ଡାଭୋସ,୨୧-୧: ଭାରତର ୧% ଅତିଧନୀ ବ୍ୟକ୍ତି ବିଶେଷଙ୍କ ନିକଟରେ ଦେଶର ମୋଟ ସମ୍ପତ୍ତିର ସିଂହ ଭାଗ ଅଂଶ ରହିଛି। ଏମାନଙ୍କ ପାଖରେ ଦେଶର ୭୦% ଜନସଂଖ୍ୟାଙ୍କ ମୋଟ ସମ୍ପତ୍ତିର ୪ଗୁଣରୁ ଅଧିକ ସମ୍ପତ୍ତି ଥିବା ଜଣାପଡିଛି। ସେହିଭଳି ଭାରତୀୟ ବିଲିୟନେୟାରଙ୍କ ନିକଟରେ ଦେଶର ବାର୍ଷିକ ସାଧାରଣ ବଜେଟଠାରୁ ଅଧିକ ସମ୍ପତ୍ତି ରହିଥିବା ସୋମବାର ଏକ ରିପୋର୍ଟରେ ପ୍ରକାଶ ପାଇଛି। ଓ୍ବାର୍ଲଡ ଇକୋନୋମିକ ଫୋରମ(ଡବ୍ଲ୍ୟୁଇଏଫ୍)ର ୫୦ତମ ବାର୍ଷିକ ସମ୍ମିଳନୀ ପୂର୍ବରୁ ଅକ୍ସଫାମ୍ ଗ୍ରୁପର ଟାଇମ ଟୁ କେୟାର ଅଧ୍ୟୟନ ରିପୋର୍ଟ ପ୍ରକାଶ ପାଇଛି। ଏହି ଅବସରରେ ଅକ୍ସଫାମ ପକ୍ଷରୁ କୁହାଯାଇଛି ଯେ, ବିଶ୍ୱର ୨,୧୫୩ ବିଲିୟନେୟାର ବିଶ୍ୱର ୬୦% ଜନସଂଖ୍ୟା ବା ୪.୬% ବିଲିୟନଙ୍କ ନିକଟରେ ଥିବା ସମ୍ପତ୍ତିଠାରୁ ଅଧିକ ସମ୍ପତ୍ତି ହାସଲ କରିଛନ୍ତି।
ବିଶ୍ୱ ସ୍ତରରେ ଆର୍ଥତ୍କ ଅସମାନତା ବୃଦ୍ଧି ହେଉଥିବା ରିପୋର୍ଟରେ ଉଲ୍ଲେଖ କରାଯାଇଛି। ଗତ ଦଶନ୍ଧିରେ ବିଲିୟନେୟାରଙ୍କ ସଂଖ୍ୟା ବୃଦ୍ଧି ଘଟିଥିବା ଜଣାପଡିଛି। ଗତ ବର୍ଷ ଏମାନଙ୍କର ମୋଟ ସମ୍ପତ୍ତିରେ ବୃହତ୍ ପରିମାଣର ହ୍ରାସ ଘଟିଥିବା ନଜରକୁ ଆସିଥିଲା। ବିନା କୌଣସି ସୁଚିନ୍ତିତ ନୀତି ଦ୍ୱାରା ବିଶ୍ୱ ସ୍ତରରେ ବଢୁଥିବା ଅସମାନତାକୁ ଦୂର କରିବା ସମ୍ଭବ ହେବ ନାହିଁ। ମାତ୍ର କିଛି ଦେଶର ସରକାର ଏ ଦିଗରେ ଯୋଜନା ହାତକୁ ନେଉଥିବା ଅକ୍ସଫାମ ଇଣ୍ଡିଆର ସିିଇଓ ଅମିତାଭ ବେହାର କହିଛନ୍ତି। ଡବ୍ଲ୍ୟୁଇଏଫ୍ ସମିଟରେ ଚଳିତ ବର୍ଷ ଲିଙ୍ଗଗତ ଅସମାନତା ଏବଂ ଆୟ ଭଳି ବିଷୟ ସ୍ଥାନ ପାଇବ। ସମ୍ବିଧାନ ପ୍ରଦତ୍ତ ଆଇନର କ୍ଷୁର୍ଣ୍ଣତା, ଦୁର୍ନୀତି, ସାଧାରଣ ସାମଗ୍ରୀ ଏବଂ ସେବା ଦର ବୃଦ୍ଧି ଭଳି ବିଭିନ୍ନ ସମସ୍ୟା ସମ୍ପକରେ ଡବ୍ଲ୍ୟୁଇଏଫ ଏହାର ରିପୋଟରେ ଉଲ୍ଲେଖ କରିଛି।
ଗତ ୩ ଦଶନ୍ଧିରେ ବିଶ୍ୱ ସ୍ତରରେ ଅସମାନତା କମିଥିଲେ ମଧ୍ୟ ପ୍ରମୁଖ ଅର୍ଥନୀତିଗୁଡିକରେ ଘରୋଇ ଆୟ ଅସମାନତା ବଢିଛି। ରିପୋର୍ଟ ମୁତାବକ ଦେଶର ମହିଳା କର୍ମଚାରୀମାନେ ପ୍ରମୁଖ ଟେକ୍ନୋଲୋଜି ସିଇଓମାନେ ବର୍ଷକରେ ଲାଭ କରୁଥିବା ବେତନ ସହ ସମକକ୍ଷ ଆୟ କରିବା ଲାଗି ୨୨,୨୭୭ ବର୍ଷ ଲାଗିବ। ଏହି କମ୍ପାନୀଗୁଡିକରେ ଜଣେ ସିଇଓ ୧୦ ମିନିଟରେ ଯେତିକି ଆୟ କରନ୍ତି ଜଣେ ଘରେ କାମ କରୁଥିବା ମହିଳାଙ୍କୁ ତାହା ଆୟ କରିବାକୁ ଗୋଟିଏ ବର୍ଷ ଲାଗିବ ବୋଲି ରିପୋର୍ଟରେ କୁହାଯାଇଛି। ମହିଳା ଏବଂ ବାଳିକାମାନେ କରୁଥିବା ଅନପେଡ କେୟାର ଓ୍ବାର୍କର ମୂଲ୍ୟ ପ୍ରାୟ ୧୯ ଲକ୍ଷ କୋଟି ହେବ,ଯାହା ଦେଶର ଶିକ୍ଷା ବଜେଟର ପ୍ରାୟ ୨୦ ଗୁଣ ଅଧିକ। ଗ୍ଲୋବାଲ ସର୍ଭେ ମୁତାବକ ୨୨ ଅତିଧନୀଙ୍କ ନିକଟରେ ରହିଥିବା ସମ୍ପତ୍ତି ଆଫ୍ରିକାର ସବୁ ମହିଳାଙ୍କ ସମ୍ପତ୍ତିଠାରୁ ଅଧିକ। ମହିଳା ଏବଂ ବାଳିକାମାନେ ପ୍ରତିଦନି କରୁଥିବା ୧୨.୫ ବିଲିୟନ ଘଣ୍ଟା ଅନପେଡ କେୟାରଓ୍ବାର୍କର ବିଶ୍ୱକୁ ଯୋଗଦାନ ପ୍ରାୟ ୧୦.୮ ଟ୍ରିଲିୟନ ଡଲାର ହେବ ବୋଲି ରିପୋର୍ଟରେ ଉଲ୍ଲେଖ ରହିଛି।