ନୂଆଦିଲ୍ଲୀ,୧୩-୯: ଟିକସ ପ୍ରଦାନକାରୀଙ୍କୁ ଆଶ୍ୱସ୍ତ କରି କେନ୍ଦ୍ରୀୟ ପ୍ରତ୍ୟକ୍ଷ ଟିକସ ବୋର୍ଡ(ସିବିଡିଟି) ଏକ ସର୍କୁଲାର ଜାରି କରିଛି। ଏଣିକି ଜାଣିଶୁଣି ଟିକସ ଫାଙ୍କିବାର ପ୍ରୟାସ, ଆୟକର ରିଟର୍ନ ଦାଖଲ ନ କରିବା ମାମଲାରେ ଏବଂ ସରକାରୀ ରାଜକୋଷରେ ୨୫ ଲକ୍ଷ ଟଙ୍କା ପର୍ଯ୍ୟନ୍ତ ଟିଡିଏସ୍(ସ୍ରୋତରୁ ଟିକସ କାଟିବା) ଜମା ନ କରିବା କ୍ଷେତ୍ରରେ ଟିକସଦାତାଙ୍କ ବିରୋଧରେ କୌଣସି ଫୌଜଦାରୀ ମାମଲା ଦାଏର କରାଯିବ ନାହିଁ ବୋଲି ସିବିଡିଟି ସର୍କୁଲାରରେ ସ୍ପଷ୍ଟ କରାଯାଇଛି। ଏହାର ଅର୍ଥ ଏଣିକି ଏଭଳି ମାମଲାଗୁଡ଼ିକ ଆଉ କୋର୍ଟକୁ ଯିବ ନାହିଁ। ସିବିଡିଟିର ଏହି ନିଷ୍ପତ୍ତି କାରଣରୁ ବହୁ ସଂଖ୍ୟାରେ ଟିକସଦାତାଙ୍କୁ ଆଇନଗତ ଝାମେଲାରୁ ମୁକ୍ତି ମିଳିବ। ଟିକସଦାତାଙ୍କ ବିରୋଧରେ କଠୋର ମନୋଭାବ ପୋଷଣ ନ କରିବାକୁ ନିକଟ ଅତୀତରେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ଆୟକର ଅଧିକାରୀଙ୍କୁ ପରାମର୍ଶ ଦେଇଥିଲେ। ସର୍କୁଲାରରେ କୁହାଯାଇଛି ଯେ, ବାରମ୍ବାର ଦାଖଲ କରିବାରେ ହେଳା କରିବା କ୍ଷେତ୍ରରେ ଦୁଇଜଣିଆ ମୁଖ୍ୟ କମିଶନରଙ୍କ କଲେଜିୟମ କିମ୍ବା ଆୟକର ବିଭାଗର ମହାନିର୍ଦ୍ଦେଶକଙ୍କ ଅନୁମତି ନେବା ପରେ ଯାଇ ମାମଲା ଦାଏର କରାଯାଇପାରିବ। ଆୟକର ଧାରା ୨୭୬ସି ଅନୁସାରେ ଏଭଳି ମାମଲା ଦାଏର କରାଯିବ। ସିବିଡିଟିର ନିଷ୍ପତ୍ତି ଯୋଗୁ ଏଭଳି ମାମଲା ସଂଖ୍ୟା ବହୁଗୁଣରେ କମିବ। ବହୁ ସଂଖ୍ୟାରେ ଟିକସଦାତା ଆଇନଗତ ଲଢ଼େଇରୁ ମୁକ୍ତି ପାଇବେ। କେବଳ ସନ୍ଦେହରେ ନୁହେଁ ବଳିଷ୍ଠ ପ୍ରମାଣ ଭିତ୍ତିରେ ମାମଲା ଦାଏର କରାଯିବ।