ମୁମ୍ବାଇ,୯-୬: ଦେଶରେ ଏଟିଏମ୍ ସଂଖ୍ୟା ୨୦୧୭ ତୁଳନାରେ ୨୦୧୯ରେ କମିଛି ବୋଲି ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ) ରିପୋର୍ଟରେ ପ୍ରକାଶ କରାଯାଇଛି। ୨୦୧୯ରେ ଏହି ସଂଖ୍ୟା ୫୯୭ କମିଛି ବୋଲି କୁହାଯାଇଛି। ୨୦୧୭ ଶେଷରେ ଦେଶରେ ଏଟିଏମ୍ ସଂଖ୍ୟା ୨,୨୨,୩୦୦ ଥିଲା ବେଳେ ଚଳିତ ବର୍ଷ ମାର୍ଚ୍ଚ ସୁଦ୍ଧା ଏହା ହ୍ରାସ ପାଇ ୨,୨୧,୭୦୩ ରହିଛି। ‘ବେଞ୍ଚମାର୍କିଙ୍ଗ୍ ଇଣ୍ଡିଆ ପେମେଣ୍ଟ ସିଷ୍ଟମ’ ନାମରେ ଆର୍ବିଆଇ ରିପୋର୍ଟ ଜାରି କରାଯାଇଛି। ରିପୋର୍ଟରୁ ଏହା ମଧ୍ୟ ଜଣାପଡିଛି ଯେ, ଦେଶରେ ନଗଦ କାରବାର ଯେତିକି ହେଉଛି, ସେହି ତୁଳନାରେ ଏଟିଏମ୍ ବ୍ୟବହାର ହେଉ ନାହିଁ। ବର୍ତ୍ତମାନ ଦେଶରେ ଏଟିଏମ୍ ସଂଖ୍ୟା ଧିରେ ଧିରେ ହ୍ରାସ ପାଉଥିଲେ ହେଁ ୨୦୧୨ରୁ ୨୦୧୭ ମଧ୍ୟରେ ଏହାର ପ୍ରତିଷ୍ଠା ଗତି ଚାଇନା ପଛକୁ ଥିଲା। ବିଶ୍ଲେଷଣରୁ ଜଣାପଡିଛି ଯେ, ୨୦୧୨ରୁ ୨୦୧୭ ମଧ୍ୟରେ ଏଟିଏମ୍ ପ୍ରତିଷ୍ଠା ପ୍ରାୟ ଦ୍ୱିଗୁଣା ହୋଇଥିଲା। ୨୦୧୨ରେ ୧୦,୮୩୨ ଲୋକଙ୍କ ପାଇଁ ଗୋଟିଏ ଏଟିଏମ୍ ଥିଲା ବେଳେ ୨୦୧୭ରେ ଏହା ୫୯୧୯କୁ ଖସି ଆସିଥିଲା।