ହାଇଦ୍ରାବାଦ,୧୬।୧୧(ପି.ଟି.)- ଓପନର ଯଶସ୍ବୀ ଜୟସୁଆଲଙ୍କ ଦମ୍ଦାର ଶତକ ସହାୟତାରେ ଏଠାରେ ଚାଲିଥିବା ୧୯ ବର୍ଷରୁ କମ୍ ଚ୍ୟାଲେଞ୍ଜର ଟ୍ରଫିରେ ଭାରତ ଏ’ ୭ ଉଇକେଟରେ ଭାରତ ସି’କୁ ହରାଇଛି। ଶୁକ୍ରବାର ସ୍ଥାନୀୟ ଆରଜିଆଇସି ଷ୍ଟାଡିୟମରେ ଖେଳାଯାଇଥିବା ମ୍ୟାଚ୍ରେ ପ୍ରଥମେ ବ୍ୟାଟିଂ କରି ଭାରତ ସି’ ୫୦ ଓଭରରେ ୭ ଉଇକେଟ ହରାଇ ୨୫୦ ରନ ସଂଗ୍ରହ କରିଥିଲା। ଦଳ ତରଫରୁ ଦିବ୍ୟାଂଶ ସାକସେନା ୮୯, କେ. କୁମାର ୪୦, ଡି. ସୌରଭ ଅପରାଜିତ ୫୧, ପି. ପ୍ରତ୍ୟୁଷ ୨୪ ରନ ସଂଗ୍ରହ କରିଥିଲେ। ବୋଲିଂରେ ଭାରତ ଏ ତରଫରୁ ଆକାଶ ଚାନ୍ଦ ୪ ଓ ଡି. ସାଗର ୨ ଉଇକେଟ ଅକ୍ତିଆର କରିଥିଲେ।
ଜବାବରେ ୨୫୧ ରନ ଟାର୍ଗେଟର ପିଛା କରି ଭାରତ ଏ’ ଜୟସ୍ବାଲଙ୍କ ଉପଯୋଗୀ ବ୍ୟାଟିଂ ବଳରେ ସହଜରେ ବିଜୟୀ ହୋଇଥିଲା। ଦଳ ତରଫରୁ ଜୟସ୍ବାଲ ୧୦୦ଟି ବଲର ସମ୍ମୁଖୀନ ହୋଇ ୧୫ ଚୌକା ଓ ୨ ଛକା ସହ ୧୦୮ ରନର ଶତକୀୟ ପାଳି ଖେଳିଥିଲେ। ସେହିପରି ସାଇ ଭରଦ୍ୱାଜ ଏସ୍ ୬୦ ରନ, ଜୟ ଗୋହିଲ ୪୩ ଓ ସମୀର ରିଜଭି ଅପରାଜିତ ୩୮ ରନ ସଂଗ୍ରହ କରି ଦଳକୁ ଜିତାଇଥିଲେ।
