ନୂଆଦିଲ୍ଲୀ,୨୧।୫-ଦେଶ ମଧ୍ୟରେ କରୋନା ପ୍ରଭାବ କମୁ ନ ଥିବାରୁ ବର୍ତ୍ତମାନ ଉଭୟ ଡୋମେଷ୍ଟିକ ଏବଂ ଅନ୍ତର୍ଜାତୀୟ ଉଡାଣ ବନ୍ଦ ରହିଛି। ଏଭଳି ସ୍ଥିତିରେ ମେ ୨୫ରୁ ପୁଣି ଥରେ ଦେଶ ମଧ୍ୟରେ ବିମାନ ସେବା ଧୀରେ ଧୀରେ ସ୍ବାଭାବିକ ହେବାକୁ ଯାଉଛି। ଅର୍ଥାତ୍ ଆସନ୍ତା ସୋମବାରଠାରୁ ଲୋକମାନେ ବିମାନ ସେବା ଲାଭକରିବାକୁ ସକ୍ଷମ ହେବେ। ବେସାମରିକ ବିମାନ ଚଳାଚଳ ମନ୍ତ୍ରୀ ହରଦୀପ ସିଂ ପୁରୀ ଏ ସମ୍ପର୍କରେ ବୁଧବାର ସୂଚନା ଦେଇଛନ୍ତି। ଟୁଇଟର ଯୋଗେ ସୂଚନା ଦେଇ ସେ କହିଛନ୍ତି ଯେ, ସେବା ଆରମ୍ଭ ନେଇ ବିମାନ ବନ୍ଦର ଏବଂ ସେବା ଯୋଗାଣକାରୀ କମ୍ପାନୀଗୁଡିକୁ ବର୍ତ୍ତମାନ ଅବଗତ କରାଯାଉଛି। ବିମାନ ଯାତ୍ରୀଙ୍କ ଲାଗି ମନ୍ତ୍ରଣାଳୟ ପକ୍ଷରୁ ଏକ ଷ୍ଟାଣ୍ଡାର୍ଡ ଅପରେଟିଂ ପ୍ରୋସେଜ୍ୟୁର(ଏସ୍ଓପି) ଜାରି କରାଯିବ। ମାର୍ଚ୍ଚ ଶେଷ ଭାଗରୁ ବିମାନ ସେବାକୁ ବନ୍ଦ ରଖାଯାଇଛି। ସଂକ୍ରମଣକୁ କମ୍ କରିବା ଲାଗି ଲକ୍ଡାଉନରୁ ଭାରତୀୟ ବିମାନ ସେବା ଯୋଗାଣକାରୀ କମ୍ପାନୀଗୁଡିକୁ ୧.୭୫ ବିଲିୟନ ଡଲାର କ୍ଷତି ସହିବାକୁ ପଡିବ ବୋଲି ଇଣ୍ଟରନ୍ୟାଶନାଲ ଏୟାର ଟ୍ରାନ୍ସପୋର୍ଟ ଆସୋସିଏଶନ(ଆଇଟିଏ) ପକ୍ଷରୁ ସୂଚନା ଦିଆଯାଇଛି।