କଟକ ଅଫିସ, ୧୭ା୬ : ଇଣ୍ଡିଆନ ମେଡିକାଲ ଆସୋସିଏଶନ (ଆଇଏମ୍ଏ)ର ଆହ୍ବାନକ୍ରମେ ରାଜ୍ୟରେ ଚିକିତ୍ସା ସେବା ୨୪ ଘଣ୍ଟିଆ ବନ୍ଦ ରହିବ । ଏହି ପରିପ୍ରେକ୍ଷୀରେ ଏସ୍ସିବି ମେଡିକାଲର ଆଉଟଡୋର ସୋମବାର ସକାଳ ୬ଟାରୁ ମଙ୍ଗଳବାର ସକାଳ ୬ଟା ପର୍ଯ୍ୟନ୍ତ ବନ୍ଦ ରଖିବାକୁ ନିଷ୍ପତ୍ତି ନେଇଛନ୍ତି ଡାକ୍ତରମାନେ। ଘରୋଇ ମେଡିକାଲଗୁଡ଼ିକ ମଧ୍ୟ ବନ୍ଦ ରହିବ। ଏ ନେଇ ରବିବାର ସନ୍ଧ୍ୟାରେ ମେଡ଼ିକାଲ ନିକଟସ୍ଥ ଆଇଏମ୍ଏ ହାଉସରେ ଏକ ଖବରଦାତା ସମ୍ମିଳନୀ ଡକାଯାଇଥିଲା। ପିଏଚଏଓ ସଭାପତି ଡା. କୃପାସିନ୍ଧୁ ପଣ୍ଡା ଏଥିରେ ଅଧ୍ୟକ୍ଷତା କରିଥିଲେ। ଏହି ଅବସରରେ କିଛି ଦାବି ଉପସ୍ଥାପନ କରାଯାଇଥିଲା। ମେଡ଼ିକାଲରେ ରୋଗୀଙ୍କ ସମ୍ପର୍କୀୟମାନେ ହୁଅନ୍ତୁ କିମ୍ବା କୌଣସି ବ୍ୟକ୍ତି ଭଙ୍ଗାରୁଜା କରିବା ଘଟଣା ନିନ୍ଦନୀୟ। ଡାକ୍ତର ଏବଂ ସମସ୍ତ ଚିକିତ୍ସା କର୍ମୀଙ୍କ ସୁରକ୍ଷା ପ୍ରତି ଧ୍ୟାନ ଦିଆଯାଉ। ଏଥି ନିମନ୍ତେ ଜାତୀୟ ସ୍ତରରେ ଆଇନ ପ୍ରଣୟନ କରାଯିବାକୁ ଦାବି ହୋଇଛି। ଆଇଏମଏ ଓଡ଼ିଶା ଶାଖା ସମ୍ପାଦକ ଡା. ଜନ୍ମେଜୟ ମହାପାତ୍ର, ଆଇଏମ କଟକ ଶାଖା ସଭାପତି ଡା. ବନବିହାରୀ ମିଶ୍ର, ସମ୍ପାଦକ ଡା. ଶକ୍ତିପ୍ରସାଦ ଦାସ, ଆଇଏମ ରାଜ୍ୟ ସଭାପତି ଡା. ପୂର୍ଣ୍ଣଚନ୍ଦ୍ର ମହାପାତ୍ର, ଡା. ବ୍ରଜ ଦାଶ, ଡା. ପୁଣ୍ୟଶ୍ଲୋକ ଦାସ, ଡା. ଜ୍ୟୋତିର୍ମୟ ନାୟକ, ଏସ୍ସିବି ଜୁନିୟର ଡାକ୍ତର ସଂଘ ସଭାପତି ଡା. ପ୍ରଭାତ ରାଉତ ଏବଂ ଘରୋଇ ଚିକିତ୍ସକ ସଂଘର ସମସ୍ତ କର୍ମକର୍ତ୍ତା ମଧ୍ୟ ଉପସ୍ଥିତ ଥିଲେ। ସୂଚନାଥାଉ କି, କୋଲକତାର ଏନଆର୍ଏସ ମେଡ଼ିକାଲ କଲେଜର ହାଉସ ସର୍ଜନ ଡା. ପରିବାହ ବାନାର୍ଜୀ ଓ ଅନ୍ୟ ଛାତ୍ରୀଛାତ୍ରମାନଙ୍କୁ ଦୁର୍ବୃତ୍ତମାନେ ମରଣାନ୍ତକ ଆକ୍ରମଣ ଘଟଣାକୁ ନେଇ ଏହି ବନ୍ଦ ଡାକରା ଦିଆଯାଇଛି ।