ଲଉସେନ,୧୪।୧୨(ପି.ଟି.)- ୨୦୨୦ ବର୍ଷ ପାଇଁ ଅନ୍ତର୍ଜାତୀୟ ହକି ଫେଡେରେଶନ (ଏଫ୍ଆଇଏଚ୍) ଶୁକ୍ରବାର ନୂଆ ବିଶ୍ୱ ର଼୍ୟାଙ୍କିଙ୍ଗ୍ ପ୍ରଣାଳୀ ଆରମ୍ଭ କରିବ। ତେବେ ଏହି ର଼୍ୟାଙ୍କିଙ୍ଗ୍ ମ୍ୟାଚ୍ ଉପରେ ପର୍ଯ୍ୟବସିତ ହେବ। ପୂର୍ବରୁ ଟୁର୍ନାମେଣ୍ଟକୁ ଦୃଷ୍ଟିରେ ରଖି ର଼୍ୟାଙ୍କିଙ୍ଗ୍ ପ୍ରକାଶିତ ହେଉଥିଲା। ଏହା ଦ୍ୱାରା ଦଳଗୁଡିକର ସଦ୍ୟ ପ୍ରଦର୍ଶନକୁ ଭିତ୍ତିକରି ର଼୍ୟାଙ୍କିଙ୍ଗ୍ ସ୍ଥିରୀକୃତ ହେବ ବୋଲି ଏଫ୍ଆଇଏଚ୍ ତରଫରୁ କୁହାଯାଇଛି।
ଆସନ୍ତାବର୍ଷ ଜାନୁୟାରୀ ୨ ତାରିଖରୁ ଏହି ନୂଆ ପ୍ରଣାଳୀ ଲାଗୁ ହେବ। ଗତ ୧୨ ମାସର ନିରବଚ୍ଛିନ୍ନ କଷ୍ଟସାଧ୍ୟ ରିସର୍ଚ, ଆନାଲିସିସ୍ ଓ ଟେଷ୍ଟିଂ ପରେ ଯାଇ ଏହି ନୂଆ ବିଶ୍ୱ ର଼୍ୟାଙ୍କିଙ୍ଗ୍ ପ୍ରଣାଳୀ ଲାଗୁ ହେବାକୁ ଯାଉଛି ବୋଲି ଏଫ୍ଆଇଏଚ୍ ତରଫରୁ କୁହାଯାଇଛି। ଚଳିତ ର଼୍ୟାଙ୍କିଙ୍ଗ୍ ପ୍ରଣାଳୀ ୨୦୦୩ରୁ ଲାଗୁ ହୋଇ ଆସୁଥିଲା। ବିଭିନ୍ନ ଟୁର୍ନାମେଣ୍ଟ ପରେ ଯାଇ ର଼୍ୟାଙ୍କିଙ୍ଗ୍ ପ୍ରକାଶିତ ହେଉଥିଲା। ଫଳରେ ଗୋଟିଏ ବର୍ଷରେ ଦେଶ ତଥା ଦଳଗୁଡିକ ଦୁଇ କିମ୍ବା ୩ଥର ର଼୍ୟାଙ୍କିଙ୍ଗ୍ ପଏଣ୍ଟ ହାସଲ କରୁଥିଲେ। ର଼୍ୟାଙ୍କିଙ୍ଗ୍ ପ୍ରଣାଳୀରେ ପରିବର୍ତ୍ତନ ପାଇଁ ଏକାଧିକ ପ୍ରତିବନ୍ଧ ରଖାଯାଇଛି ବୋଲି ଏଫ୍ଆଇଏଚ୍ ତରଫରୁ କୁହାଯାଇଛି। ପୁରୁଣା ନିୟମରେ ଲୋ ର଼୍ୟାଙ୍କ୍ର ଦଳଗୁଡିକ ପଏଣ୍ଟ ହାସଲ କରିବାରେ ସୀମିତ ସୁଯୋଗ ରହୁଥିଲା। ପ୍ରକୃତରେ ୬୦ ପ୍ରତିଶତ ହକି ମ୍ୟାଚ୍ର କୌଣସି ର଼୍ୟାଙ୍କିଙ୍ଗ୍ ପଏଣ୍ଟ ନ ଥିଲା। ଏବେ କିନ୍ତୁ ଏଥିରେ ପରିବର୍ତ୍ତନ ଆସିବ ବୋଲି ଏଫଆଇଏଚ୍ କହିଛି। ନୂଆ ପ୍ରଣାଳୀରେ ଦୁଇ ଦଳ ମଧ୍ୟରେ ଏଫ୍ଆଇଏଚ୍ ସ୍ବୀକୃତିପ୍ରାପ୍ତ ଯେକୌଣସି ମ୍ୟାଚ୍ରେ ପଏଣ୍ଟ ଅଦଳବଦଳ ହେବାର ବ୍ୟବସ୍ଥା ରହିଛି। ପଏଣ୍ଟ ଅଦଳବଦଳରେ ୩ଟି ଜିନିଷ ଯଥା ମ୍ୟାଚର ଫଳାଫଳ, ଦଳଗୁଡିକର ତୁଳନାତ୍ମକ ର଼୍ୟାଙ୍କିଙ୍ଗ୍ ଓ ମ୍ୟାଚ୍ ଗୁରୁତ୍ୱକୁ ଦୃଷ୍ଟିରେ ରଖାଯିବ। ଗୋଟିଏ ବର୍ଷର ଲମ୍ବା ଟ୍ରାଏଲ ପରେ ଏହି ନୂଆ ର଼୍ୟାଙ୍କିଙ୍ଗ୍ ସିଷ୍ଟମ ଲାଗୁ ହେବାକୁ ଯାଉଛି। ତେବେ ଲାଗୁ ହେବାକୁ ଥିବା ନୂଆ ସିଷ୍ଟମରେ ଦଳଗୁଡିକ ଅଧିକାର କରିଥିବା ଏବେକାର ସ୍ଥାନରେ କୌଣସି ପରିବର୍ତ୍ତନ ହେବ ନାହିଁ। ଅର୍ଥାତ ୨୦୧୯ ଶେଷରେ ଦଳଗୁଡିକ ହାସଲ କରିଥିବା ର଼୍ୟାଙ୍କିଙ୍ଗ୍ ପଏଣ୍ଟରୁ ନୂଆ ପ୍ରଣାଳୀ ଆରମ୍ଭ ହେବ। ନୂଆ ର଼୍ୟାଙ୍କିଙ୍ଗ୍ ପ୍ରଣାଳୀରେ ଏଫ୍ଆଇଏଚ୍ର ସଭ୍ୟ ଦେଶଗୁଡିକୁ ନୂଆ ସୁଯୋଗ ଦେବାକୁ ଆମର ପ୍ରୟାସ ସବୁବେଳେ ଜାରି ରହିବ ବୋଲି ଏଫ୍ଆଇଏଚ୍ ସ୍ପୋଟର୍ସ ଆଣ୍ଡ ଡେଭଲପ୍ମେଣ୍ଟ ଡାଇରେକ୍ଟର ଜନ ଓ୍ବାଟ୍ କହିଛନ୍ତି। ନୂଆ ର଼୍ୟାଙ୍କିଙ୍ଗ୍ ପ୍ରଣାଳୀକୁ ନିରପେକ୍ଷ ଓ ସଠିକ କରିବାକୁ ବ୍ୟବସ୍ଥା ଗ୍ରହଣ କରାଯାଇଛି ଓ ଏଥିପାଇଁ ଆଗକୁ ମଧ୍ୟ ପ୍ରୟାସ ଜାରି ରହିବ ବୋଲି ସେ କହିଛନ୍ତି।