ନୂଆଦିଲ୍ଲୀ,୧୫।୬: ରିଲାଏନ୍ସ ଇଣ୍ଡଷ୍ଟ୍ରିଜ ଏହାର ଡିଜିଟାଲ ୟୁନିଟ ଜିଓ ପ୍ଲାଟଫର୍ମ ଲାଗି ମାତ୍ର ୮ ସପ୍ତାହରେ ୧.୦୪ ଲକ୍ଷ କୋଟି ଟଙ୍କାର ନିବେଶ ହାତେଇଛି। ଶନିବାର ହୋଇଥିବା ଡିଲ୍ରେ ନିବେଶ ଫାର୍ମ ଟିପିଜି ଜିଓରେ ୪,୫୪୬ କୋଟି ଟଙ୍କା ନିବେଶ କରିବ ବୋଲି ଘୋଷଣା କରିଛି। ଏହା ଦ୍ୱାରା ଉକ୍ତ ଫାର୍ମ ଜିଓର ୦.୯୩% ଅଂଶଧନ ହାସଲ କରିବ। ସେହିଭଳି ପ୍ରାଇଭେଟ ଇକ୍ୱିଟି ଫାର୍ମ ଏଲ୍.କ୍ୟାଟରଟନ ଜିଓରେ ୧୮୯୪ କୋଟି ଟଙ୍କାର ନିବେଶ ଦ୍ୱାରା ୦.୩୯% ଅଂଶଧନ ହାସଲ କରିବ ବୋଲି ରିଲାଏନ୍ସ ପକ୍ଷରୁ ସୂଚନା ରହିଛି। ରିଲାଏନ୍ସ ବର୍ତ୍ତମାନ ସୁଦ୍ଧା ଜିଓ ପ୍ଲାଟଫର୍ମର ୨୨.୩୮% ଅଂଶଧନକୁ ବିକ୍ରି କରିଛି। ପ୍ରମୁଖ ନିବେଶକଙ୍କ ମଧ୍ୟରେ ଫେସବୁକ ମଧ୍ୟ ସାମିଲ ରହିଛି। ଜିଓ ପ୍ଲାଟଫର୍ମରେ ଟେଲିକମ କମ୍ପାନୀ ରିଲାଏନ୍ସ ଜିଓ ଇନଫୋକମ, ମ୍ୟୁଜିକ ଏବଂ ଭିଡିଓ ଷ୍ଟ୍ରିମି ଆପ୍ଲିକେଶନ ମଧ୍ୟ ସାମିଲ ରହିଛି। ଜିଓ ପ୍ଲାଟଫର୍ମର ଏଣ୍ଟରପ୍ରାଇଜେସ ଭାଲ୍ୟୁ ୫.୧୬ ଲକ୍ଷ କୋଟି ଟଙ୍କା ରହିଛି। ଏପ୍ରିଲ ୨୨ରେ ହୋଇଥିବା ଡିଲ୍ରେ ଜିଓରେ ଫେସବୁକ ୪୩, ୫୭୩ କୋଟି ଟଙ୍କା ନିବେଶ ନେଇ ଘୋଷଣା କରିଥିଲା। କରୋନା ମହାମାରୀ ଯୋଗୁ ବର୍ତ୍ତମାନ ସାରା ବିଶ୍ୱରେ ସଙ୍କଟ ଆସିଥିବା ବେଳେ ଜିଓ ଏଭଳି ବୃହତ୍ ନିବେଶ ସଂଗ୍ରହ କରିବାକୁ ସକ୍ଷମ ହୋଇଛି। ବିକ୍ରି ହୋଇଥିବା ମୋଟ ୨୨.୩୮% ଅଂଶଧନ ମଧ୍ୟରୁ ଫେସବୁକ ସର୍ବାଧିକ ୯.୯୯% ଅଂଶ ହାସଲ କରିଛି। ଏହାବାଦ ସିଲଭର ଲେକ ମୋଟ ୨ ପର୍ଯ୍ୟାୟରେ ୨.୦୮% ଅଂଶଧନ, କେକେଆର ଏବଂ ଭିଷ୍ଟା ଇକ୍ୱିଟି ପାର୍ଟନର ୨.୩୨% ଲେଖାଏ ଅଂଶଧନ, ଆବୁଧାବିର ସୋଭରେନ ଓ୍ବେଲ୍ଥ ଫଣ୍ଡ ମୁବାଦଲା ଇନଭେଷ୍ଟମେଣ୍ଟ କୋ ୧.୮୫% ଏବଂ ଗ୍ଲୋବାଲ ଇକ୍ୱିଟି ଫାର୍ମ ଜେନେରାଲ ଆଣ୍ଟଲାଣ୍ଟିକ ୧.୩୪% ଅଂଶଧନ ହାସଲ କରିଥିବା ଜଣାପଡିଛି।