଳିକା ଆତ୍ମହତ୍ୟା କରି ଦେଇଥିବା ପୋଲିସ ଜାଣିପାରିଛି। ଅନୁରୂପ ଭାବେ ଗତ ୧୫ ତାରିଖରେ ଜୟବଡ଼ରେ ଭଡାରେ ରହୁଥିବା ଜଣେ ଅଙ୍ଗନୱାଡ଼ି କର୍ମୀଙ୍କ ୧୦ମ ଶ୍ରେଣୀର ଝିଅ ଆତ୍ମହତ୍ୟା କରିଛନ୍ତି। ତାଙ୍କ ବାପା ଓ ମାଙ୍କ ମଧ୍ୟରେ ସମ୍ପର୍କ ସେଭଳି ନ ଥିଲା। ପ୍ରେମ ଓ ମାଟ୍ରିକ ପରୀକ୍ଷା ଚାପ ସମ୍ପୃକ୍ତ ଛାତ୍ରୀଙ୍କ ମାନସିକସ୍ଥିତିକୁ ଅସନ୍ତୁଳନ କରି ଦେବାରୁ ସେ ଆତ୍ମହତ୍ୟା କରି ଦେଇଥିବା ପୋଲିସ ତଦନ୍ତରୁ ଜାଣିପାରିଥିବା ଜଗତ୍ସିଂହପୁର ଆଇଆଇସି ରଜନୀକାନ୍ତ ମିଶ୍ର ସୂଚନା ଦେଇଛନ୍ତି।