ମୁମ୍ବାଇ,୧୦।୫: ମହାରାଷ୍ଟ୍ରରେ କରୋନା ସଂକ୍ରମଣ ବେଳକୁ ବେଳ ବଢି ଚାଲିଥିବା ବେଳେ ଏଥିରେ ଅଧିକମାତ୍ରାରେ ପୋଲିସ ସଂକ୍ରମିତ ହୋଇଥିବା ଦେଖାଯାଇଛି। ଗତ ୨୪ ଘଣ୍ଟା ମଧ୍ୟରେ ମହାରାଷ୍ଟ୍ରରେ ୭ ଅଧିକାରୀଙ୍କ ସମେତ ୭୨ ପୋଲିସ କରୋନା ଭାଇରସ ଦ୍ୱାରା ସଂକ୍ରମିତ ହୋଇଛନ୍ତି। ଏମାନଙ୍କୁ ମିଶାଇ ଏବେ ମହାରାଷ୍ଟ୍ରରେ ୭୮୬ ଜଣ ପୋଲିସ କରୋନାରେ ସଂକ୍ରମିତ ହୋଇଥିବା ଖବର ମିଳିଛି। ଏମାନଙ୍କ ମଧ୍ୟରେ ୮୮ ଜଣ ପୋଲିସ ଅଧିକାରୀ ରହିଛନ୍ତି। ଏହାସହ ୭ ଜଣ ପୋଲିସଙ୍କର ଏହି ମହାମାରୀରେ ମୃତ୍ୟୁ ହୋଇ ସାରିଲାଣି। ଏମାନଙ୍କ ମଧ୍ୟରୁ ୭୬ ଜଣ ସୁସ୍ଥ ମଧ୍ୟ ହୋଇଛନ୍ତି। ସୂଚନାଯୋଗ୍ୟ, ଗତ ୪ ଦିନ ମଧ୍ୟରେ ପ୍ରାୟ ୩୩୦ଜଣ ପୋଲିସ କରୋନାରେ ସଂକ୍ରମିତ ହେବା ସମସ୍ତଙ୍କୁ ଚିନ୍ତାରେ ପକାଇ ଦେଇଛି। ମହାରାଷ୍ଟ୍ରରେ ଏବେ ମୋଟ କରୋନା ଆକ୍ରାନ୍ତଙ୍କ ସଂଖ୍ୟା ରହିଛି ୨୦,୨୨୮। ରାଜ୍ୟରେ ଏବେ କରୋନାରେ ୭୭୯ ଜଣଙ୍କ ମୃତ୍ୟୁ ହୋଇଥିବା ବେଳେ ଗତ ୨୪ ଘଣ୍ଟାରେ ୧,୧୬୫ ନୂଆ ସଂକ୍ରମିତଙ୍କୁ ଚିହ୍ନଟ କରାଯାଇଥିବା ବେଳେ ୨୭ ଜଣଙ୍କ ମୃତ୍ୟୁ ହୋଇଛି। ଇତିମଧ୍ୟରୁ କେବଳ ମୁମ୍ବାଇର ୭୨୨ଜଣ ରହିଛନ୍ତି। ମୁମ୍ବାଇର ମୋଟ ସଂକ୍ରମିତଙ୍କ ସଂଖ୍ୟା ୧୨,୮୬୪ ରହିଥିବା ବେଳେ ଏଠାରେ ୪୮୯ଜଣଙ୍କ ମୃତ୍ୟୁ ହେଲାଣି।