ବନ୍ତ, ୨୨।୧(ଡି.ଏନ.ଏ.)-ଭଦ୍ରକ ଜିଲା ବନ୍ତ ତହସିଲ ଅଧୀନ ବଡବର୍ଚ୍ଚିକୟାଁ ଉତ୍ତର ପାର୍ଶ୍ୱସ୍ଥ ବିଶଲକଣା, କୁସୁନନଗର ଆଦି ଅଞ୍ଚଳରୁ ଜଳ ନିଷ୍କାସନ ହେବାକୁ ଥିବା ମୁଖ୍ୟ ନାଳକୁ ମରାମତି କରାଯାଉ ନ ଥିବାରୁ ଦୟନୀୟ ପରିସ୍ଥିତି ସୃଷ୍ଟି ହୋଇଛି। ଫଳରେ ବଡବର୍ଚ୍ଚିକୟାଁ, ଜୟସିଂହପୁର ଓ କୁସୁନନଗର ଆଦି ଗ୍ରାମର ପ୍ରାୟ ୪୦୦ ଏକର ଚାଷଜମିରେ ପାଣି ପଶି ଫସଲ ନଷ୍ଟ ହେଉଥିବା ଚାଷୀମାନେ ଜିଲାପାଳଙ୍କଠାରେ ଅଭିଯୋଗ କରିଛନ୍ତି।
ଗତ ୨୦ବର୍ଷ ତଳେ ଭଦ୍ରକ କାଡା ଡିଭିଜନ ପକ୍ଷରୁ ଉପରୋକ୍ତ ଗ୍ରାମର ଚାଷଜମି ମଧ୍ୟ ଦେଇ ଏକ ନାଳ ନିର୍ମାଣ କରାଯାଇଥିଲା । ଏହି ନାଳର ଦୈଘ୍ୟ ପ୍ରାୟ ୭କି.ମି. ହେବ। ଏହି ନାଳ ଆନନ୍ଦପୁର ବ୍ୟାରେଜ୍ ଡିଭିଜନ୍, ସୋସୋ ବ୍ରାଞ୍ଚ୍ କେନାଲ ଆପ୍ତିରା ଗ୍ରାମଠାରୁ ବାହାରି ଭଦ୍ରକ-ଆଗରପଡ଼ା ପିଡବ୍ଲ୍ୟୁଡି ରାସ୍ତାକୁ ବିଶଲକଣା ଗ୍ରାମଠାରେ ଅତିକ୍ରମ କରି ବଡବର୍ଚ୍ଚିକୟାଁ, ଜୟସିଂହପୁର, କୁସୁନନଗର ଗ୍ରାମଦେଇ କାଉପୁର ପଞ୍ଚାୟତ ସାଳନ୍ଦୀ ନଦୀରେ ମିଶିଛି । ପ୍ରତ୍ୟେକ ବର୍ଷ ବର୍ଷାଦିନେ ଏହି ନାଳ ଯୋଗୁ ୪ଶହ ଏକର ଚାଷ ଜମିର ଧାନ ଫସଲ ନଷ୍ଟ ହୋଇଥାଏ । ବହୁ ଚାଷ ଜମି ପଡିଆ ପଡିଥାଏ। ବର୍ଷାଦିନେ ଆଗରପଡ଼ାଠାରୁ ୪ କି.ମି. ଏରିଆର ବର୍ଷା ଜଳ ଏହି ନିଷ୍କାସନ ନାଳ ଦେଇ ନିଷ୍କାସିତ ହୋଇଥାଏ । ଫଳରେ ନାଳର ଉଭୟ ପାର୍ଶ୍ୱରେ ଥିବା ଚାଷ ଜମି କ୍ଷତିଗ୍ରସ୍ତ ହୋଇଥାଏ । ଆଗରପଡ଼ା-ଭଦ୍ରକ ପିଡବ୍ଲ୍ୟୁଡି ରାସ୍ତାର ବିଶଲକଣା ଗ୍ରାମଠାରେ ରାସ୍ତାର ଉଭୟ ପାର୍ଶ୍ୱରେ କେତେକ ଗ୍ରାମବାସୀ ସଡକର ନୟନଯୋରିରେ ମାଟି ପକାଇ ଘର କରିବା ଦ୍ୱାରା ନୟନଯୋରି ତଳକୁ ପାଣି ନିଷ୍କାସିତ ନ ହୋଇ ସମସ୍ତ ବର୍ଷା ଜଳ ଏହି ନାଳରେ ଯାଇ ସାଳନ୍ଦୀ ନଦୀରେ ମିଶି ଥାଏ । ଫଳରେ ଏହି ନାଳର ଆଡିବନ୍ଧ ପାଣିରେ ବୁଡ଼ି ଚାଷ ଜମିରେ ପଶିଥାଏ । ଚାଷ ଜମିରେ ଏତେ ଅଧିକ ପାଣି ହୁଏ ଯେ, ଚାଷ କରିବା ସମ୍ଭବ ହୁଏ ନାହିଁ । ପ୍ରତ୍ୟେକ ବର୍ଷ ଚାଷ ଜମିରେ ଦୁଇରୁ ତିନି ଥର ଧାନ ରୁଆଯାଇଥାଏ। ଅଧିକାଂଶ ଚାଷ ଜମିକୁ ଚାଷୀମାନେ ବାଧ୍ୟହୋଇ ପଡିଆ ରଖିଥାନ୍ତି । ଏହି ନାଳ ଦୀର୍ଘ ୨୦ବର୍ଷ ହେବ ମରାମତି କରାଯାଉ ନ ଥିବାରୁ ନାଳର ଦୁଇ ପାର୍ଶ୍ୱ ଆଡିବନ୍ଧ ଓ ପାଦଚଲା ପୋଲ ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ବର୍ଷାଦିନେ ଏହି ନାଳ ପାର ହେବା ପାଇଁ ଲୋକମାନେ ସମସ୍ୟାରେ ପଡୁଛନ୍ତି । ଏହି ସମସ୍ୟାର ସମାଧାନ ପାଇଁ ଆଗରପଡ଼ା-ଭଦ୍ରକ ପିଡବ୍ଲ୍ୟୁଡି ରାସ୍ତାର ବିଶଲକଣାଠାରେ ନୟନଯୋରିକୁ ସଫା କରିବା ସହ ଭଦ୍ରକ କାଡା ଡିଭିଜନ ପକ୍ଷରୁ ଉକ୍ତ ନାଳକୁ ପୁନଃ ମରାମତି କରାଇବାକୁ ଚାଷୀମାନେ ଦାବି କରିଛନ୍ତି । ଏ ସମ୍ପର୍କରେ ଭଦ୍ରକ କାଡା ବିଭାଗର କନିଷ୍ଠଯନ୍ତ୍ରୀ ବରେନ୍ଦ୍ର କୁମାର ବିଶ୍ୱାଳଙ୍କ ଦୃଷ୍ଟି ଆକର୍ଷଣ କରାଯିବାରୁ ସେ କହିଛନ୍ତି ଯେ, ଖୁବ୍ଶୀଘ୍ର କାର୍ଯ୍ୟନିର୍ବାହୀ ଯନ୍ତ୍ରୀ ଘଟଣାସ୍ଥଳ ପରିଦର୍ଶନ କରିବା ପରେ ପଦକ୍ଷେପ ନେବେ।