ବାରିପଦା ଅଫିସ,୩୧।୫- କଥାରେ ଅଛି ରଖେ ହରି ତ ମାରେ କିଏ। ବାରିପଦା ସହରଠାରୁ ପ୍ରାୟ ୯ କି.ମି ଦୂର ଲକ୍ଷ୍ମୀପୋଷି ଅଞ୍ଚଳରେ ଘଟିଥିବା ଏକ ଦୁର୍ଘଟଣାକୁ ଦେଖିଲେ ଏହି ଉକ୍ତି ସତ ଲାଗେ। ଏକ କାର ୨୦ ଫୁଟ ତଳକୁ ଖସି ପଡ଼ିିଥିଲେ ମଧ୍ୟ ଏଥିରେ ଥିବା ୩ ଜଣଙ୍କର ବିଶେଷ କିଛି କ୍ଷତି ହୋଇନି। ବାରିପଦା ଟାଉନ ଥାନା ଅଧୀନ ଲକ୍ଷ୍ମୀପୋଷି ଦେଇ ଯାଇଥିବା ସୁବର୍ଣ୍ଣରେଖା କେନାଲରେ ଗୁରୁବାର ଏହି ଦୁର୍ଘଟଣା ଘଟିଛି। ଘଟଣା ସ୍ଥଳରେ ଲକ୍ଷ୍ମୀପୋଷି ଫାଣ୍ଡି ପୋଲିସ ପହଞ୍ଚି ତଦନ୍ତ କରୁଛି। ଲକ୍ଷ୍ମୀପୋଷି ଅଞ୍ଚଳର ରଘୁନାଥ ମାଝୀ ତାଙ୍କ ସ୍ତ୍ରୀ ଓ ଝିଆରୀଙ୍କ ସହ ଏକ କାର (ଓଡି.୧୧କେ-୪୨୭୮) ଯୋଗେ ଗୁରୁବାର ଘରଠାରୁ ଅଳ୍ପ ଦୂର ଶ୍ୱଶୁର ଘରକୁ ଯାଇଥିଲେ। ସେଠାରୁ ଫେରିବା ବେଳେ କାରଟି ଭାରସାମ୍ୟ ହରାଇ ୨୦ ଫୁଟ ତଳ କେନାଲ ଭିତରକୁ ଖସିପଡିଥିଲା। କେନାଲରେ ପାଣି ନ ଥିବାରୁ ସେମାନଙ୍କୁ ସ୍ଥାନୀୟ ଲୋକେ ତୁରନ୍ତ ଉଦ୍ଧାର କରି ଚିକିତ୍ସା ପାଇଁ ପିଆରଏମ ମେଡିକାଲକୁ ପଠାଇଥିଲେ। ଦୁର୍ଘଟଣାର ସମ୍ମୁଖୀନ ହୋଇଥିବା ୩ ଜଣ ସୁସ୍ଥ ଥିବା ଜଣାପଡିଛି।
