ଅମରାବତୀ,୧୭।୪: ଦେଶରେ କରୋନା ଭାଇରସ ସଂକ୍ରମଣ ଦ୍ରୁତ ଗତିରେ ବଢି ଚାଲିଥିବାରୁ ଏବେ ଏହାର ଟେଷ୍ଟିଂ ଉପରେ ଗୁରୁତ୍ୱ ଦେଉଛନ୍ତି ଉଭୟ କେନ୍ଦ୍ର ଓ ବିଭିନ୍ନ ରାଜ୍ୟ ସରକାର। ଏହି କ୍ରମରେ ଶୁକ୍ରବାର ଆନ୍ଧ୍ରପ୍ରଦେଶ ସରକାର ଦକ୍ଷିଣ କୋରିଆରୁ ଆସିଥିବା ୧ ଲକ୍ଷ କୋଭିଡ-୧୯ ରାପିଡ ଟେଷ୍ଟିଂ କିଟ୍ ଗ୍ରହଣ କରିଛନ୍ତି। ଏହାଦ୍ୱାରା ଶୀଘ୍ର କରୋନା ଟେଷ୍ଟ କରାଯାଇ ପାରିବ ବୋଲି ଜଣାପଡିଛି। ଏକ ସ୍ପେଶାଲ ଚାଟର୍ଡ ବିମାନ ଏହି କିଟ୍ ଆଣି ଆନ୍ଧ୍ରପ୍ରଦେଶରେ ପହଞ୍ଚାଇଛି। ଏହା ପହଞ୍ଚିବା ପରେ ମୁଖ୍ୟମନ୍ତ୍ରୀ ଓ୍ବାଏସ୍ ଜଗନମୋହନ ରେଡ୍ଡି ଅମରାବତୀରେ ଥିବା ତାଙ୍କ କାର୍ଯ୍ୟାଳୟରେ ଏହା ପ୍ରଦର୍ଶନ କରିଛନ୍ତି। ଏହି ସମୟରେ ଉପ ମୁଖ୍ୟମନ୍ତ୍ରୀ ଆଲା କଲି କ୍ରିଷ୍ଣା ଶ୍ରୀନିବାସ, ଡିଜିପି ପ୍ରମୁଖ ଉପସ୍ଥିତ ଥିଲେ। ଏହି ରାପିଡ ଟେଷ୍ଟିଂ କିଟ୍ ମାଧ୍ୟମରେ ମାତ୍ର ୧୦ ମିନିଟ ମଧ୍ୟରେ କରୋନା ଟେଷ୍ଟ କରାଯାଇ ପାରିବ ବୋଲି କହିଛନ୍ତି ରାଜ୍ୟ ସ୍ବାସ୍ଥ୍ୟ ବିଭାଗର ସ୍ପେଶାଲ ଚିଫ୍ ସେକ୍ରେଟାରୀ ଡାକ୍ତର ଜଓ୍ବାହର ରେଡ୍ଡୀ।