ଜୁରିଚ୍, ୧୧।୬(ଏପି)- ୨୦୨୩ ମହିଳା ଫିଫା ବିଶ୍ୱକପ ଆୟୋଜନ ପାଇଁ ୩ଟି ବିଡ୍ ଦାଖଲ ହୋଇଛି। ତେବେ ଅଷ୍ଟ୍ରେଲିଆ-ନ୍ୟୁଜିଲାଣ୍ଡର ମିଳିତ ବିଡ୍ ଅନ୍ୟ ସମସ୍ତଙ୍କୁ ପଛରେ ପକାଇ ଦେଇଛି। ୩୨ ଦଳ ବିଶିଷ୍ଟ ଏହି ମେଗା ପ୍ରତିଯୋଗିତା ପାଇଁ ଫିଫା ୫ ପଏଣ୍ଟରୁ ଅଷ୍ଟ୍ରେଲିଆ-ନ୍ୟୁଜିଲାଣ୍ଡ ବିଡ୍କୁ ୪.୧ ପଏଣ୍ଟ ଦେଇଛି। ଅନ୍ୟତମ ଆଶାୟୀ ଦେଶ ଜାପାନ ୩.୯ ପଏଣ୍ଟ ପାଇଥିବାବେଳେ କଲମ୍ବିଆ ୨.୮ ପଏଣ୍ଟ ସହିତ ପଛରେ ପଡ଼ିଛି। ଫିଫାର କାଉନସିଲ ସଦସ୍ୟମାନେ ଜୁନ୍ ୨୫ରେ ବିଜେତାଙ୍କ ନାମ ଘୋଷଣା କରିବେ। ଫିଫା କାଉନସିଲ୍ ସଦସ୍ୟଙ୍କ ୩୭ଟି ଭୋଟ ସାର୍ବଜନିନ କରାଯିବ ବୋଲି ଫିଫା ପକ୍ଷରୁ ପ୍ରକାଶ କରାଯାଇଛି। ଆର୍ଥିକ ଦୃଷ୍ଟିକୋଣରୁ ଅଷ୍ଟ୍ରେଲିଆ-ନ୍ୟୁଜିଲାଣ୍ଡର ମିଳିତ ବିଡ୍ ଫେଭରାଇଟ ରହିଛି। ଅଷ୍ଟ୍ରେଲିଆ ଏସିଆନ ଫୁଟବଲ କନ୍ଫେଡେରେଶନ ସଦସ୍ୟ ହୋଇଥିବାବେଳେ ନ୍ୟୁଜିଲାଣ୍ଡ ଓସେନିଆ ଗ୍ରୁପରେ ରହିଛି। ଏହାସତ୍ତ୍ୱେ ଉତ୍ତମ ବୁଝାମଣା ଭିତ୍ତିରେ ବିଡ୍ ପ୍ରସ୍ତୁତ କରାଯାଇଥିବା ଫିଫା ପକ୍ଷରୁ ପ୍ରକାଶ କରାଯାଇଛି। କଲମ୍ବିଆ ଫିଫାର ଅନେକ ଆବଶ୍ୟକତାକୁ ପୂରଣ କରିଥିଲେ ହେଁ ଅନେକ ଅର୍ଥ ବିନିଯୋଗ ଏବଂ ସମର୍ଥନର ଆବଶ୍ୟକତା ରହିଛି। ପ୍ରତିଯୋଗିତା ପାଇଁ ପ୍ରସ୍ତୁତ ହେବାକୁ ଆଉ ମାତ୍ର ୩ ବର୍ଷ ରହିଛି। ଯେଉଁ ଦେଶ ଆୟୋଜନ ଅଧିକାର ପାଇବ ସେ ଫ୍ରାନ୍ସକୁ ଅନୁସରଣ କରିବ। କାରଣ ଫ୍ରାନ୍ସ ୨୦୧୯ରେ ୨୪ ଦେଶକୁ ନେଇ ଏହି ପ୍ରତିଯୋଗିତା ଆୟୋଜନ କରିଥିଲା, ଯେଉଁଥିରେ କି ଆମେରିକା ଚାମ୍ପିୟନ ହୋଇଥିଲା।