ପୁରୀ ଅଫିସ, ୧୫ା୧୧: ପୁରୀ ସହରରେ ନିଶା କାରବାର ବୃଦ୍ଧି ପାଇବାରେ ଲାଗିଥିବାବେଳେ ଏବେ ଏଥିରେ ମହିଳା ମାନଙ୍କୁ ବ୍ୟବହାର କରାଯାଉଛି। ଫଳରେ କଲେଜ ବିଦ୍ୟାର୍ଥୀ, ଯୁବପିଢି ବର୍ତ୍ତମାନ ନିଶା ସେବନ କରି ବିପଥଗାମୀ ହେଉଛନ୍ତି। ସହର ଗଳିକନ୍ଦିରେ ଏହି ବେପାର ଧିରେ ଧିରେ କାୟା ବିସ୍ତାର କରିବାରେ ଲାଗିଛି। ଏହାର ଚୋର କଳିକତା ଏବଂ ନୂଆଦିଲ୍ଲୀ ପର୍ଯ୍ୟନ୍ତ ଲମ୍ବିଛି। ଶୁକ୍ରବାର ପୁରୀ ଅବକାରୀ ପୋଲିସ ବଳିଆପଣ୍ଡା ବିନାୟକ ବସ୍ତିରୁ ୨୬ଗ୍ରାମ ବ୍ରାଉନସୁଗାର ଜବତ କରିଛନ୍ତି। ବ୍ରାଉନସୁଗାର ବିକ୍ରି ଅଭିଯୋଗରେ ଖୁକୁ ମଣ୍ଡଳ(୪୫)ଙ୍କୁ ଗିରଫ କରିଛି। ଖୁକୁ ଓ ତାଙ୍କ ସ୍ବାମୀ ଗୋଲଖ ମୂଳତଃ ବଙ୍ଗଳାଦେଶ ବାସିନ୍ଦା ହୋଇଥିବାବେଳେ ଏହି ବସ୍ତିରେ ରହି ବ୍ରାଉନସୁଗାର ସହ ନିଶା କାରବାର କରୁଥିବା ଅବକାରୀ ପୋଲିସ ସୂଚନା ଦେଇଛି। ଜବତ ବ୍ରାଉନସୁଗାରର ହାରାହାରି ମୂଲ୍ୟ ୩ଲକ୍ଷରୁ ଊର୍ଦ୍ଧ୍ୱ ବୋଲି ଜଣାପଡିଛି। ଅବକାରୀ ଆଇଆଇସି ବିକାଶ କୁମାର ନାୟକଙ୍କ ନେତୃତ୍ୱରେ ଏସ୍ଆଇ ପ୍ରକାଶ କୁମାର ସାହୁ, ସନ୍ତୋଷ କୁମାର ନାୟକଙ୍କୁ ନେଇ ଗଠିତ ଏକ ଟିମ୍ ଗ୍ରାହକ ସାଜି ଉକ୍ତ ଅଞ୍ଚଳରେ ଚଢାଉ କରିଥିଲେ। ଖୁକୁ ଏକ ପୁଡ଼ିଆ ପ୍ୟାକେଟ ଧରି ଛକରେ ବିକ୍ରି କରୁଥିଲେ। ଏହି ସମୟରେ ବ୍ରାଉନସୁଗାର କିଣବା ବାହାନରେ ତାଙ୍କୁ ଧରିଥିଲେ।
ସେହିପରି ବେଆଇନ ମଦ ବିକ୍ରି ଅଭିଯୋଗରେ ଅବକାରୀ ପୋଲିସ ୪ଜଣଙ୍କୁ ଗିରଫ କରିଛି। ସେମାନଙ୍କ ଠାରୁ ଜବତ ୨୧ଶହ ଲିଟର ଗୁଡପୋଚ ଓ ୨ଶହ ଲିଟର ରନ୍ଧା ମଦ ନଷ୍ଟ କରାଯାଇଛି। ଗିରଫ ମାନେ ସୁରେନ୍ଦ୍ର ବେହେରା(୪୨), ରବି ନାୟକ(୪୫), ରବିନ୍ଦ୍ର ପ୍ରଧାନ(୪୦)। ଶୁକ୍ରବାର ପୁରୀ ଅବକାରୀ ପୋଲିସ ଚନ୍ଦନପୁର, ବୀରନରସିଂହପୁର, ବାଲି ନୋଲିଆ ସାହି ପ୍ରଭୃତି ସ୍ଥାନରେ ଚଢାଉ କରିଥିଲା।