ମଣ୍ଟ୍ରିଲ,୧୨।୪ (ଏଏଫ୍ପି): ବର୍ଷର ଅନ୍ତିମ ତଥା ଚତୁର୍ଥ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ୟୁଏସ୍ ଓପନ ଠିକ୍ ପୂର୍ବରୁ ଖେଳାଯାଉଥିବା ମଣ୍ଟ୍ରିଲ ଡବ୍ଲ୍ୟୁଟିଏ ଟୁର୍ନାମେଣ୍ଟ ବାର ରୋଜର୍ସ କପ୍କୁ ଘୁଞ୍ଚାଇ ଦିଆଯାଇଛି। ଏଥର ଏହି ଟେନିସ ଇଭେଣ୍ଟକୁ ବାତିଲ କରାଯାଇଛି ଓ ୨୦୨୧ ପର୍ଯ୍ୟନ୍ତ ଏହା ଆୟୋଜନ ହେବନାହିଁ। ଏ ନେଇ ଇଭେଣ୍ଟ ଅଫିସିଆଲମାନେ ସୂଚନା ଦେଇଛନ୍ତି।
ଏଥର ଏହି ଡବ୍ଲ୍ୟୁଟିଏ ଟୁର୍ନାମେଣ୍ଟ ଅଗଷ୍ଟ ୭ରୁ ୧୬ ତାରିଖ ମଧ୍ୟରେ ଆୟୋଜନ ହେବାର କାର୍ଯ୍ୟକ୍ରମ ଥିଲା। ତେବେ କରୋନା ଭାଇରସ ସଂକ୍ରମଣ କାରଣରୁ ଉତ୍ତରପୂର୍ବ କାନାଡ଼ାସ୍ଥିତ କ୍ୱେବେକ ପ୍ରୋଭିନ୍ସ ଅଗଷ୍ଟ ୩୧ ପର୍ଯ୍ୟନ୍ତ ସବୁ ଟୁର୍ନାମେଣ୍ଟକୁ ବାତିଲ କରିଛି। ଫଳରେ ଏହି ଟୁର୍ନାମେଣ୍ଟ ଆୟୋଜନ ନେଇ ଆଶଙ୍କା ପ୍ରକାଶ ପାଇଥିଲା। ଫଳରେ ଏହାକୁ ୨୦୨୧ ପର୍ଯ୍ୟନ୍ତ ଘୁଞ୍ଚାଇ ଦିଆଯାଇଛି ବୋଲି ଡବ୍ଲୁୃ୍ୟଟିଏ ତରଫରୁ ସୂଚନା ଦିଆଯାଇଛି।
ଠିକ୍ ସମୟ ବେଳକୁ ପରିସ୍ଥିତିରେ ଉନ୍ନତି ଘଟିବ ବୋଲି ଆଶା କରାଯାଉଥିଲା। ତେବେ ଏପରି ହୋଇ ନ ଥିଲା। ଫଳରେ ଏପରି କଠୋର ନିଷ୍ପତ୍ତି ନେବାକୁ ହେଲା ବୋଲି ଟୁର୍ନାମେଣ୍ଟ ଡାଇରେକ୍ଟର ଇୟୁଗେନି ଲାପିଏରେ କହିଛନ୍ତି।
ଉଲ୍ଲେଖଥାଉ କି, କୋଭିଡ୍-୧୯ କାରଣରୁ ଦ୍ୱିତୀୟ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଫ୍ରେଞ୍ଚ୍ ଓପନ ମେ- ଜୁନ୍ ବଦଳରେ ସେପ୍ଟେମ୍ବର- ଅକ୍ଟୋବରରେ ଆୟୋଜନ ହେବ ବୋଲି ନିଷ୍ପତ୍ତି ନିଆଯାଇଛି। ଯଦି ଏପରି ହୁଏ ୟୁଏସ୍ ଓପନର ଠିକ ଗୋଟିଏ ସପ୍ତାହ ପରେ ଫ୍ରେଞ୍ଚ୍ ଓପନ ଆୟୋଜନ ହେବ। ଅନ୍ୟପଟେ ଦ୍ୱିତୀୟ ବିଶ୍ୱଯୁଦ୍ଧ ପରେ ଓ୍ବିମ୍ବେଲଡନ ପ୍ରଥମଥର ପାଇଁ ବାତିଲ ହୋଇଛି। ଏହା ଅର୍ଥ ଯେ, ପୂର୍ବର ଟେନିସ ଇଭେଣ୍ଟଗୁଡିକ ଜୁଲାଇ ୧୩ ପରେ ଚାଲୁ ରହିବ। ଏପଟେ ଜୁଲାଇ ୧୨ ପର୍ଯନ୍ତ ଡବ୍ଲ୍ୟୁଟିଏ ଟୁର ତା’ର ସବୁ ଇଭେଣ୍ଟଗୁଡିକୁ ସସ୍ପେଣ୍ଡ କରିଛି। ଆସନ୍ତାମାସ ଶେଷ ପର୍ଯ୍ୟନ୍ତ କୌଣସି ନିଷ୍ପତ୍ତି ନିଆଯାଇପାରିବ ନାହିଁ ବୋଲି ଡବ୍ଲ୍ୟୁଟିଏ ତରଫରୁ କୁହାଯାଇଛି।