ନୂଆଦିଲ୍ଲୀ,୨୯-୧୧: ଚଳିତ ସପ୍ତାହରେ ଲଗାତର ୨ ଦିନ ଦେଶର ପୁଞ୍ଜି ବଜାର କାରବାର ଉର୍ଦ୍ଧ୍ୱଗାମୀ ହେବା ଯୋଗୁ ନିବେଶକ ବେଶ ଲାଭବାନ ହୋଇଛନ୍ତି। ବୁଧବାର ଏବଂ ଗୁରୁବାର ଶେୟାର ବଜାରରେ ବେଶ ଉତ୍ସାହ ପରିଲକ୍ଷିତ ହେବା ଯୋଗୁ ନିବେଶକଙ୍କ ସମ୍ପତ୍ତି ୧.୮୭ ଲକ୍ଷ କୋଟି ବଢିଛି। ଗୁରୁବାର ବମ୍ବେ ଷ୍ଟକ ଏକ୍ସଚେଞ୍ଜର କାରବାର ନୂଆ ରେକର୍ଡ ସ୍ତରରେ ବନ୍ଦ ହୋଇଥିବା ଜଣାପଡିଛି। ଗୁରୁବାର କାରବାର ବନ୍ଦ ହେବା ବେଳକୁ ବମ୍ବେ ଷ୍ଟକ ଏକ୍ସଚେଞ୍ଜରେ ସୂଚୀଭୁକ୍ତ କମ୍ପାନୀଙ୍କ ବଜାର ପୁଞ୍ଜୀକରଣ ୧.୮୭ ଲକ୍ଷ କୋଟି ବଢି ୧,୫୫,୫୭,୪୮୪.୧୫ କୋଟି ଛୁଇଁଛି। ଏହି ସମୟରେ ସେନସେକ୍ସ ୩୦୮.୮୭ ପଏଣ୍ଟ ବଢିଛି।
ଜିଡିପି ଡାଟା ଶୁକ୍ରବାର ଘୋଷଣା ହେବାକୁ ଥିବା ସତ୍ତ୍ୱେ ପୁଞ୍ଜି ବଜାର ଉପରେ ଏହାର ପ୍ରଭାବ କମ୍ ରହିଛି। ବିଶ୍ୱ ବଜାରରୁ ନଗଦ ଦେଶର ପୁଞ୍ଜି ବଜାରକୁ ଆସିବା ଲାଗି ରହିଛି। ସେହିଭଳି ତୈଳ ଦରରେ ସ୍ଥିତାବସ୍ଥା,ଅର୍ଥନୀତି ଲାଗି ରିଜର୍ଭ ବ୍ୟାଙ୍କ ପଦକ୍ଷେପ ବଜାର ଉପରେ ଭଲ ପ୍ରଭାବ ପକାଇଛି। ବିତ୍ତୀୟ ଧାରାକୁ ସମ୍ଭାଳିବା ଲାଗି ସରକାରଙ୍କ ପ୍ରୟାସ ଏବଂ ଅର୍ଥନୀତିରେ ସୁଧାର ଆଣିବା ଲାଗି ସରକାରଙ୍କ ଯୋଜନା ଯୋଗୁ ବଜାର ଉପରେ ଭଲ ପ୍ରଭାବ ପକାଇଥିବା ଜିଓଜିତ ଫାଇନାନସିଆଲ ସର୍ଭିସେସର ମୁଖ୍ୟ ବିନୋଦ ନାୟାର କହିଛନ୍ତି। ୩୦ ଶେୟାର ବିଶିଷ୍ଟ ସୂଚକାଙ୍କରେ ପ୍ରାୟ ୧୭ଟି ଉଚ୍ଚରେ ରହି ବନ୍ଦ ହୋଇଛି। ବିଏସ୍ଇର ୧୨୮୩ କମ୍ପାନୀଙ୍କ ଭଲ କାରବାର ହାସଲ କରିଥିବା ବେଳେ ୧୨୦୧ର କାରବାର ଖସିଛି। ସେହିଭଳି ୧୯୬ର କାରବାର ଅପରିବର୍ତ୍ତିତ ରହିଛି। ବିଏସ୍ଇର ମିଡ୍ କ୍ୟାପ ଏବଂ ସ୍ମଲ କ୍ୟାପ ସୂଚୀ ଯଥାକ୍ରମେ ୦.୯୭% ଏବଂ ୦.୪୬% ଉଚ୍ଚରେ ରହି ବନ୍ଦ ହୋଇଥିବା ସୂଚନା ରହିଛି।
