ସୋନପୁର,୨୨।୪(ନି.ପ୍ର.) – ଲକ୍ଡାଉନ୍ ସମୟରେ ସରକାରୀ ମଦ ଦୋକାନ(ଦେଶୀ ଓ ବିଦେଶୀ) ବନ୍ଦ ରହିଛି। ଏହା ସୁବର୍ଣ୍ଣପୁର ଜିଲାର ଚୋରା ମଦ ବ୍ୟବସାୟୀଙ୍କୁ ବେଶ୍ ସୁହାଉଛି । ଜଙ୍ଗଲରେ ବ୍ୟାପକ ଭାବେ ଦେଶୀ ମଦ ପ୍ରସ୍ତୁତ ହୋଇ ତମାମ ଜିଲାରେ ଖୁଲମ ଖୋଲା ବିକ୍ରି ହେଉଛି। ଉଲୁଣ୍ଡା ଥାନା ପତ୍ରାପାଲି ଜଙ୍ଗଲ ଅଞ୍ଚଳରେ ଦେଶୀ ମଦ ପ୍ରସ୍ତୁତ ହେଉଥିବା ବେଳେ ବୀରମହାରାଜପୁର ଅବକାରୀ ଉପନିରୀକ୍ଷକ ରମ୍ଭା ବାଗଙ୍କ ନେତୃତ୍ୱରେ ଟିମ୍ ମଙ୍ଗଳବାର ଚଢାଉ କରିଛି। ସେଠାରେ ବ୍ୟାପକ ଭାବେ ଦେଶୀ ମହୁଲି ମଦ ପ୍ରସ୍ତୁତି ହେଉଥିଲା। ବିଭାଗ ପକ୍ଷରୁ ୨୦୦ଲିଟର ମଦ ଜବତ କରାଯିବା ସହ ୨ କୁଇଣ୍ଟାଲ ପୋଚ ନଷ୍ଟ କରାଯାଇଛି। ସେହିପରି ମଦ ରନ୍ଧା ପାଇଁ ବ୍ୟବହୃତ ଆଲୁମିନିୟମ ହାଣ୍ଡି ଓ ପ୍ଲାଷ୍ଟିକ୍ ଡ୍ରମ୍ ଗୁଡିକୁ ଜବତ କରାଯାଇଛି। ମାତ୍ର ଅଭିଯୁକ୍ତଙ୍କୁ ଗିରଫ କରାଯାଇ ପାରିନି। ସେମାନେ ଖସି ପଳାଇଥିଲେ। ପ୍ରକାଶ ଯେ, ମଦ ବ୍ୟବସାୟୀମାନେ ଜଙ୍ଗଲକୁ ନିରାପଦ ସ୍ଥାନ ଭାବି ନାଳ, ଝରଣା ନିକଟରେ ମଦ ରାନ୍ଧୁଛନ୍ତି । ବିଶ୍ୱସ୍ତ ସୂତ୍ରରୁ ସୂଚନା ପାଇବା ପରେ ଅବକାରୀ ଅଧିକ୍ଷକ ସାମୁଏଲ ଏକ୍କାଙ୍କ ନିର୍ଦ୍ଦେଶକ୍ରମେ ଏହି ଚଢାଉ ହୋଇଥିଲା ।