ନୂଆଦିଲ୍ଲୀ,୪-୮: ଦେଶର ୨ ହଜାର ରେଳ ଷ୍ଟେଶନରେ ମାଗଣା ଓ୍ବାଇ-ଫାଇ ଆରମ୍ଭ କରାଯାଇଛି। ଶନିବାର ଜଣେ ବରିଷ୍ଠ ଅଧିକାରୀ ଏ ସମ୍ପର୍କରେ ସୂଚନା ଦେଇଛନ୍ତି। ରାଜସ୍ଥାନର ଆଜମେର ଡିଭିଜନର ରାଣା ପ୍ରତାପ ନଗର ରେଳ ଷ୍ଟେଶନ ମାଗଣା ଓ୍ବାଇ-ଫାଇ ସେବା ଯୋଗାଇବାରେ ୨ହଜାର ତମ ଷ୍ଟେଶନ ହୋଇଛି ବୋଲି ରେଲଟେଲ୍ ସିଏମ୍ଡି ପୁନୀତ ଚାଓ୍ବଲା ଶନିବାର କହିଛନ୍ତି। ରେଳ କର୍ମଚାରୀମାନେ ଦିନରାତି କାର୍ଯ୍ୟରେ ଲାଗି ପଡିବା କାରଣରୁ ଓ୍ବାଇ-ଫାଇ ସେବା ବିସ୍ତାର ଦ୍ରୁତଗତିରେ ଆଗେଇ ଚାଲିଛି ବୋଲି ସେ କହିଛନ୍ତି। ଶୁକ୍ରବାର ୭୪ ଷ୍ଟେଶନରେ ଏହି ବ୍ୟବସ୍ଥା ଏକାସାଙ୍ଗରେ ଆରମ୍ଭ କରାଯାଇଥିଲା। ରେଳ ଷ୍ଟେଶନର ଡିଜିଟାଲିକରଣ କରିବା ଲକ୍ଷ୍ୟରେ ରେଲ୍ଟେଲ୍ ପକ୍ଷରୁ ଷ୍ଟେଶନ ଗୁଡ଼ିକରେ ଓ୍ବାଇ-ଫାଇ ବ୍ୟବସ୍ଥା ଲାଗୁ କରାଯାଉଛି। ପ୍ରଥମ ପର୍ଯ୍ୟାୟରେ ୧୬୦୦ ଷ୍ଟେଟନକୁ ଏହି ବ୍ୟବସ୍ଥା ସହ ଯୋଡାଯାଇଥିଲା। ଇଣ୍ଟରନେଟ ଯୋଗାଣ ଲାଗି ରେଲ୍ଟେଲ୍ ଇତିମଧ୍ୟରେ ଟାଟା ଟ୍ରଷ୍ଟ ସହ ଚୁକ୍ତି କରିଛି।