ନୂଆଦିଲ୍ଲୀ,୧୬ା୪: ଲକ୍ଡାଉନ ସତ୍ତ୍ୱେ ନିର୍ଦ୍ଦିଷ୍ଟ ଅଞ୍ଚଳରେ କୃଷକ ଓ ଦିନ ମଜୁରିଆମାନଙ୍କ ସ୍ବାର୍ଥକୁ ଦୃଷ୍ଟିରେ ରଖି ଏପ୍ରିଲ ୨୦ ପରେ କେଉଁସବୁ କାର୍ଯ୍ୟ କରିବାକୁ ଅନୁମତି ମିଳିବ ଓ କ’ଣ କରିବାକୁ ବାରଣ କରାଯାଇଛି, ତା’ର ଏକ ତାଲିକା କେନ୍ଦ୍ର ସରକାର ବୁଧବାର ଜାରି କରିଛନ୍ତି। କୋଭିଡ୍-୧୯ ହଟ୍ସ୍ପଟ ହୋଇ ନ ଥିବା କିମ୍ବା ସେଭଳି ହେବାର ସମ୍ଭାବନା ନ ଥିବା ଅଞ୍ଚଳରେ ଏପ୍ରିଲ ୨୦ରୁ ସମସ୍ତ କୃଷି ଓ ଆନୁଷଙ୍ଗିକ କାର୍ଯ୍ୟ, ସର୍ବାଧିକ ସାମର୍ଥ୍ୟ ସହ ଗ୍ରାମୀଣ ଅର୍ଥନୈତିକ କାର୍ଯ୍ୟକୁ ଅନୁମତି ମିିଳିବ। ଦିନ ମଜୁରିଆ ଓ ଅନ୍ୟ ଶ୍ରମିକମାନଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି, ନିର୍ଦ୍ଦିଷ୍ଟ ଶିଳ୍ପଭିତ୍ତିକ କାର୍ଯ୍ୟ କରାଯାଇପାରିବ। ୨୦ରେ ଅନୁମତି ମିଳିବାକୁ ଥିବା କାର୍ଯ୍ୟ ମଧ୍ୟରେ ରହିଛି:
ମାଲ୍ ପରିବହନ: ମାଲ୍ବାହୀ ଗାଡ଼ି, ପରିବହନକାରୀ ଟ୍ରେନ, ପାର୍ସଲ ଟ୍ରେନ୍, କାର୍ଗୋ ବିମାନ, ରିଲିଫ୍ ଓ ଉଦ୍ଧାର କାର୍ଯ୍ୟ ଚାଲୁ ରହିବ। ପରିବହନ ପାଇଁ ବନ୍ଦର ଓ ଅନ୍ତର୍ଦେଶୀୟ କଣ୍ଟେନର ଡିପୋ ଖୋଲା ରହିବ। ସେହିପରି ପେଟ୍ରୋଲିୟମ ଉତ୍ପାଦ, ଖାଦ୍ୟ ସାମଗ୍ରୀ, ମେଡିକାଲ ଯୋଗାଣ ଆଦି ଅତ୍ୟାବଶ୍ୟକ ସାମଗ୍ରୀର ସୀମାପାର୍ ପରିବହନ ପାଇଁ ଲ୍ୟାଣ୍ଡ ପୋର୍ଟଗୁଡ଼ିକ କାର୍ଯ୍ୟ କରିବ। ସମସ୍ତ ଟ୍ରକ୍ ଓ ଅନ୍ୟ ମାଲ୍ ପରିବହନ ଯାନ ଚଳାଚଳ ସହିତ ଏଥିରେ ୨ ଜଣ ଡ୍ରାଇଭର ଓ ଜଣେ ହେଲ୍ପରଙ୍କୁ ବୈଧ ଲାଇସେନ୍ସ ସହ ଯିବା ପାଇଁ ଅନୁମତି ମିଳିବ। ସେହିପରି ରାଜପଥ ପାର୍ଶ୍ୱ ଢ଼ାବା ଓ ଗାଡ଼ି ମରାମତି ଦୋକାନ ଖୋଲା ରହିବ। ରେଲଓ୍ବେ, ବିମାନ ବନ୍ଦର, ବନ୍ଦର, ଜାହାଜ ଇତ୍ୟାଦିରେ କାର୍ଯ୍ୟ କରିବା ଲାଗି କର୍ମଚାରୀ ଓ ଚୁକ୍ତିଭିତ୍ତିକ ଶ୍ରମିକଙ୍କ ଯାତାୟାତକୁ ଅନୁମତି ମିଳିବ।
କୃଷି କାର୍ଯ୍ୟ: କୃଷକ ଓ କୃଷି ଶ୍ରମିକଙ୍କୁ ଜମିରେ କାର୍ଯ୍ୟ କରିବା ଲାଗି ଅନୁମତି ମିଳିଛି। କୃଷି ଉତ୍ପାଦନ ସଂଗ୍ରହ କରୁଥିବା ସଂସ୍ଥା, ମଣ୍ଡି ଆଦି ଖୋଲା ରହିବ। କୃଷକମାନଙ୍କଠାରୁ ସିଧାସଳଖ ଦ୍ରବ୍ୟ କିଣୁଥିବା ସରକାରୀ ସଂସ୍ଥା କିମ୍ବା ଶିଳ୍ପ, ଏଫ୍ପିଓର ସମବାୟ ସଂସ୍ଥା ଖୋଲିବ। କୃଷି ସରଞ୍ଜାମ ଓ ଏହାର ଯନ୍ତ୍ରାଂଶ ବିକୁଥିବା ଓ ମରାମତି କରୁଥିବା ଦୋକାନ, କୃଷି ଉପକରଣ ଭଡ଼ାରେ ଯୋଗାଉଥିବା କେନ୍ଦ୍ର, ସାର, କୀଟନାଶକ, ବିହନ ଉତ୍ପାଦନ, ବିପଣନ ଓ ଖୁଚୁରା ବିକ୍ରି କରୁଥିବା ସଂସ୍ଥା ଖୋଲାରହିବ।
ମତ୍ସ୍ୟଚାଷ: ସମୁଦ୍ର, ନଦୀ ଇତ୍ୟାଦିରୁ ମାଛ ଧରିବା ଓ ବିକ୍ରି କରିବାକୁ ଅନୁମତି ମିଳିଛି। ଏଥିସହିତ ସମ୍ପୃକ୍ତ ବ୍ୟବସାୟ ଯଥା ମାଛଚାଷ ପାଇଁ ଖାଦ୍ୟ ପ୍ରସ୍ତୁତି, ପ୍ରକ୍ରିୟାକରଣ, ପ୍ୟାକେଜିଂ, ଶୀତଳଭଣ୍ଡାର ଆଦି ଖୋଲିବ। ବନୀକରଣ: ସର୍ବାଧିକ ୫୦ ପ୍ରତିଶତ କର୍ମଚାରୀଙ୍କୁ ନେଇ ଚା, କଫି ଓ ରବର ଚାରାରୋପଣକୁ ଅନୁମତି ମିଳିଛି। ଏଥିସହିତ ଚା, କଫି, ରବର, କାଜୁ, ପ୍ରୋସେସିଂ, ପ୍ୟାକେଜିଂ, ବିକ୍ରି କରାଯାଇପାରିବ।
ପଶୁପାଳନ: ଦୁଗ୍ଧ ଓ ଦୁଗ୍ଧଜାତ ସାମଗ୍ରୀ ସଂଗ୍ରହ, ପ୍ରକ୍ରିୟାକରଣ, ଆବଣ୍ଟନ, ବିକ୍ରି, ପରିବହନ ଆଦିକୁ ଅନୁମତି। ଗୋଶାଳା ଓ କୁକୁଡା ପାଳନ ଫାର୍ମ ଓ ହାଚେରି ସହ ସମ୍ପୃକ୍ତ କାର୍ଯ୍ୟ, ପଶୁ ଖାଦ୍ୟ ଉତ୍ପାଦନ, କଞ୍ଚାମାଲ ଯୋଗାଣ ଆଦି ଚାଲିବ।
ବ୍ୟବସାୟିକ ଓ ଘରୋଇ ସଂସ୍ଥା: ଛାପା ଓ ଇଲେକ୍ଟ୍ରୋନିକ୍ ଗଣମାଧ୍ୟମ, ଡିଟିଏଚ୍ ଓ କେବୁଲ ସେବା ଖୋଲା ରହିବ। ୫୦ ପ୍ରତିଶତ କର୍ମଚାରୀରେ ଆଇଟି ତଥା ଆଇଟି ଭିତ୍ତିକ ସେବା ସଂସ୍ଥା, ସରକାରୀ କାର୍ଯ୍ୟ କରୁଥିବା ଡାଟା ଓ କଲ୍ ସେଣ୍ଟର, ଗ୍ରାମପଞ୍ଚାୟତ ସ୍ତରରେ ସରକାରୀ ସ୍ବୀକୃତିପ୍ରାପ୍ତ କମନ ସର୍ଭିସ ସେଣ୍ଟର, ଇ-କମର୍ସ କମ୍ପାନୀ ଆଦିକୁ କାର୍ଯ୍ୟ କରିବା ଲାଗି ଅନୁମତି ମିଳିବ। ସେହିପରି କୋରିୟର ସେବା, ଶୀତଳଭଣ୍ଡାର, ଓ୍ବେରହାଉସିଂ ସେବା, ଲଜିଷ୍ଟିକ୍ ଚେନ୍, ଘରୋଇ ସୁରକ୍ଷା ସେବା ଆଦି ଚାଲୁ ରହିବ। ଲକ୍ଡାଉନ ବେଳେ ପର୍ଯ୍ୟଟକ ଓ ଅନ୍ୟ ଲୋକ ଅଟକି ରହିଥିବା ହୋଟେଲ, ଆଶ୍ରୟଗୃହ, ଲଜ୍, ମୋଟେଲଗୁଡ଼ିକ ଖୋଲା ରହିବ।
ଗ୍ରାମାଞ୍ଚଳ ଅର୍ଥନୀତିକୁ ଗତିଶୀଳ କରିବା: ଗ୍ରାମାଞ୍ଚଳ ଅର୍ଥନୀତି, ଶିଳ୍ପ କାର୍ଯ୍ୟକୁ ଗତିଶୀଳ କରିବା ଲାଗି ଉକ୍ତ ଅଞ୍ଚଳରେ ଥିବା ଖାଦ୍ୟ ପ୍ରକ୍ରିୟାକରଣ ଶିଳ୍ପ ଚାଲୁ ରଖିବା, ସଡ଼କ ନିର୍ମାଣ, ଜଳସେଚନ ପ୍ରକଳ୍ପ, ବିଲ୍ଡିଂ ଓ ଶିଳ୍ପ ପ୍ରକଳ୍ପ କାର୍ଯ୍ୟ ଜାରି ରଖିବା ଏବଂ ଏମ୍ଜିଏନ୍ଆର୍ଇଜିଏସ୍ କାର୍ଯ୍ୟକୁ ଅନୁମତି ମିଳିବ। ଏଥିରେ ଜଳସେଚନ ଓ ଜଳସଂରକ୍ଷଣ କାର୍ଯ୍ୟକୁ ପ୍ରାଧାନ୍ୟ ଦିଆଯିବ। ଏଥିସହିତ ଗ୍ରାମାଞ୍ଚଳରେ ନିଯୁକ୍ତି ସୃଷ୍ଟି ଲାଗି କମନ ସର୍ଭିସ୍ ସେଣ୍ଟର ସିଏସ୍ସି ଖୋଲା ରହିବ।
ଶିଳ୍ପ ଉତ୍ପାଦନ କାର୍ଯ୍ୟ: ଏସ୍ଇଜେଡ୍, ଇଓୟୁ, ନିୟନ୍ତ୍ରଣରେ ଥିବା କଳକାରଖାନାରେ ସାମାଜିକ ଦୂରତ୍ୱ ନିୟମ ସହ କାର୍ଯ୍ୟ କରିବାକୁ ଅନୁମତି ମିଳିବ। ଆଇଟି ହାର୍ଡଓ୍ବାର, ଜରୁରୀ ସାମଗ୍ରୀ ଓ ପ୍ୟାକେଜିଂ ଶିଳ୍ପକୁ ଅନୁମତି ଦିଆଯିବ। ସେହିପରି କୋଇଲା, ଖଣିଜ ଓ ତୈଳ ଉତ୍ପାଦନ ସହ ସମ୍ପୃକ୍ତ କାର୍ଯ୍ୟ ଚାଲୁ ରହିବ। ଏହି ସମୟରେ ଆର୍ବିଆଇ, ବ୍ୟାଙ୍କ, ଏଟିଏମ୍, ପୁଞ୍ଜି ଓ ଋଣ ବଜାର, ବୀମା କମ୍ପାନୀ ଆଦି ଖୋଲା ରହିବ।
ସ୍ବାସ୍ଥ୍ୟସେବା: ନୂଆ ଗାଇଡଲାଇନ ଅନୁଯାୟୀ ସମସ୍ତ ସ୍ବାସ୍ଥ୍ୟସେବା ଓ ସାମାଜିକ ସେକ୍ଟର ଖୋଲା ରହିବ।