ନୂଆଦିଲ୍ଲୀ,୧୩-୨: ୨୦୨୦ରେ ସବୁ ସମସ୍ୟାର ସମାଧାନ ହୋଇଯିବା ନେଇ ଆଶାବାଦୀ ରହିଥିବା ସାହାରା ମୁଖ୍ୟ ସୁବ୍ରତ ରୟ ବୁଧବାର ସୂଚନା ଦେଇଛନ୍ତି। ସେ କହିଛନ୍ତି ଯେ, ୨ ବୃହତ୍ ବିଦେଶୀ ନିବେଶକ ସାହାରର ରିୟଲ ଇଷ୍ଟେଟ ଏବଂ ସହର ବିକାଶ ପ୍ରକଳ୍ପରେ ନିବେଶ ନେଇ ଇଛୁକ ଅଛନ୍ତି। ଏହାବାଦ ନିୟାମକ ସେବି ଆକାଉଣ୍ଟରେ ଜମା କରାଯାଇଥିବା ପ୍ରାୟ ୨୨ ହଜାର କୋଟି ଧୀରେ ଧୀରେ ମଧ୍ୟ ଫେରିବ ବୋଲି ସେ ମତବ୍ୟକ୍ତ କରିଛନ୍ତି। ସାହାରା ଗ୍ରୁପର ୪୨ତମ ପ୍ରତିଷ୍ଠା ଦିବସରେ ନିବେଶକଙ୍କୁ ଏକ ପତ୍ର ଲେଖି ସେ କହିଛନ୍ତି ଯେ, ଗ୍ରୁପ ଲୋକଙ୍କ ଅର୍ଥକୁ ଠିକ୍ ସମୟରେ ଫେରାଇବା ନେଇ କାର୍ଯ୍ୟ କରି ଆସିଛି। ମାତ୍ର କେତେକ ଅନାଗ୍ରହ ଅସୁବିଧା ସ୍ଥିତି ଯୋଗୁ ଗତ ୭ ବର୍ଷ ହେବ ଲୋକଙ୍କୁ ପେମେଣ୍ଟ ଦେବାରେ ସମସ୍ୟା ଉପୁଜୁଛି। ସେବି-ସାହାରା ବିବାଦକୁ ନେଇ ସେ କହିଛନ୍ତି, ୨ ସହଯୋଗୀ କମ୍ପାନୀର ସମ୍ପତ୍ତି ବନ୍ଧକ ରଖି ଅର୍ଥ ସେବି-ସାହାରା ଆକାଉଣ୍ଟରେ ଜମା କରାଯାଇଛି। ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ଏହା ହୋଇଥିଲା। ମାତ୍ର ୨ ବୃହତ୍ତ ବିଦେଶୀ ନିବେଶକ ସାହାରା ପ୍ରକଳ୍ପରେ ନିବେଶ କରିବାକୁ ଆଗଭର ହୋଇଥିବାରୁ ସମସ୍ୟା ସମାଧାନ ହୋଇଯିବା ନେଇ ଆଶା ରହିଛି।