ନୂଆଦିଲ୍ଲୀ, ୨୦ା୮ (ପି.ଟି.)-ରାୟପୁରରେ ସେପ୍ଟେମ୍ବର ୧୯ରୁ ଆରମ୍ଭ ହେବାକୁଥିବା ବାଂଲାଦେଶ ବିପକ୍ଷ ୨୩ବର୍ଷରୁ କମ୍ ଅନ୍ତର୍ଜାତୀୟ ଦିନିକିଆ କ୍ରିକେଟ ଘରୋଇ ସିରିଜ ପାଇଁ ପ୍ରିୟମ ଗର୍ଗ ୨୩ବର୍ଷରୁ କମ୍ ଭାରତୀୟ ଦଳର ଅଧିନାୟକତ୍ୱ କରିବେ। ସିରିଜର ସମସ୍ତ ମ୍ୟାଚ ରାୟପୁରରେ ହେବ। ଗର୍ଗ ନିକଟରେ ୟୁନାଇଟେଡ କିଙ୍ଗଡମ୍ (ୟୁକେ)ରେ ଅନୁଷ୍ଠିତ ୟୁଥ୍ ଅନ୍ତର୍ଜାତୀୟ ଦିନିକିଆ ସିରିଜରେ ଭାରତୀୟ ୧୯ବର୍ଷରୁ କମ୍ ଦଳର ଅଧିନାୟକତ୍ୱ କରିଥିଲେ। ଦଳରେ ଅର୍ଶଦୀପ ସିଂ ଏବଂ ହରପ୍ରୀତ ବ୍ରାର୍ ସ୍ଥାନ ପାଇଛନ୍ତି। ଏହି ଦୁଇ ଖେଳାଳି ଆଇପିଏଲ ୨୦୧୯ରେ କିଙ୍ଗ୍ସ ଇଲେଭେନ ପଞ୍ଜାବର ଅଂଶବିଶେଷ ଥିଲେ। ବେଙ୍ଗଲର ୨୩ ବର୍ଷରୁ କମ୍ ଅଧିନାୟକ ରିତ୍ୱିକ ରୟ ଚୌଧାରୀଙ୍କୁ ଦଳରେ ଜଣେ ଅଲରାଉଣ୍ଡର ଭାବେ ନିଆଯାଇଛି। ଜାତୀୟ ୨୩ ବର୍ଷରୁ କମ୍ ପ୍ରତିଯୋଗିତାରେ ନିଜ ରାଜ୍ୟ ଦଳକୁ ଫାଇନାଲରେ ପହଞ୍ଚାଇବାରେ ତାଙ୍କର ପ୍ରମୁଖ ଭୂମିକା ରହିଥିଲା। ୟୁକେରେ ୧୯ ବର୍ଷରୁ କମ୍ ସିରିଜ ଏବଂ ସି.କେ. ନାୟୁଡୁ ଟ୍ରଫିରେ ପ୍ରଦର୍ଶନକୁ ଭିତ୍ତି କରି ଚୟନକର୍ତ୍ତାମାନେ ଦଳ ପାଇଁ ଖେଳାଳି ମନୋନୀତ କରିଛନ୍ତି।
୨୩ ବର୍ଷରୁ କମ୍ ଭାରତୀୟ ଦଳ: ପ୍ରିୟମ ଗର୍ଗ (ଅଧିନାୟକ), ଯଶସ୍ବୀ ଜଇସ୍ବାଲ, ମାଧବ କୌଶିକ, ବି.ଆର୍. ଶରଥ (ଉଇକେଟକିପର), ସମର୍ଥ ଭ୍ୟାସ୍, ଆର୍ଯ୍ୟନ ଜୁୟଲ (ଉଇକେଟକିପର), ରିତ୍ୱିକ ରୟ ଚୌଧାରୀ, କୁମାର ସୁରଜ, ଅତୀତ ସେଠ୍, ଶୁଭାଙ୍ଗ ହେଗ୍ଡେ, ହ୍ରିତିକ୍ ଶୋକିନ୍, ଧ୍ରୁଶାନ୍ତ ସୋନି, ଅର୍ଶଦୀପ ସିଂ, କାର୍ତ୍ତିକ ତ୍ୟାଗୀ ଓ ହରପ୍ରୀତ ବ୍ରାର୍।