ନୟାଗଡ଼ ଅଫିସ,୪ା୧୨: ୨୦ ହଜାର ଟଙ୍କା ଦିଅ, ପକ୍କା ଘର ନିଅ। ଏହି ଉକ୍ତି ହେଉଛି ଖୋଦ୍ ଜଣେ ସରକାରୀ କର୍ମଚାରୀଙ୍କର। ଯୋଗ୍ୟ ତାଲିକାରେ ନାମ ଥିବା ବ୍ୟକ୍ତିଙ୍କଠାରୁ ୨୦ ହଜାର ଟଙ୍କା ନିଆଯାଇ ପକ୍କାଘର କାର୍ଯ୍ୟାଦେଶ ଦିଆଯାଉଛି। ଆଉ ଯିଏ ଦେଇ ନ ପାରିଲା ତାଙ୍କ ନାମକୁ ବାଦ୍ ଦିଆଯାଇ ଅଯୋଗ୍ୟ ହିତାଧିକାରୀଙ୍କଠାରୁ ଲାଞ୍ଚ ନିଆଯାଇ ଏହା ପ୍ରଦାନ କରାଯାଉଛି। ଫଳରେ ଯେଉଁ ମହତ ଲକ୍ଷ୍ୟ ନେଇ ପ୍ରଧାନମନ୍ତ୍ରୀ ଆବାସ ଯୋଜନା ପ୍ରଣୟନ ହୋଇଛି ତାହା ସାଧନ ହୋଇପାରୁ ନାହିଁ। ନୟାଗଡ଼ ଜିଲା ଭାପୁର ବ୍ଲକରେ ଏହାର ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି।
ଭାପୁର ବ୍ଲକ ଗୋଳପୋଖରୀ ପଞ୍ଚାୟତ ବେଗୁନିଆ ଗ୍ରାମର ଅମରି ସାହୁ (୬୦)। ନିଜ ପୁଅ, ବୋହୂ ଓ ଦୁଇ ନାତୁଣୀଙ୍କୁ ନେଇ ଏହି ବୃଦ୍ଧା ଜଣକ ଏକ ଚାଳଘରେ ରହି ଆସୁଛନ୍ତି। ଦୀର୍ଘବର୍ଷ ହେଲା ସେମାନେ ଏକ ପକ୍କା ଘର ପାଇଁ ଆବେଦନ କରିଥିଲେ। ପରେ ଏସ୍ଇସିିସି ତାଲିକାରେ ଅମରିଙ୍କ ନାମ ଆସିଥିଲା। ତାଙ୍କର ପଞ୍ଜୀକୃତ ନମ୍ବର ହେଉଛି ଓଆର ୩୫୦୨୩୭୦। ଏହା ଜଣାପଡ଼ିବା ପରେ ଉକ୍ତ ପଞ୍ଚାୟତର ନିର୍ବାହୀ ଅଧିକାରୀ (ପିଇଓ) କୃଷ୍ଣଚନ୍ଦ୍ର ମଲ୍ଲିକ ତାଙ୍କ ପାଖକୁ ଯାଇ ତୁମେ ପକ୍କା ଘର ପାଇବା ପାଇଁ ଯୋଗ୍ୟ ହୋଇଛ, ୨୦ ହଜାର ଟଙ୍କା ଦେଲେ ତୁମର ଘର କାର୍ଯ୍ୟାଦେଶ ମିଳିବ ବୋଲି କହିଥିଲେ। ପରେ ଅମରିଙ୍କ ବୋହୂ ଆଶାମଣି ବିଭିନ୍ନ ଆଡୁ ଧାରଉଧାର କରି ୧୦ ହଜାର ଟଙ୍କା ପିଇଓଙ୍କୁ ଦେଇଥିଲେ। ମାସେ ତଳେ ୧୦ ହଜାର ଟଙ୍କା ଦେଇଥିବା ବେଳେ ସେମାନଙ୍କୁ ଆଉ ୧୦ ହଜାର ଟଙ୍କା ମଗାଯାଉଛି। ବଳକା ଟଙ୍କା ଦେଇପାରୁ ନ ଥିବାରୁ ତାଙ୍କୁ ପକ୍କା ଘର କାର୍ଯ୍ୟାଦେଶ ମିଳୁନାହିଁ। କେବଳ ଅମରି ନୁହନ୍ତି, ତାଙ୍କ ଗ୍ରାମର ବିରଞ୍ଚତ୍ ପ୍ରଧାନ, ଚନ୍ଦ୍ରଶେଖର ପ୍ରଧାନ, ବସନ୍ତ ପ୍ରଧାନଙ୍କ ନାମରେ ପ୍ରଧାନମନ୍ତ୍ରୀ ଅବାସ ଯୋଜନାରେ ଗୃହ ପାଇବା ପାଇଁ ଏସ୍ଇସିରେ ନାମ ଥିବାବେଳେ ସେମାନଙ୍କୁ ଦିଆଯାଉନାହିଁ। ବିରଞ୍ଚତ୍ କହନ୍ତି, ପିଇଓଙ୍କୁ ସେ ୧୦ ହଜାର ଟଙ୍କା ଦେଇଛନ୍ତି, ଆଉ ୧୦ ହଜାର ଟଙ୍କା ଦେଲେ ତାଙ୍କର କାର୍ଯ୍ୟାଦେଶ ମିଳିବ। ସରକାର ଗରିବ ଲୋକଙ୍କ ପାଇଁ ପକ୍କା ଘର ଦେଉଥିବା ବେଳେ ଅଧିକାରୀମାନେ ଏହାକୁ ବାଟବଣା କରୁଥିବା ସେ ପ୍ରକାଶ କରିଛନ୍ତି। ଅନ୍ୟପଟେ ଉକ୍ତ ଗ୍ରାମର କିଛି ବ୍ୟକ୍ତିଙ୍କ ନାମରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର କରା ନ ଯାଇ ମିଥ୍ୟା ବିଲ୍ ହୋଇଥିବା ଜଣାପଡ଼ିଛି। ପ୍ରଶାସନ ପକ୍ଷରୁ ଏହାର ବିଧିବଦ୍ଧ ତଦନ୍ତ କରାଗଲେ ପ୍ରକୃ୍ତ ସତ୍ୟ ପଦାକୁ ଆସିବ। ଏ ନେଇ ପିଇଓ କୃଷ୍ଣଚନ୍ଦ୍ର ମଲ୍ଲିକଙ୍କୁ ପଚାରିବାରୁ ସେ ଟଙ୍କା ମାଗିବା କଥାକୁ ଖଣ୍ଡନ କରିଥିଲେ। ହିତାଧିକାରୀମାନେ ତାଙ୍କ ନାମରେ ମିଥ୍ୟା ଅଭିଯୋଗ ଆଣିଥିବା ସେ ପ୍ରକାଶ କରିଛନ୍ତି। ଜିଲା ପ୍ରଶାସନ ପକ୍ଷରୁ ଏହାର ତଦନ୍ତ କରାଯାଇ ଯୋଗ୍ୟ ହିତାଧିକାରୀଙ୍କୁ ପକ୍କା ଘର ଯୋଗାଇଦେବା ପାଇଁ ଗ୍ରାମବାସୀ ଦାବି କରିଛନ୍ତି।