ଦୁବାଇ, ୩୦ା୧ (ପି.ଟି.)-ଭାରତୀୟ ପେସ୍ ବୋଲର ଆକାଶ ସିଂଙ୍କୁ ଜାଣିଶୁଣି କହୁଣୀରେ ସ୍ପର୍ଶ କରିଥିବା ଅଭିଯୋଗରେ ଅଷ୍ଟ୍ରେଲିଆର ଓପନିଂ ବ୍ୟାଟ୍ସମ୍ୟାନ ସାମ୍ ଫ୍ୟାନିଂ ଦଣ୍ଡିତ ହୋଇଛନ୍ତି। ଦକ୍ଷିଣ ଆଫ୍ରିକାର ପୋଶ୍ଚେଫଷ୍ଟ୍ରୁମ୍ଠାରେ ୧୯ ବର୍ଷରୁ କମ୍ ଆଇସିସି ବିଶ୍ୱକପ୍ର ଏକ କ୍ୱାର୍ଟରଫାଇନାଲ ମ୍ୟାଚ ବେଳେ ଏହି ଘଟଣା ଘଟିଛି। ଫ୍ୟାନିଂ, ଖେଳାଳି ଏବଂ ଖେଳାଳିଙ୍କ ସହାୟକ କର୍ମଚାରୀଙ୍କ ଲାଗି ଉଦ୍ଦିିଷ୍ଟ ଆଇସିସି ଆଚରଣବିଧି ଲେଭଲ-୧ର ଉଲ୍ଲଂଘନ କରିଛନ୍ତି। ଏଥିଲାଗି ତାଙ୍କର ଦୁଇ ଡେମିରିଟ ପଏଣ୍ଟ ମିିଳିଛି। ଫ୍ୟାନିଂ ନିଜ ଦୋଷ ସ୍ବୀକାର କରିବା ସହ ୧୯ବର୍ଷରୁ କମ୍ ଆଇସିସି ବିଶ୍ୱକପ୍ ମ୍ୟାଚ ରେଫରି ଗ୍ରେମ୍ ଲାବରଏଙ୍କ ଦ୍ୱାରା ହୋଇଥିବା ଦଣ୍ଡ ବିଧାନଙ୍କୁ ଗ୍ରହଣ କରିଛନ୍ତି। ଅଷ୍ଟ୍ରେଲିଆର ଏହି ଖେଳାଳିଙ୍କ ବିରୋଧରେ ଫିଲ୍ଡ ଅମ୍ପାୟର ଆଡ୍ରିଆନ୍ ହୋଲ୍ଷ୍ଟକ୍ ଓ ଶାର୍ଫୁଦୋଲା ଇବନେ ଶାହିଦ୍, ତୃତୀୟ ଅମ୍ପାୟର ଓ୍ବେନ୍ ନାଇଟ୍ସ ଏବଂ ଚତୁର୍ଥ ଅମ୍ପାୟର ଆସିଫ ୟାକୁବ୍ ପ୍ରମୁଖ ଅଭିଯୋଗ ଆଣିଥିଲେ। ଅଷ୍ଟ୍ରେଲିଆର ରନ ଚେଜ୍ବେଳେ ୩୧ତମ ଓଭରର ପ୍ରଥ ବଲ୍ରେ ଏହି ଘଟଣା ଘଟିଥିଲା। ସେତେବେଳେ ଫ୍ୟାନିଂ ୪୮ରନ କରି ବ୍ୟାଟିଂ କରୁଥିଲେ ଏବଂ ବୋଲର୍ସ ଏଣ୍ଡ୍ କ୍ରିଜ୍ରେ ଥିଲେ। ଆକାଶ ତାଙ୍କ ବୋଲିଂ ବେଳେ ରନ୍ ଶେଷ କଲାବେଳେ ଫ୍ୟାନିଂ ତାଙ୍କୁ ଜାଣି ଶୁଣି କହୁଣୀ ମାରିଥିଲେ। ଏଥିରେ ବୋଲର ଜଣକ ଖରାପ ଅନୁଭବ କରିଥିବା ରିପ୍ଲେରେ ବାରିହୋଇଯାଉଥିଲା। ଅଷ୍ଟ୍ରେଲିଆର ୨୩୪ ରନ ଚେଜ୍ କରୁଥିବାବେଳେ ବିଜୟଠାରୁ ୭୪ରନ ପଛରେ ରହିଯାଇଥିଲା। ଟପ୍ ସ୍କୋରର ଫ୍ୟାନିଂ ୭୫ରନ କରିଥିଲେ।