କୋଲକାତା, ୧୮ା୬ (ପି.ଟି.)-ତ୍ରିପୁରାର ୧୯ ବର୍ଷରୁ କମ୍ ମହିଳା କ୍ରିକେଟ ଦଳର ଆୟନ୍ତୀ ରିଆଙ୍ଗ୍ ତାଙ୍କ ବାସଭବନରେ ଆତ୍ମହତ୍ୟା କରିଥିବା କୁହାଯାଉଛି। ତାଙ୍କର ଝୁଲନ୍ତା ମର ଶରୀରକୁ ତାଙ୍କ ପ୍ରକୋଷ୍ଠରୁ ଉଦ୍ଧାର କରାଯାଇଛି। ଏହି ୧୬ ବର୍ଷୀୟା କ୍ରିକେଟରଙ୍କ ମୃତ୍ୟୁର କାରଣ ସ୍ପଷ୍ଟ ହୋଇ ନାହିଁ। ପରିବାରର ସେ ଥିଲେ ସର୍ବକନିଷ୍ଠା। ଆୟନ୍ତୀ ତ୍ରିପୁରାର ୧୯ ବର୍ଷରୁ କମ୍ ଦଳ ତରଫରୁ ଏକ ବର୍ଷ ହେଲା ଖେଳି ଆସୁଥିଲେ। ୨୩ ବର୍ଷରୁ କମ୍ ବର୍ଗରେ ସେ ରାଜ୍ୟ ତରଫରୁ ଏକ ଟି୨୦ ଟୁର୍ନାମେଣ୍ଟ ଖେଳିଥିଲେ। ଅତୀତରେ ସେ ରାଜ୍ୟର ୧୬ ବର୍ଷରୁ କମ୍ ଦଳରେ ମଧ୍ୟ ପ୍ରତିନିଧିତ୍ୱ କରିଥିଲେ। ଆୟନ୍ତୀଙ୍କ ମୃତ୍ୟୁ ଖବରରେ ତ୍ରିପୂରା କ୍ରିକେଟ ଆସୋସିଏଶନ ସମ୍ପାଦକ ତିମିର ଚନ୍ଦା ଶୋକ ପ୍ରକାଶ କରିଛନ୍ତି। ମୃତ କ୍ରିକେଟରଙ୍କ ମାନସିକ ସ୍ବାସ୍ଥ୍ୟାବସ୍ଥା ସମ୍ପର୍କରେ ପଚରାଯିବାରେ ଚନ୍ଦା କହିଛନ୍ତି ଗତ ସିଜନ ପର୍ଯ୍ୟନ୍ତ ଆୟନ୍ତୀଙ୍କର କୌଣସି ସମସ୍ୟା ନ ଥିଲା। ଲକ୍ ଡାଉନ୍ ଯୋଗୁ ଆମେ କେତୋଟି ଅନ୍ଲାଇନ୍ କ୍ଲାସ୍ କରିଥିଲୁ। କିନ୍ତୁ ଆମେ ତାଙ୍କ ପାରିବାରିକ ସମସ୍ୟା ବିଷୟରେ କିଛି ଜାଣି ନାହୁଁ।