ଭୁବନେଶ୍ୱର,୨୭।୧୨(ବ୍ୟୁରୋ): ଆଉ ଦିନ କେଇଟା ପରେ ବିଦାୟ ନେବ ୨୦୧୯, ଆଉ ଆସିବ ୨୦୨୦। ତେବେ ୨୦୧୯ରେ କମିଶନରେଟ ପୋଲିସକୁ ଅନେକ ମାମଲାରେ ସଫଳତା ମିଳିଥିବାବେଳେ କେତେକ କ୍ଷେତ୍ରରେ ବିଫଳତାର ସ୍ବାଦ ଚାଖିବାକୁ ପଡିଛି। ଏହି ସଫଳତା ଓ ବିଫଳତାକୁ ନେଇ ଆସନ୍ତାବର୍ଷ ପାଇଁ ରୋଡ୍ମ୍ୟାପ୍ ପ୍ରସ୍ତୁତ କରିଛନ୍ତି ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ। ନୂଆ ଆଭିମୁଖ୍ୟ ନେଇ ସୂଚନା ଦେବା ସହ ଆଗାମୀ ବର୍ଷ ଚ୍ୟାଲେଞ୍ଜପୂର୍ଣ୍ଣ ରହିବ ବୋଲି ସେ କହିଛନ୍ତି।
ପୋଲିସ କମିଶନର କହିଛନ୍ତି, ୨୦୨୦ରେ ୫-ଟିକୁ ଅଧିକ ଗୁରୁତ୍ୱ ଦିଆଯାଇ କାର୍ଯ୍ୟ କରାଯିବ। ପ୍ରଥମଟି ହେଲା ରାଜ୍ୟ ସରକାରଙ୍କ ‘ମୋ ସରକାର’ ଯୋଜନାକୁ ସଫଳ କରିବା। ଲୋକେ ଥାନାକୁ ଗଲେ ପୋଲିସଠାରୁ ଯେପରି ଉତ୍ତମ ବ୍ୟବହାର ପାଇବେ ସେନେଇ ଗୁରୁତ୍ୱ ଦିଆଯିବ। ଦ୍ୱିତୀୟରେ ରାଜଧାନୀରେ ଟ୍ରାଫିକ ସମସ୍ୟାରେ ସୁଧାର ଆଣିବା ଆଉ ଏକ ଚ୍ୟାଲେଞ୍ଜ ରହିବ। ଏବେ ବି ରାଜଧାନୀର ଆଉ କିଛି ଛକରେ ଟ୍ରାଫିକ ସମସ୍ୟା ରହିଛି। ଜୟଦେବ ବିହାରରୁ ନନ୍ଦନ କାନନ,ଏଜି ଛକରୁ ରାଜମହଲ, ରବି ଟକିଜ, ଖଣ୍ଡଗିରି ଓ ପଳାଶୁଣି ଆଦି ସ୍ଥାନରେ ଟ୍ରାଫିକ ପରିଚାଳନା ପାଇଁ ନୂଆ ବ୍ୟବସ୍ଥା ଗ୍ରହଣ କରାଯିବ। ତୃତୀୟରେ ରାଜଧାନୀରେ ଡ୍ରଗ୍ସ କାରବାର ରୋକିବା ପାଇଁ ଏକ ସ୍କ୍ବାଡ୍ ଗଠନ କରାଯାଇଛି। ଏହି ସ୍କ୍ବାଡ୍ ଚଢାଉ କରି ନିଶା ମାଫିଆମାନଙ୍କୁ ଗିରଫ କରୁଛି। ଚଳିତବର୍ଷ ଅଧିକାଂଶ ସ୍ଥାନରେ ନିଶା ବେପାର କମିଛି। ଆଗକୁ ନିଶା ମାଫିଆଙ୍କୁ ପୂରା ଟାର୍ଗେଟ କରାଯିବ। ଚତୁର୍ଥରେ ଛିନ୍ତାଇ ଓ ସଂଗଠିତ ଅପରାଧ ରୋକିବା। ଏବେ ରାଜଧାନୀରେ ପ୍ରତିଦିନ ବିଭିନ୍ନ ଛକରେ ଚିନ୍ତାଇ ହେଉଛି। ତେଣୁ ଏହାକୁ ରୋକିବା ପାଇଁ ହାଇଦ୍ରାବାଦ ପରି ସମଗ୍ର ସହରକୁ ସିସିଟିଭି ନଜରରେ ରଖାଯିବାକୁ ଲକ୍ଷ୍ୟ ରଖାଯାଇଛି। ଏ ନେଇ ସ୍ମାର୍ଟସିଟି ଲିମିଟେଡ୍ ସହ ମିଶି କାର୍ଯ୍ୟ କରାଯିବ। ଏହାସହ ସଂଗଠିତ ଅପରାଧ ରୋକିବାକୁ ପଦେକ୍ଷପ ନିଆଯିବ। ବିଶେଷକରି ଅପରାଧରେ ପରିଚିତ ଓ ସମ୍ପର୍କୀୟଙ୍କର ସମ୍ପୃକ୍ତି ରହୁଥିବାରୁ ଯଦି କୌଣସି ଅଫିସର କାର୍ଯ୍ୟାନୁଷ୍ଠାନ ନେବାରେ ଅବହେଳା କରନ୍ତି ସେମାନଙ୍କୁ ଅନ୍ୟତ୍ର ବିଦା କରାଯିବ। ପଞ୍ଚମରେ ଜରୁରୀ ସେବାରେ ଉନ୍ନତି ଆଣିବା। ମହିଳା, ବୟସ୍କ ବ୍ୟକ୍ତି ସମସ୍ୟାରେ ପଡିଲେ ୧୦୦କୁ ଫୋନ୍ କରୁଛନ୍ତି। ତେଣୁ ଫୋନ୍ ପାଇବା ମାତ୍ରେ କିଭଳି ଶୀଘ୍ର ସେମାନଙ୍କ ନିକଟରେ ପୋଲିସ ପହଞ୍ଚତ୍ବ ସେଥିପାଇଁ ପିସିଆର ଭ୍ୟାନ୍ ସଂଖ୍ୟା ବଢାଯିବ। ଏହାସହ କଣ୍ଟ୍ରୋଲ ରୁମ୍ର କ୍ରିୟାଶୀଳତାକୁ ବଢ଼ାଇବା ସହ ଅଧିକ ସୁଧାର ଅଣାଯିବ। ଏହାସହ ଥାନାରେ ଥିବା ସହାୟକେନ୍ଦ୍ରକୁ ସ୍ବଚ୍ଛ ରଖିବା, ଥାନା ଆଗରେ ଥିବା ଅଳିଆ ହଟାଇବାର ବ୍ୟବସ୍ଥା କରାଯିବାକୁ ଲକ୍ଷ୍ୟ ରଖାଯାଇଛି।