କେନ୍ଦୁଝର, ୧୧ା୪ (ସ୍ବ.ପ୍ର.): କରୋନା ପାଇଁ ଶନିବାର କେନ୍ଦୁଝର କଲେଜ ରୋଡରେ ଲୋକଙ୍କ ଚଳପ୍ରଚଳ କମ୍ ଥାଏ। ଏହି ସମୟରେ ହଠାତ୍ ଏକ କୁକୁର ସ୍କୁଟିରେ ଯାଉଥିବା ଜଣେ ମହିଳାଙ୍କୁ ଅଟକାଇବାକୁ ଚେଷ୍ଟା କରିଥିଲା। ଏହା କେତେକ ଲୋକଙ୍କୁ ଚକିତ କରିଥିଲା। ମହିଳା ଜଣଙ୍କ ନ ଅଟକିବାରୁ କୁକୁର ପଛେ ପଛେ ଧାଇଁ ଧାଇଁ ତାଙ୍କ ଶାଢୀକୁ କାମୁଡି ଟାଣି ଅଟକାଇବାକୁ ଚେଷ୍ଟା କରିଥିଲା। ଏଥିରେ କୁକୁର ବିଫଳ ହେବାରୁ ଗାଡି ହ୍ୟାଣ୍ଡେଲରେ ଝୁଲୁଥିବା ତାଙ୍କ ଭ୍ୟାନିଟି ବ୍ୟାଗ୍କୁ କାମୁଡି ଅଟକାଇବାକୁ ଚେଷ୍ଟା କରିଥିଲା। ତେବେ କୁକୁରକୁ ଛାଡିଦେବାକୁ ସେ ଯେତେ କହିଲେ ମଧ୍ୟ ଶୁଣି ନ ଥିଲା। ରାସ୍ତାରେ ଯାଉଥିବା ଅନ୍ୟ ଲୋକମାନେ କୁକୁରଟି ତାଙ୍କୁ କାମୁଡିବାକୁ ଗୋଡାଉଥିବା ଭାବିଥିଲେ। ପରେ ଜଣାପଡିଥିଲା କୁକୁରଟି ତାର ୨ ବର୍ଷର ପୁରୁଣା ମାଲିକଙ୍କୁ ଚିହ୍ନିପାରି ଅଟକାଇବାକୁ ଚେଷ୍ଟା କରୁଛି। ମହିଳାଜଣକ ବିସ୍କୁଟ ଦେବା ପରେ କୁକୁର ଛାଡିଥିଲା।
ମହିଳାଙ୍କ ନାମ ଲିପିକା ଦାସ ପଟ୍ଟନାୟକ। ଘର କଲେଜ ରୋଡ। ସେ ସ୍ବଚ୍ଛ ସାଥୀ ଭାବେ କେନ୍ଦୁଝର ପୌରପାଳିକାରେ ୧୮ନଂ. ଓ୍ବାର୍ଡର ସ୍ବଚ୍ଛତା କାର୍ଯ୍ୟ ତଦାରଖ କରୁଛନ୍ତି। କୁକୁରଟି ଛୁଆ ବେଳଠୁଁ ତାଙ୍କ ଘରେ ରହିଥିଲା। ତେବେ ଦୁଇ ବର୍ଷ ଘରେ ରହିବା ପରେ କୌଣସି କାରଣରୁ ଘରୁ ପଳାଇଥିଲା। ଏଣୁ କୁକୁର ହଠାତ ଚିହ୍ନି ପାରି ତାଙ୍କ ଅଟକାଇଥିଲା। ସେ ତାଙ୍କୁ ପାଖ ଦୋକାନରୁ ବିସ୍କୁଟ କିଣି ଦେବା ପରେ ଛାଡିଥିଲା।