ନୂଆଦିଲ୍ଲୀ,୩୧। ୩: କୋଭିଡ୍-୧୯ରେ ସଂକ୍ରମିତ ବ୍ୟକ୍ତିଙ୍କ ଚିକିତ୍ସା ଲାଗି ରେଲଓ୍ବେ ଆଗେଇ ଆସିଛି। ଏହାର ୨୦ ହଜାର କୋଚ୍କୁ ଆଇସୋଲେଶନ ୟୁନିଟରେ ରୂପାନ୍ତରିତ କରିବା ଲାଗି ନିଷ୍ପତ୍ତି ନିଆଯାଇଛି। ଏଥିଲାଗି ପ୍ରସ୍ତୁତ ରହିବାକୁ ରେଳ ବୋର୍ଡ ପକ୍ଷରୁ ଏହାର ଜୋନ ସ୍ତରୀୟ ୟୁନିଟଗୁଡ଼ିକୁ ନିର୍ଦ୍ଦେଶ ଦିଆଯାଇଛି। ଭାରତୀୟ ରେଳପଥର ୧୭ ଜୋନ ପକ୍ଷରୁ ୫ ହଜାର କୋଚ୍କୁ ପ୍ରାରମ୍ଭିକ ଭାବେ ଆଇସୋଲେଶନ ୟୁନିଟରେ ରୂପାନ୍ତରିତ କରିବା ଲାଗି ପ୍ରକ୍ରିୟା ଆରମ୍ଭ କରାଯାଇଥିବା ପ୍ର୍ରକ୍ରିୟା ସହ ଜଡ଼ିତ ଜଣେ ଅଧିକାରୀ ସୂଚନା ଦେଇଛନ୍ତି। ରେଲଓ୍ବେର ରୁଲିଂ ଷ୍ଟକ୍ ପ୍ରଡକ୍ସନ ୟୁନିଟଗୁଡିକରେ ମେଡିକାଲ ଯନ୍ତ୍ରାଂଶ ପ୍ରସ୍ତୁତି ଲାଗି ଗତ ସପ୍ତାହରେ ରେଳପଥ ପକ୍ଷରୁ ନିଷ୍ପତ୍ତି ନିଆଯାଇଥିଲା। ସୋମବାର କରୋନା ଆକ୍ରାନ୍ତଙ୍କ ସଂଖ୍ୟା ସାରା ଦେଶରେ ୧୦୦୦ ଟପିଥିବା ବେଳେ ଏହାକୁ ପ୍ରତିରୋଧ କରିବା ନେଇ ଏବେ ପ୍ରସ୍ତୁତି ଜୋର୍ଦାର କରାଯାଇଛି। ଆବଶ୍ୟକ ପଡ଼ିଲେ ୨୦ ହଜାର କୋଚ୍କୁ ଆଇସୋଲେଶନ ୟୁନିଟରେ ରୂପାନ୍ତରିତ କରିବା ନେଇ ଯୋଜନା ହାତକୁ ନିଆଯିବ ବୋଲି ଅଧିକାରୀ ଜଣକ ମତ ରଖିଛନ୍ତି। ପ୍ରକ୍ରିୟାକୁ ୫ ହଜାର କୋଚ୍ରୁ ଆରମ୍ଭ କରାଯାଇଛି। କେବେ ସୁଦ୍ଧା ସମ୍ପୂର୍ଣ୍ଣ କାର୍ଯ୍ୟକ୍ରମ ଜାରି କରାଯିବ ସେ ନେଇ ସମୟସୀମା ଧାର୍ଯ୍ୟ କରାଯାଇ ନାହିଁ। ଗତ ସପ୍ତାହରେ କୋଚ୍ରେ ଆଇସୋଲେଶନ ଓ୍ବାର୍ଡର ଏକ ପ୍ରୋଟୋଟାଇପ ରେଳପଥ ପକ୍ଷରୁ ଜାରି କରାଯାଇଥିଲା।