ନୂଆଦିଲ୍ଲୀ,୨୩-୧୨: ଦେଶରେ ଜିଡିପି ଅଭିବୃଦ୍ଧି ୬ ବର୍ଷର ସର୍ବନିମ୍ନ ସ୍ତର ୪.୫%କୁ ଖସିଥିବା ବେଳେ ଚଳିତ ନିଯୁକ୍ତି ପ୍ରଭାବିତ ସ୍ଥିତିରେ ରହିଛି। ଏହି ଧାରାରେ ଆସନ୍ତା ବର୍ଷ ମଧ୍ୟ ପରିବର୍ତ୍ତନ ଆସି ନ ପାରେ। ୨୦୨୦ରେ ନିଯୁକ୍ତି ବୃଦ୍ଧି ସମ୍ଭାବନା କ୍ଷୀଣ ରହିଥିବା ବଜାର ବିଶେଷଜ୍ଞମାନେ କହିଛନ୍ତି। ଆଗାମୀ ବର୍ଷ ମଧ୍ୟ କମ୍ପାନୀଗୁଡିକର ଶ୍ରମଶକ୍ତି ନିଯୁକ୍ତିରେ ମନ୍ଥର ଅବସ୍ଥା ଲାଗି ରହିବା ସହ ବେତନ ମଧ୍ୟ ଏତେଟା ବୃଦ୍ଧି ହେବନି ବୋଲି କୁହାଯାଉଛି। କମ୍ପାନୀଗୁଡିକ ନୂଆ ନିଯୁକ୍ତି ଦେବା ପରିବର୍ତ୍ତେ ସେମାନଙ୍କ ନିକଟରେ କାର୍ଯ୍ୟରତ କର୍ମଚାରୀଙ୍କ କୌଶଳରେ ବିକାଶ ଲାଗି ଅଧିକ ଧ୍ୟାନ କେନ୍ଦ୍ରିତ କରୁଛନ୍ତି। ଶିଳ୍ପ ଜଗତରେ ଟେକ୍ନୋଲୋଜି ଗ୍ରହଣ ଧାରା ଏବେ ତ୍ୱରାନ୍ବିତ ହୋଇଛି। ଏଭଳି ସ୍ଥିତିରେ କମ୍ପାନୀ ନୂଆ ନିଯୁକ୍ତି ଦେବା ବେଳେ ବିଭିନ୍ନ ସତର୍କତା ଅବଲମ୍ବନ କରୁଛନ୍ତି।
ଇଣ୍ଡିଆନ ଷ୍ଟାଫିଙ୍ଗ ଫେଡେରେଶନର ଅଧ୍ୟକ୍ଷ ଋତୁପର୍ଣ୍ଣା ଚକ୍ରବର୍ତ୍ତୀ କହିଛନ୍ତି ଯେ, ରୋଜଗାର ଦୃଷ୍ଟିକୋଣରୁ ସ୍ଥିର କିମ୍ବା ମାମୁଲି ସୁଧାର ଆସିବ। ଦେଶର ଜିଡିପି ଏବେ ମଧ୍ୟ ଉନ୍ନତ ସ୍ଥିତିରେ ନ ଥିବାରୁ ବିଭିନ୍ନ କ୍ଷେତ୍ରରେ ସମସ୍ୟା ଦେଖା ଯାଉଛି। ନିବେଶ ଏବଂ ଚାହିଦାରେ ଏହି ସମୟରେ କିଭଳି ବୃଦ୍ଧି ଘଟୁଛି ତାହା ଦେଖିବାକୁ ବାକି ରହିଲା। ଯଦି ଏହି ସ୍ଥିତିରେ ଉନ୍ନତି ଆସେ ତେବେ ନିଯୁକ୍ତି କ୍ଷେତ୍ରରେ ପରିବର୍ତ୍ତନ ଆସିପାରେ ବୋଲି ଚକ୍ରବର୍ତ୍ତୀ କହିଛନ୍ତି। ଶିଳ୍ପ ଜଗତ କଥା ବିଚାରକୁ ନେଲେ ଜଣାଯିବ ଯେ, ଯେଉଁ ସଙ୍ଗଠନରେ ରୋଜଗାର ବଢିଛି ସେମାନଙ୍କ ସଂଖ୍ୟା କମ୍। ବଜାରରେ ଯୋଗ୍ୟ ବ୍ୟକ୍ତି ବିଶେଷଙ୍କ ଆବଶ୍ୟକତା ରହିଥିବା ବିଶେଷଜ୍ଞ କହିଛନ୍ତି।
ଏକଜିକ୍ୟୁଟିଭ ସୋର୍ସିଂ କମ୍ପାନୀ ଗ୍ଲୋବାଲ ହଣ୍ଟ ଇଣ୍ଡିଆର ପରିଚାଳନା ନିର୍ଦ୍ଦେଶକ ସୁନୀଲ ଗୋୟଲ କହିଛନ୍ତି ଯେ, ୨୦୨୦ର ଆରମ୍ଭ ତ୍ରୈମାସ ନିଯୁକ୍ତି କ୍ଷେତ୍ରରେ ଏତେଟା ଉନ୍ନତ ରହିଲା ଭଳି ପ୍ରତୀୟମାନ ହେଉ ନାହିଁ। ଜିଡିପି କମୁଥିବାରୁ କମ୍ପାନୀଗୁଡିକ ସତର୍କତା ଦେଖାଉଛନ୍ତି। ମାତ୍ର ୨୦୨୦ ଦ୍ୱିତୀୟ ତ୍ରୈମାସ ବେଳକୁ କମ୍ପାନୀଗୁଡିକ କାରବାର ସମ୍ପ୍ରସାରଣ ନେଇ ପୁଣି ଧ୍ୟାନ ଦେବାର ସମ୍ଭାବନା ରହିଛି। ଫଳରେ ନିଯୁକ୍ତି ବଢିବା କ୍ଷେତ୍ରରେ କିଛିଟା ପରିବର୍ତ୍ତନ ଆସିପାରେ। ୨୦୧୯ ଅଟୋମୋବାଇଲ, ମାନୁଫାକଚରିଂ ଏବଂ ଇଞ୍ଜିନିୟରିଂ କ୍ଷେତ୍ରରେ ନିଯୁକ୍ତି କମିଛି। କ୍ୟାରିୟର କନସଲଟିଂ ଲିଡର ନମିତା ଭରଦ୍ୱାଜ କହିଛନ୍ତି ଯେ, କମ୍ପାନୀଗୁଡିକ ଏହି ସମୟରେ ନିଜର ଆଭ୍ୟନ୍ତରୀଣ ଶ୍ରମଶକ୍ତି ଉପରେ ଧ୍ୟାନ କେନ୍ଦ୍ରିତ କରିବେ।